قازىرگى تاڭدا ەلىمىزدە ساياسي جاڭعىرۋدىڭ جاڭا كەزەڭى ءجۇرىپ جاتىر. ادىلەتتى قازاقستان قۇرۋ جولىنداعى ستراتەگيالىق باعدار ايقىندالدى. جاڭا ساياسي جانە قۇقىقتىق ينستيتۋتتار دا قالىپتاسىپ جاتىر. قوعامنىڭ ازاماتتىق بەلسەندىلىگى مەن ساياسي مادەنيەتى ارتىپ كەلەدى. مۇنداي جاعدايدا مەملەكەتتىك باسقارۋ جۇيەسىن جاڭارتۋ جانە ونىڭ تيىمدىلىگىن ارتتىرۋ – ۋاقىت تالابى.
وسى تۇرعىدان العاندا, ءبىر پالاتالى پارلامەنتكە كوشۋ ەلىمىزدىڭ ساياسي جۇيەسىن جاڭعىرتۋدىڭ ماڭىزدى جانە وزەكتى باعىتى دەپ ەسەپتەيمىز. بۇل باستاما زاڭ شىعارۋ ۇدەرىسىن جەڭىلدەتىپ, شەشىم قابىلداۋدى جەدەلدەتۋگە, دەموكراتيالىق باقىلاۋدى كۇشەيتۋگە مۇمكىندىك بەرەدى. پارلامەنت – حالىقتىڭ وكىلدىك ورگانى. ونىڭ باستى مىندەتى – ازاماتتاردىڭ مۇددەسىن قورعاۋ. ءبىر پالاتالى قۇرىلىم حالىق پەن بيلىك اراسىنداعى بايلانىستى نىعايتىپ, ءوزارا ءىس-قيمىلدى وڭتايلاندىرۋعا تولىق مۇمكىندىك بەرەدى.
حالىقارالىق تاجىريبەگە جۇگىنسەك, مۇنداي شەشىم كوپتەگەن ەلدە وڭ ناتيجەسىن كورسەتتى. مىسالى, دانيا, شۆەتسيا, كوستا-ريكا, پەرۋ, وڭتۇستىك افريكا سياقتى مەملەكەتتەر ەكى پالاتالى جۇيەدەن ءبىر پالاتالى پارلامەنتكە ءوتتى. ولار مۇنداي قادامعا مەملەكەتتىك باسقارۋ تيىمدىلىگىن ارتتىرۋ, شىعىنداردى ازايتۋ جانە زاڭ شىعارۋ ۇدەرىسىنىڭ اشىقتىعىن قامتاماسىز ەتۋ ماقساتىندا باردى. اتالعان مىسالدار كورسەتكەندەي, پارلامەنت قۇرىلىمىن وڭتايلاندىرۋ – بيلىك تارماقتارىنىڭ ءتيىمدى ءوزارا ءىس-قيمىلىن قامتاماسىز ەتۋدىڭ, دەموكراتيالىق ينستيتۋتتاردى نىعايتۋدىڭ جانە حالىقتىڭ وكىلدىك ەتۋ تەتىكتەرىن جەتىلدىرۋدىڭ ماڭىزدى شارتى.
ءبىز بۇل رەفورمانى ادىلەتتى قازاقستان قۇرۋ جولىنداعى ساياسي جاڭعىرۋدىڭ قيسىندى ءارى قاجەتتى جالعاسى دەپ سانايمىز. پرەزيدەنت قاسىم-جومارت توقاەۆتىڭ تاپسىرماسىنا سايكەس قۇرىلعان پارلامەنتتىك رەفورما جونىندەگى جۇمىس توبى العا قويىلعان مىندەتتەردى ساپالى جانە جۇيەلى تۇردە جۇزەگە اسىرۋعا تولىق دايىن. بۇل توپ پارلامەنتتىك رەفورمانى ازىرلەۋ مەن ىسكە اسىرۋ باعىتىندا ءتيىمدى پىكىرتالاس جانە كاسىبي تالقىلاۋ الاڭىنا اينالىپ, ەلىمىزدىڭ ساياسي جۇيەسىن جەتىلدىرۋگە باعىتتالعان ناقتى ۇسىنىستار ەنگىزەدى دەپ سەنەمىز.
ءۇنزيلا شاپاق,
ءماجىلىس دەپۋتاتى