دۋشانبە قالاسىندا «جاسىل ينۆەستيتسيالار: تۇراقتى بولاشاق ءۇشىن قازىرگى مۇمكىندىكتەر» تاقىرىبىندا ەكىنشى «دۋشانبە حالىقارالىق ينۆەستيتسيالىق فورۋمى – 2025» ءوتتى. ءىس-شارا بارىسىندا قازاقستان – تاجىكستان ىنتىماقتاستىعىنىڭ قازىرگى جاعدايى مەن دامۋ پەرسپەكتيۆالارى قارالدى.
فورۋمعا 30-دان استام ەلدەن كەلگەن 600-دەن استام شەتەلدىك قوناقتار, حالىقارالىق ۇيىمدار مەن قارجى ينستيتۋتتارىنىڭ وكىلدەرى قاتىستى. ءىس-شارانى تاجىكستان رەسپۋبليكاسىنىڭ پرەزيدەنتى ەمومالي راحمون اشتى.
قازاقستان دەلەگاتسياسىن باستاپ بارعان پرەمەر-ءمينيستردىڭ ءبىرىنشى ورىنباسارى رومان سكليار پلەنارلىق وتىرىس كەزىندە فورۋمنىڭ ەكى ەل ۇكىمەتى مەن كومپانيالارى اراسىنداعى ءوزارا ءىس-قيمىلدىڭ ماڭىزدى قۇرالىنا اينالعانىن اتاپ ءوتتى. كۇن تارتىبىندە ەكىجاقتى ساۋدا-ەكونوميكالىق جانە ينۆەستيتسيالىق ىنتىماقتاستىقتى ودان ءارى دامىتۋ, كولىك جانە لوگيستيكا, ەنەرگەتيكا, اۋىل شارۋاشىلىعى, قارجى جانە باسقا دا سالالارداعى ءوزارا بايلانىستاردى نىعايتۋ ماسەلەلەرى قارالدى.
ر.سكليار فورۋمدا بەلگىلەنگەن باعىتتار قازىرگى ينۆەستيتسيالىق ساياساتتىڭ نەگىزىنە اينالىپ, قازاقستاندا كەڭ قولداۋ تاۋىپ وتىرعانىن اتاپ ءوتتى. ەلىمىز جاسىل ترانسفورماتسيا, ەنەرگيا تيىمدىلىگىن ارتتىرۋ جانە ونەركاسىپتى تسيفرلاندىرۋ باعىتىن دايەكتى تۇردە جۇزەگە اسىرىپ كەلەدى.
تاراپتار قابىلدانعان شەشىمدەر ەكىجاقتى قاتىناستاردى بارلىق باعىتتار بويىنشا ودان ءارى نىعايتىپ, تەرەڭدەتە تۇسۋگە ىقپال ەتەتىنىنە سەنىم ءبىلدىردى.
كەلەسى دۋشانبە حالىقارالىق ينۆەستيتسيالىق فورۋمىن 2027 جىلى وتكىزۋ جوسپارلانىپ وتىر.