جي:
دوللاردىڭ قالاي وزگەرەتىنى بىرنەشە فاكتورعا بايلانىستى. قازىر 1 دوللار 541 تەڭگە بولىپ, تۇراقتى كورىنگەنىمەن, ونىڭ جاعدايى مۇناي باعاسى مەن ۇلتتىق قوردان تۇسەتىن اقشاعا تاۋەلدى. ەگەر مۇناي باررەلىنە شامامەن 80 دوللار بولىپ تۇرسا, تەڭگە دە كوپ السىرەي قويمايدى.
ەل ەكونوميكاسى مۇناي ەكسپورتىنا تاۋەلدى بولعاندىقتان, ونىڭ باعاسى تومەندەسە, تەڭگە بىردەن السىرەيدى. ەگەر باررەل باعاسى 75 دوللاردان تۇسسە, دوللار 560 تەڭگەگە دەيىن كوتەرىلۋى مۇمكىن.
ينفلياتسيا دا تەڭگەگە قىسىم ءتۇسىرىپ تۇر. ۇلتتىق بانك نارىقتى ۇستاپ تۇر, بىراق الەمدەگى جاعداي, اسىرەسە گەوساياسي تاۋەكەلدەر مەن ەكسپورتتىڭ ازايۋى اسەرىن تيگىزبەي قويمايدى. سوندىقتان جىل سوڭىندا دوللاردىڭ 550 تەڭگە ماڭىندا بولۋى – شىندىققا جاقىن ءارى قالىپتى بولجام.
قازىر دوللار باعامىنا اسەر ەتىپ وتىرعان نەگىزگى سەبەپ – اقش-تاعى اقشا-نەسيە ساياساتىنا قويىلاتىن تالاپ كۇشەيە ءتۇستى. ونداعى ورتالىق بانك پايىزدىق مولشەرلەمەنى جوعارى ۇستاپ وتىر, سول سەبەپتى ينۆەستورلار اقشاسىن دامۋشى ەلدەردەن شىعارىپ, قاۋىپسىز اكتيۆ – دوللارعا كوبىرەك سالىپ جاتىر.
جىل سوڭىندا ىشكى نارىقتاعى سۇرانىس تا ءرول وينايدى. كوپ كومپانيا شەتەلگە تولەمدەر جاسايدى, يمپورتتىق تاۋارلارعا دا سۇرانىس ارتادى. مۇنداي كەزدە دوللار باعاسى ۋاقىتشا وسەدى. سوندىقتان 550 تەڭگە دەڭگەيى – تەك ەكونوميكالىق ەمەس, سونىمەن بىرگە نارىق ءۇشىن پسيحولوگيالىق شەك. قازىردىڭ وزىندە كوپ ساراپشىلار مەن بيزنەس وكىلدەرى وسى مەجەنى «جاڭا قالىپتى باعا» رەتىندە قابىلداپ وتىر.
دايىنداعان –
ەلىگىماي توڭكەر,
«Egemen Qazaqstan»