قىركۇيەكتەن بەرى تەڭگە تاعى قۇنسىزدانىپ, دوللار باعاسى 550 تەڭگەگە تايادى. سەبەبى نەدە؟
ەكونوميكا شولۋشىسى ايبار ولجاەۆتىڭ پىكىرىنشە, تەڭگە ەركىن اينالىمداعى ۆاليۋتا. ونىڭ باعامىن ۇكىمەت تە, ۇلتتىق بانك تە قولمەن ۇستاپ تۇرمايدى.
«تەڭگە نارىقتىق ۆاليۋتا. باعامدى سۇرانىس پەن ۇسىنىس انىقتايدى. ءبىز مۇنى 2015 جىلدان باستاپ تاڭدادىق. سوندىقتان كەيدە تەڭگە السىرەپ, كەيدە قايتا كۇشەيىپ وتىرادى بۇل قالىپتى جاعداي», دەيدى ساراپشى.
ونىڭ ايتۋىنشا, بيىلعى السىرەۋگە بىرنەشە سەبەپ بار. يمپورت كولەمى ارتتى, ياعني سىرتتان كەلەتىن تاۋار كوبەيگەن سايىن دوللارعا سۇرانىس وسەدى. مۇناي باعاسى تومەندەپ, ەكسپورتتىق كىرىس ازايدى. رۋبل دە السىرەپ جاتىر, بۇل تەڭگەگە تىكەلەي اسەر ەتەدى.
«قازىر ۇلتتىق بانك تەك ينفلياتسيانى باقىلاۋمەن اينالىسادى. ال تەڭگە باعامى نارىقتىڭ ەنشىسىندە. مۇنى السىرەۋ دەپ ەمەس, ەكونوميكانىڭ ءوز ىرعاعى دەپ ءتۇسىنۋ كەرەك», دەيدى ا. ولجاەۆ.
ساراپشىنىڭ ايتۋىنشا, تەڭگە باعامىن قولدان ۇستاپ تۇرۋ ءتيىمسىز. بۇرىن سول ءۇشىن ميللياردتاعان دوللار رەزەرۆ جۇمسادىق. بىراق ول ۇزاققا بارمايدى. ەڭ دۇرىس جول – ەكونوميكانى ءارتاراپتاندىرۋ ءارى ءوندىرىستى كۇشەيتۋ. سول كەزدە تەڭگە تابيعي تۇردە نىعايادى.
«بيىل دوللار 600 تەڭگەدەن اسپايدى دەپ ويلايمىن. تەڭگە ءالسىز ەمەس ول نارىققا بەيىمدەلگەن ۆاليۋتا. ءبىز ەڭ اۋىر كەزەڭنەن وتتىك, ەندى تەڭگە ءوز تەپە-تەڭدىگىن تابادى», دەپ ءتۇسىندىردى ەكونوميست.