پرەمەر-مينيستر ولجاس بەكتەنوۆتىڭ توراعالىعىمەن وتكەن «Kazakh Tourism Development Ltd.» كومپانياسىنىڭ ديرەكتورلار كەڭەسىندە «Almaty Superski» جوباسىنىڭ جاڭارتىلعان جوسپارى ماقۇلداندى.
كومپانيانىڭ باس اتقارۋشى ديرەكتورى ەرجان ەركىنباەۆ جوبانى الەمگە تانىمال «Pas Grau International» كومپانياسىمەن بىرگە ازىرلەگەنىن ايتتى. جوسپارعا زاماناۋي وندىرىستىك تەحنولوگيالاردى قولدانۋ, رەلەف پەن كليماتتىق جاعدايلاردى سپۋتنيكتىك دەرەكتەر ارقىلى زەرتتەۋ, «جاسىل» ستاندارتتاردى ەنگىزۋ كىرگەن. الەمنىڭ 120-دان استام تاۋ شاڭعىسى كۋرورتىندا سىنالعان ۇزدىك تاجىريبەلەر نەگىزگە الىنعان.
«Pas Grau International» وكىلى جوان ۆيلادومات نىساننىڭ مەگاپوليسكە جاقىن ورنالاسۋىن ارتىقشىلىق رەتىندە باعالادى. ونىڭ ايتۋىنشا, الماتىداعى دامىعان قوناقۇي مەن تاماقتانۋ ورىندارى, سونداي-اق كولىك ينفراقۇرىلىمى كۋرورت اۋماعىندا ارتىق قۇرىلىس جۇرگىزۋدى قاجەت ەتپەيدى. بۇل شەشىم ايماقتىڭ تابيعي كەلبەتىن ساقتاۋعا مۇمكىندىك بەرەدى.
جوسپاردى دايىنداۋ بارىسىندا ەكولوگياعا ەرەكشە نازار اۋدارىلدى. قۇجاتتا ورنىقتى دامۋ قاعيداتتارى مەن حالىقارالىق ەكوتۋريزم ستاندارتتارى ەسكەرىلگەن. الداعى ۋاقىتتا جوبا الماتىنىڭ قىسقى دەمالىس پەن ەكولوگيالىق تۋريزم ورتالىعى رەتىندەگى مارتەبەسىن نىعايتىپ, قوناقۇي بيزنەسىنە, كولىك پەن قىزمەت كورسەتۋ سالاسىنا جاڭا ينۆەستيتسيالار اكەلەدى. بۇل ءوز كەزەگىندە شاعىن جانە ورتا كاسىپكەرلىكتىڭ دامۋىنا سەرپىن بەرمەك.
وتىرىس بارىسىندا پرەمەر-مينيستر قۇرىلىس كەزىندە ەكولوگيالىق تالاپتاردىڭ قاتاڭ ساقتالۋى كەرەكتىگىن اتاپ ءوتتى.
«Almaty Superski» وتاندىق ءتۋريزمنىڭ جاڭا قارقىنىن قالىپتاستىرىپ, ەل ەكونوميكاسىن ارتاراپتاندىرۋعا ۇلەس قوسپاق.