اقمولا وبلىسىندا قازىردىڭ وزىندە 5 ميلليون توننا استىق جينالدى. بۇل — ەگىن ورۋ جۇمىستارى ازىرگە تەك 70 پايىز القاپتا, ياعني ءۇش ميلليون گەكتاردان استام جەردە عانا جۇرگىزىلگەنىنە قاراماستان قول جەتكىزىلگەن كورسەتكىش. ىشكى ساياسات باسقارماسىنىڭ مالىمەتىنشە, بيىلعى ءونىم رەكوردقا جاقىن جانە بىلتىرعى كورسەتكىشتەن اسىپ ءتۇسۋى مۇمكىن, دەپ حابارلايدى Egemen.kz.
اگرارلار قىزۋ قارقىنمەن جۇمىس ىستەپ جاتىر. ۆەدومستۆو اتاپ وتكەندەي, بيىلعى جيىن-تەرىم سوڭعى جىلدارداعى ەڭ اۋقىمدى ناۋقانداردىڭ بىرىنە اينالۋى ىقتيمال. وتكەن جىلى جالپى ناتيجە 6 ميلليون توننانى قۇراعان ەدى. وبلىستا بيىل بۇل مەجەدەن اساتىنىنا سەنىم مول.
وبلىستىق اۋىل شارۋاشىلىعى باسقارماسىنىڭ اقپاراتى بويىنشا, ورتاشا ونىمدىلىك گەكتارىنان 15,6 تسەنتنەر دەڭگەيىندە ساقتالۋدا. مۇندا تەك كولەم عانا ەمەس, ساپا دا ماڭىزدى: بيدايدىڭ 70 پايىزدان استامى ءۇشىنشى كلاسقا سايكەس كەلەدى. بۇل ەلىمىزدىڭ قويماسىنا ىشكى دە, سىرتقى نارىقتا سۇرانىسقا يە جوعارى ساپالى استىق ءتۇسىپ جاتقانىن بىلدىرەدى.
مۇنداي قارقىن كەشەندى قولداۋ شارالارى مەن اگروسەكتورداعى تەحنولوگيالىق وزگەرىستەردىڭ ارقاسىندا مۇمكىن بولدى.
«بيىل وڭىردە مينەرالدى تىڭايتقىش ەنگىزۋ كولەمى ءۇش ەسەگە ارتىپ, 336 مىڭ تونناعا جەتتى. بۇل — 2023 جىلعى كورسەتكىشتەن ءۇش ەسە جوعارى. سونداي-اق مايلى داقىلدار القابى دا ايتارلىقتاي ءوستى: ەگەر ەكى جىل بۇرىن ولاردىڭ اۋماعى 200 مىڭ گەكتاردان از بولسا, بيىل العاش رەت 495 مىڭ گەكتاردان استى», دەپ حابارلادى سالالىق ۆەدومستۆو.
تەحنيكانى جاڭارتۋعا ەرەكشە كوڭىل ءبولىندى. جىل باسىنان بەرى اگرارشىلار 1400-دەن استام اۋىل شارۋاشىلىعى ماشيناسىن ساتىپ الدى, بۇل بىلتىرعىدان ءبىر جارىم ەسە كوپ. بۇگىندە وبلىس القاپتارىندا 7 مىڭنان استام كومباين جۇمىس ىستەپ تۇر, ونىڭ ىشىندە 5 مىڭعا جۋىعى – زاماناۋي ءارى ونىمدىلىگى جوعارى تەحنيكا. بۇل تەحنيكالىق سەرپىلىس ءونىمدى جيناۋ قارقىنىن ارتتىرۋعا ءارى شىعىندى ازايتۋعا مۇمكىندىك بەردى.
«فەرمەرلەرگە 94 مىڭ توننادان استام جەڭىلدەتىلگەن ديزەل وتىنى بەلگىلەنگەن باعامەن ءبولىندى, ونىڭ تاراتىلۋى قاتاڭ كەستە بويىنشا جۇرگىزىلۋدە. ناۋقان بارىسىندا ججم جەتكىزۋدە ەشقانداي ماسەلە تىركەلمەدى. ءونىمدى 4,3 ميلليون توننا جالپى سىيىمدىلىعى بار 66 ليتسەنزيالانعان ەلەۆاتور قابىلداپ جاتىر. سونىمەن بىرگە اۋىل شارۋاشىلىعى وندىرۋشىلەرىنىڭ يەلىگىندە تاعى 2,9 ميلليون تونناعا جۋىق استىق ساقتايتىن 1,5 مىڭنان استام قويما بار. جالپى ساقتاۋدىڭ ايماقتىق كولەمى 7 ميلليون توننادان اسادى. ءدان كەپتىرۋ ءۇشىن تاۋلىگىنە 230 مىڭ توننادان استام ءونىم وڭدەي الاتىن 264 كەپتىرگىش ىسكە قوسىلعان», دەدى اۋىل شارۋاشىلىعى باسقارماسى.
وبلىستىق ىشكى ساياسات باسقارماسىنىڭ دەرەگىنشە, اقمولا وبلىسى ماۋسىمدى زور ناتيجەمەن ءارى جوعارى كوڭىل-كۇيمەن اياقتاپ كەلەدى. جينالعان 5 ميلليون توننا — شەكتى مەجە ەمەس. ءار كۇن سايىن وڭىرلىك ەلەۆاتورلارعا جۇزدەگەن مىڭ توننا جاڭا ءونىم قوسىلىپ جاتىر. اگرارلار بيىلعى جيىن-تەرىم بىلتىرعىدان اسىپ تۇسەتىنىنە جانە وبلىستىڭ ەلدىڭ باستى استىق بەلدەۋى رەتىندەگى ورنىن نىعايتا تۇسەتىنىنە سەنىمدى.