4 قىركۇيەكتە بۋراباي ۇلتتىق پاركىندە «تازا ورمان» اتتى ەكولوگيالىق اكتسيا ءوتتى. ءىس-شارا ورتالىق ازيانىڭ تۇراقتى دامۋ قورى Creative Innovation Institute باستاماسىمەن, بولەكتاۋ تاۋىنا جاڭا ەكوتروپانىڭ تانىستىرىلىمى قارساڭىندا ۇيىمداستىرىلدى, دەپ حابارلايدى Egemen.kz.
ءىس-شاراعا «بۋراباي» ۇلتتىق پاركىنىڭ اكىمشىلىگى, اقمولا وبلىسى اكىمدىگىنىڭ وكىلدەرى, ششۋچينسك قالاسىنداعى ورمان شارۋاشىلىعى, ەكولوگيا جانە تۋريزم جوعارى كوللەدجىنىڭ ستۋدەنتتەرى, ايماقتىڭ تۋريستىك كومپانيالارى قاتىستى.
اكتسيا اياسىندا اۋقىمدى تازالاۋ جۇمىستارى جۇرگىزىلدى: بولەكتاۋ تاۋىنا باستايتىن جولدىڭ ەتەگىنەن شىڭىنا دەيىن جانە وعان جاقىن اۋماقتار تۇرمىستىق قالدىقتاردان تولىق تازارتىلدى. بۇل شارا «تازا قازاقستان» ۇلتتىق باستاماسىن جۇزەگە اسىرۋعا جانە ەلىمىزدىڭ تابيعي بايلىعىن ساقتاۋ ىسىنە قاتىسۋشىلاردىڭ ناقتى ۇلەسىن كورسەتتى.
ء«بىز ءۇشىن تابيعات اياسىنداعى ءاربىر قادام تەك شابىت كوزى عانا ەمەس, جاۋاپكەرشىلىكپەن دە بايلانىستى بولۋى ماڭىزدى. بولەكتاۋ — بۇل جاي عانا تۋريستىك نىسان ەمەس, ول — ءتىرى ەكوجۇيە. مۇنداي اكتسيالار تابيعاتقا قامقور بولۋدى ءومىر سالتى رەتىندە قابىلدايتىن جاڭا بۋىندى تاربيەلەۋگە كومەكتەسەدى», دەدى Creative Innovation Institute-ءتىڭ تۇراقتى دامۋ جونىندەگى ساراپشىسى الەكساندرا حاريتونوۆا.
ءىس-شاراعا ستۋدەنتتەردىڭ بەلسەندى قاتىسۋى — ەكولوگيا جانە تۋريزم سالاسىنىڭ بولاشاق ماماندارى ءۇشىن تاجىريبەلىك ساباق بولدى. بۇل — جاستار مەن جەرگىلىكتى تۇرعىندار اراسىندا تابيعاتقا قامقورلىق مادەنيەتىن قالىپتاستىرۋدىڭ جارقىن مىسالى.
«ماعان تابيعاتقا كومەكتەسۋ ەرتەگىلەردە عانا ەمەس, شىنايى ومىردە دە ۇنايدى. بولەكتاۋ جوباسىنا قاتىسىپ جاتقانىما قۋانىشتىمىن — ءبىز بىرگە الەمدى تازا ءارى ادەمى ەتىپ جاتىرمىز!», دەيدى ClimateTech-جاڭاشىل جانە ەكولوگيالىق ەرتەگىلەردىڭ اۆتورى پلاتون نەچاەۆ.
ۇيىمداستىرۋشىلاردىڭ پىكىرىنشە, مۇنداي باستامالار ەكولوگيالىق تەپە-تەڭدىكتى ساقتاۋ ءۇشىن عانا ەمەس, ازاماتتاردىڭ ەكولوگيالىق ساناسىن ارتتىرۋ ءۇشىن دە اسا قاجەت. جاقىن ارادا بولەكتاۋ ەكوتروپاسىنىڭ رەسمي تانىستىرىلىمى وتەدى — بۇل جوبا ءوڭىردىڭ ەكوتۋريستىك ينفراقۇرىلىمىنىڭ ءبىر بولىگىنە اينالماق.