وتكەن اپتانىڭ جۇماسىندا ەلىمىزدىڭ اتوم ەنەرگياسى جونىندەگى اگەنتتىگىندە الماتى وبلىسى جامبىل اۋدانىندا سالىنۋى جوسپارلانعان اتوم ەلەكتر ستانساسىنا اتاۋ بەرۋ بويىنشا جالپىحالىقتىق كونكۋرس وتكىزۋ ماسەلەلەرىن قاراعان جۇمىس توبىنىڭ ەكىنشى وتىرىسى ءوتتى, دەپ حابارلايدى Egemen.kz.
وتىرىسقا جۇمىس توبىنىڭ قۇرامىنا ەنگەن مەملەكەتتىك ورگاندار, عىلىمي ۇيىمدار مەن سالالىق كومپانيالار وكىلدەرى قاتىستى. ءىس-شاراعا اتوم ەنەرگياسى جونىندەگى اگەنتتىك توراعاسى الماسادام ساتقاليەۆ توراعالىق ەتتى. ول وتىرىستىڭ ءمان-ماعىناسى ەل تاڭداۋى ماڭىزدى ەكەنىن ايتتى.
تالقىلاۋ بارىسىندا كونكۋرستىق كوميسسيانىڭ ەرەجەسى مەن قۇرامى بەكىتىلدى. ونىڭ قۇرامىنا ءتۇرلى قوعام وكىلدەرى, كرەاتيۆتى يندۋستريا ماماندارى, سونداي-اق اتوم ەنەرگەتيكاسى, فيلولوگيا جانە تاريح سالالارىنىڭ ساراپشىلارى كىردى. بۇدان بولەك, وتىنىمدەردى بەرۋ مەن قاراۋ ءتارتىبىن, ولاردى باعالاۋ ولشەمشارتتارىن جانە قورىتىندى شەشىم قابىلداۋ راسىمدەرىن ايقىندايتىن كونكۋرستى وتكىزۋ ەرەجەسىنىڭ جوباسى قارالدى.
جۇمىس توبىنىڭ مۇشەلەرى اتوم ەلەكتر ستانساسىنىڭ اتاۋىن ايقىنداۋ شەشىمى بىرقاتار فاكتورلاردى ەسكەرە وتىرىپ قابىلداناتىنىن اتاپ ءوتتى. كونكۋرستىق كوميسسيا ۇسىنىستاردى اتاۋدىڭ تانىمالدىلىعى, تاريحي جانە مادەني ماڭىزدىلىعى, اتوم ەنەرگەتيكاسىنىڭ يميدجىنە سايكەستىگى, اۋەزدىلىگى, ەستە ساقتاۋدىڭ جەڭىلدىگى, بىرەگەيلىگى ءارى وزىندىك ەرەكشەلىگى سەكىلدى ولشەمشارتتار بويىنشا باعالايدى.
سونىمەن قاتار, قورلايتىن نەمەسە كەمسىتۋشىلىك سيپاتتاعى سوزدەردى, بەيادەپ لەكسيكانى, كوممەرتسيالىق برەندتەردى قامتيتىن, سونداي-اق قازاقستان رەسپۋبليكاسىنىڭ زاڭناماسىن جانە ءۇشىنشى تۇلعالاردىڭ قۇقىقتارىن, ونىڭ ىشىندە اۆتورلىق قۇقىقتى بۇزاتىن اتاۋلار قابىلدانبايدى.
ازاماتتاردىڭ ىقىلاستى قاتىسۋىن قامتاماسىز ەتۋ ماقساتىندا تسيفرلىق شەشىمدەردى قولدانۋ جوسپارلانۋدا. وسى ورايدا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى «ۇلتتىق اقپاراتتىق تەحنولوگيالار» اق-مەن بىرلەسىپ, وتىنىمدەردى eGov Mobile قوسىمشاسى ارقىلى قابىلداۋ جونىندە ۇسىنىستار ەنگىزدى.
وتىرىس قورىتىندىسى بويىنشا كونكۋرستىڭ نەگىزگى ۇيىمداستىرۋشىلىق قۇجاتتارى بەكىتىلىپ, ونى وتكىزۋ بويىنشا الداعى قادامدار ايقىندالدى. بولاشاق اتوم ەلەكتر ستانساسىنا اتاۋ بەرۋ جونىندەگى بايقاۋ ازاماتتاردى تارتۋدىڭ ماڭىزدى قۇرالىنا اينالىپ, ەلدىڭ مادەني جانە تاريحي قۇندىلىقتارىن ايقىنداۋعا مۇمكىندىك بەرەدى.