مەملەكەت باسشىسىنىڭ تاپسىرماسىنا سايكەس ەلىمىزدە مەديتسينالىق ينفراقۇرىلىمدى جەتىلدىرۋ جانە زاماناۋي ەمدەۋ ادىستەرىن ەنگىزۋ باعىتىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى جۇزەگە اسىرىلىپ جاتىر, دەپ حابارلايدى Egemen.kz.
دەنساۋلىق ساقتاۋ مينيسترلىگىنىڭ حابارلاۋىنشا, قازاقستان بۇگىندە الەمنىڭ جەتەكشى مەديتسينالىق ورتالىقتارىمەن تەڭ دارەجەدە بىرەگەي جانە كۇردەلى وپەراتسيالاردى ءساتتى ورىنداپ كەلەدى. جۇرەك پەن وكپەنى الماستىرۋ, سونداي-اق ۇشجاقتى ايقاسپالى بۇيرەك ترانسپلانتاتسياسى جاسالاتىن مەملەكەتتەردىڭ قاتارىندا قازاقستان بار.
ايتا كەتەيىك, مۇنداي جوعارى تەحنولوگيالىق وتالاردى جاساي الاتىن ەلدەر سانى الەم بويىنشا التىدان اسپايدى.
سونىمەن قاتار مي اۋرۋلارىن ەمدەۋ ءۇشىن «گامما-پىشاق» تەحنولوگياسى قولدانىلادى, ال ونكولوگيالىق دەرتتەردى ەمدەۋدە پروتوندىق تەراپيا ەنگىزىلىپ جاتىر.
«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جوسپارلانعان 655 مەديتسينالىق نىساننىڭ 511-ءى پايدالانۋعا بەرىلگەن.
«بۇل نىساندار بۇرىن مەديتسينالىق وبەكتىلەرمەن قامتىلماعان اۋىلداردا, سونداي-اق ەسكىرگەن جانە بەيىمدەلمەگەن ءۇي-جايلاردىڭ ورنىنا سالىنۋدا. بۇل ورتالىقتار 1 ميلليونعا جۋىق اۋىل تۇرعىندارىن مەديتسينالىق قىزمەتتەرمەن قامتيدى», دەدى دەنساۋلىق ساقتاۋ ءمينيسترى اقمارال ءالنازاروۆا.
سونداي-اق ەلىمىزدەگى 36 وبلىستىق اۋرۋحانا مەن 17 پەريناتالدىق ورتالىقتا كەشەندى جاڭعىرتۋ جۇمىستارى جۇرگىزىلىپ جاتىر. بالالار بولىمشەلەرىندەگى توسەك-ورىن سانى 38%-عا ارتقان. 2,1 مىڭنان استام مەديتسينالىق جابدىق ساتىپ الىنىپ, جاراقتاندىرۋ دەڭگەيى 62%-دان 86%-عا دەيىن وسكەن.