اباي وبلىسىنىڭ اكىمى بەرىك ءۋالي قازاقستاننىڭ ازەربايجانداعى توتەنشە جانە وكىلەتتى ەلشىسى اليم بايەلمەن كەزدەسۋ وتكىزدى. كەزدەسۋگە ازەربايجان-قازاقستان ىسكەرلىك كەڭەسى توراعاسىنىڭ ورىنباسارى, تۇركى كاسىپكەرلەر قاۋىمداستىعى باسقارماسىنىڭ توراعاسى اسلان قۇنياروۆ, سونداي-اق ازەربايجان ينۆەستيتسيالىق حولدينگى مەن ازەربايجان بيزنەسىن دامىتۋ قورىنىڭ وكىلدەرى قاتىستى, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
ازەربايجاندىق دەلەگاتسيا الاكول جاعالاۋىندا حالىقارالىق ەمدەۋ-ساۋىقتىرۋ كەشەنىن سالۋ جونىندەگى ينۆەستيتسيالىق جوبانى تانىستىردى.
ينۆەستورلار جىل بويى جۇمىس ىستەيتىن, ءبىر مەزەتتە 800 ادامعا دەيىن قابىلداي الاتىن تۋريستىك نىسان سالۋدى جوسپارلاپ وتىر. جوبانىڭ ينۆەستيتسيا كولەمى – 20 ميلليون اقش دوللارى. كەشەن پايدالانۋعا بەرىلگەننەن كەيىن شامامەن 200 جاڭا جۇمىس ورنى اشىلادى. بۇدان بولەك, بۇل جوبا ءوڭىردىڭ تۋريستىك تارتىمدىلىعىن ارتتىرىپ, جەرگىلىكتى بيۋدجەتكە تۇسەتىن سالىق تۇسىمدەرىن كوبەيتۋگە جانە مەديتسينا مەن دەمالىس توعىسىندا جاڭا كلاستەر قالىپتاستىرۋعا مۇمكىندىك بەرەدى.
«2024 جىلى قازاقستان مەن ازەربايجاننىڭ بىرلەسكەن ينۆەستيتسيالىق قورى قۇرىلدى. ەگەر الاكولدەگى جوبا جۇزەگە اسسا, ول وسى قور اياسىنداعى العاشقى جوبالاردىڭ ءبىرى بولماق», دەدى اليم بايەل.
وبلىس اكىمى بۇل تۋريستىك جوبانىڭ ءوڭىر ءۇشىن ماڭىزدىلىعىن اتاپ ءوتتى.
«قازىر الاكول تۋريستىك ايماعىنىڭ باس جوسپارى ازىرلەنىپ جاتىر. قۇرىلىسقا جەر تەلىمىن بەرۋگە دايىنبىز. اكىمدىك قاجەتتى قولداۋدى كورسەتەدى», دەپ مالىمدەدى بەرىك ءۋالي.