جاڭاارقا كەنتىندە جاس كاسىپكەر جانار ءاشىروۆا اۆتوكولىكتىڭ مايىن اۋىستىرۋعا ارنالعان تەحنيكالىق قىزمەت كورسەتۋ ورتالىعىن اشتى. اتالعان نىسان جاڭاارقا اۋدانى اكىمىنىڭ جاستارعا ارنالعان وسى جىلداعى گرانتى اياسىندا جۇزەگە اسقان.
«مەملەكەت باسشىسى 2025 جىلدى «جۇمىسشى ماماندىقتارى جىلى» دەپ جاريالادى. بۇل – ناقتى ىسكە, ەڭبەككە, كاسىپكە بەت بۇرعان جاستاردى قولداۋدىڭ ايقىن بەلگىسى. اۋدان بويىنشا 41 جاس گرانتتىق كونكۋرسقا قاتىسىپ, 20 جاس كاسىپكەر جەڭىمپاز اتاندى. سولاردىڭ ءبىرى – جانار قاسىمبايقىزى. بۇگىن اشىلىپ وتىرعان نىسان – جاس كاسىپكەردىڭ ەڭبەگى مەن ىزدەنىسىنىڭ ناتيجەسى», دەيدى اۋدان اكىمى قانات قوجىقاەۆ.
جاڭا تەحنيكالىق قىزمەت كورسەتۋ پۋنكتى كەنت تۇرعىندارىنا قولجەتىمدى ءارى ساپالى قىزمەت كورسەتۋگە باعىتتالعان.
«مەملەكەت باسشىسى قاسىم-جومارت توقاەۆ حالىققا جولداۋىندا شاعىن جانە ورتا بيزنەسكە مەملەكەت جاعداي جاساۋ كەرەك دەگەندى ۇنەمى ايتىپ كەلەدى. ءبىز ورتالىقتا كولىك موتورىنىڭ مايىن ساتامىز. مايدى ساتىپ قانا قويماي, اۋىستىرىپ بەرەمىز. مايدىڭ تۇرلەرى وتە كوپ. بارىنشا قامتۋعا تىرىسىپ جاتىرمىز. تۇتىنۋشى مايدى ساتىپ السا, تەگىن قۇيىپ بەرەمىز. اۋدان بويىنشا مۇنداي قىزمەت بىزدە عانا بار. ساپالى قىزمەت العان جولاۋشى ۋاقىتىن ۇنەمدەيدى. سونىمەن قاتار كولىككە ارنالعان ءتۇرلى اكسەسسۋار دا ساتامىز. بالالارىمەن كەلگەن جاندارعا ارنالعان دەمالىس ورنى بار. سالقىن سۋسىندار دا ۇسىنامىز», دەيدى جانار.
كاسىپكەر الداعى ۋاقىتتا كاسىپ اۋقىمىن كەڭەيتىپ, جاڭا جۇمىس ورىندارىن اشۋدى كوزدەپ وتىر.
ۇلىتاۋ وبلىسى