قازاقستاندىق كومپانيالار قىتايدان جاڭا ينۆەستورلار مەن سەرىكتەستەر تاۋىپ قايتتى

وكىنىشكە قاراي ءالى كۇنگە دەيىن «قورعاس» حشىو» اەا جەڭىلدىگىن پايدالانىپ, جاڭا ءوندىرىس ورنىن اشقان نەمەسە قىتاي نارىعىنا ەكسپورتتالاتىن ءونىم تۇرلەرى مەن ولاردىڭ كولەمىن ايتارلىقتاي ۇلعايتا العان كاسىپورىندار تۋرالى مالىمەت وتە از.

ورتالىقتىڭ قازاقستان جاعىندا ازىرگە جەكە كورمە ورتالىعى جوق. سول سەبەپتى قىتاي جاعىنداعى قىتاي-قازاق حالىقارالىق كورمە ورتالىعىندا جىل سايىن ءبىر ەمەس, بىرنەشە كورمە ۇيىمداستىرىلىپ كەلە جاتقانىمەن ونىڭ ناتيجەسى قازاقستاندىق بۇقارالىق اقپارت قۇرالدارىندا تۇراقتى تۇردە جازىلىپ, ايتىلىپ, كورسەتىلىپ جاتقان جوق. سول سەبەپتى كاسىپكەرلەر اراسىندا دا بۇل شاراعا قىزىعۋشىلىق تانىتىپ جۇرگەندەر اسا كوپ ەمەس. ەسەسىنە قاراپايىم حالىق اراسىندا «قورعاس» حشىو تۋرالى جەكە تۇتىنۋ ءۇشىن قىتاي جاعىنان 25 كەلىگە دەيىن تاۋاردى تەگىن الىپ وتۋگە بولاتىنى عانا ناسيحاتالۋدا. سوندىقتان قىتايدىڭ ەۋرازيا بويىنشا سينتسزيان حالىقارالىق كورمەلەر كومپانياسى مەن قر تۋريزم يندۋسترياسىنىڭ ۇلتتىق قاۋىمداستىعىنىڭ ۇيىمداستىرۋىمەن شىلدە ايىنىڭ 4-6 كۇندەرى «ورتالىق ازيا تارتىمدىلىعى: قورعاس – بيزنەس ءۇشىن پلاتفورما» دەگەن ۇرانمەن «ەكسپو: ورتالىق ازيا تاۋارلارى جانە ساۋدا» دەگەن كورمە وتكەنىن كوپ ادام بىلگەن جوق.

قازاقستاندا جارناماسى از بولعانىمەن بۇل كورمەگە قىتاي ۇكىمەتى ەرەكشە ءمان بەرىپ وتىر. ونى «سينتسزيان ونىمدەرى – وڭتۇستىككە, گۋاندۋن ونىمدەرى – سولتۇستىككە» دەگەن سياقتى تاقىرىپتىق كورمە ايماقتارىنان دا عانا ەمەس ولاردىڭ اياسىندا وتكەن اقپاراتتىق جيىنداردان دا اڭعارۋعا بولادى. ويتكەنى جەر كولەمى جاعىنان الەمدە العاشقى وندىقتا تۇرعان قوس مەملەكەتتە دە ايماقتاردىڭ ءبىر-بىرىمەن ءوزارا ساۋدا-ساتتىعى تولىق رەتتەلمەگەن. قايدا, قانداي ونىمدەر ءوندىرىلىپ جاتىر, ءوندىرىس ورىندارىنىڭ الەۋەتى قانداي دەگەن ساۋالعا قاتىستى ستاتيستيكالىق, اقپاراتتىق, تالدامالىق جانە تانىمدىق ماتەريالدار جەتكىلىكتى دەڭگەيدە ءبىر جۇيەگە جيناقتالماعان. سول سەبەپتى انحوي, گانسۋ, گۋاندۋن, گۋيچجوۋ, شاندۋن, شانسي, شەنسي, حەبەي, حەنان, حۋبەي, چجەتسزيان, سىچۋان, تيانتسزين, تسزيانسي, تسزيانسۋ, يۋننان, فۋتسزيان پروۆينتسيالارى مەن ىشكى موڭعوليادان جانە سينتسزيان, تيانتسزين ولكەسى مەن شانحاي, گونكونگ قالالارىنان كەلگەن 500 كومپانيانىڭ كوپشىلىگى ءوز ءونىمىن ساۋدالايتىن جاڭا نارىقتارعا كوبىرەك كوڭىل اۋداردى. توقىما ونەركاسىبى, اۋىلشارۋاشىلىق ونىمدەرى, ازىق-ت ۇلىك ونىمدەرى, كۇندەلىكتى تۇتىناتىن تاۋارلار, ماشينالار مەن ەلەكترومەحانيكالىق بۇيىمدار, كولىكتەر مەن ولاردىڭ قوسالقى بولشەكتەرى, بولات كونسترۋكتسيالار, لوگيستيكا جانە تۋريزم سياقتى سان الۋان سالاداعى ءوندىرىس ورىندارى ونى ورتالىق ازيادا كەڭەيتۋگە ەمەس, ىسكەرلىك بايلانىستى قالىپتاستىرۋعا تىرىستى.

«بۇل كورمەدە ورتالىق ازيا ەلدەرىنىڭ ىشىنەن تەك قازاقستان عانا جەكە پاۆيلونمەن قاتىستى. سونىڭ ناتيجەسىندە ءيىسسۋ, بيە مەن تۇيە سۇتىنەن جاسالعان قۇرعاق ساۋمال, بالمۇزداق, سىر سياقتى ونىمدەر جاسايتىن وتاندىق 4 ءىرى كومپانيا ءبىر ەمەس بىرنەشە ينۆەستور مەن سەرىكتەستەر تاۋىپ, الداعى ۋاقىتتا ارنايى كەلىسىمشارت جاساۋعا ۋاعدالاسىپ قايتتى. ورتالىق ازيا ەلدەرىمەن اراداعى ىنتىماقتاستىقتى نىعايتۋ ماقساتىندا ۇيىمداستىرۋشىلار ەندى بۇل شارانى داستۇرگە اينالدىرىپ, الداعى كۇزدە قايتا جالعاستىرعالى وتىر», – دەيدى قر تۋريزم يندۋسترياسى ۇلتتىق قاۋىمداستىعىنىڭ پرەزيدەنتى راۋشان شامىلقىزى.

ونىڭ ايتۋىنشا, بۇل كورمەگە ورتالىق ازيا ەلدەرىنەن بولەك, ازياداعى اۋعانستان, يران, ەگيپەت سياقتى تاعى باسقا دا ەلدەر زور قىزىعۋشىلىق تانىتۋدا. ولاردىڭ كەيبىرى بۇل شاراعا ۇيىمداستىرۋ شارالارىنىڭ قىسقا مەرزىمدە جۇرگىزگەنىنە قاراماستان ءوز ۋاكىلدەرىن جىبەرگەن. سول سەبەپتى الداعى كۇزدە وتەتىن كورمە بۇدان دا اۋقىمدى جانە قاتىسۋشىلارى ءارالۋان بولادى دەپ جوسپارلانۋدا. ماسەلەن, بۇل شاراعا شەنسي پروۆينتسياسىنداعى سيان حالىقارالىق پورتتى اۋدانى ەشكى ءسۇتى, قۇرعاق ەشكى ءسۇتى مەن ەشكى سۇتىنەن جاسالعان تابلەتكالاردى; گۋيچجوۋ پروۆينتسياسى كارتوپ ءسۇتىن, كارتوپ سۋسىنىن; چجەتسزيان پروۆينتسياسى تۇرمىستىق جانە وندىرىستىك سۋ تازارتقىشتار سياقتى بىرەگەي ونىمدەرىن ۇسىندى.

ەندى بىرەۋلەرى ەلەتر قۋاتتاعىشتاردى, روبوتتاردى, ءتۇرلى سالاداعى كولىكتەردى, ارقيلى ونىمدەر دايىندايتىن زاماناۋي قۇرال-جابدىقتاردى تانىستىردى.