شىلدەنىڭ ءۇشىنشى جەكسەنبىسى – مەتالل ءوندىرۋ جانە وڭدەۋمەن اينالىساتىن مامانداردىڭ كاسىبي مەرەكەسى. جوعارى تەحنولوگيالىق ءبىلىم مەن جاۋاپكەرشىلىكتى تالاپ ەتەتىن مەتاللۋرگتەردىڭ وزدەرى دە بولاتتاي بەرىك جاندار دەسەك, ارتىق ايتقاندىق ەمەس, دەپ جازادى Egemen.kz.
پرەزيدەنت جاريالاعان «جۇمىسشى ماماندىقتار جىلى» اياسىندا تاۋ-كەن مەتاللۋرگيا كەشەنىنىڭ ەڭبەككەرلەرىنە, ونىڭ ىشىندە مەتاللۋرگتەرگە ەرەكشە كوڭىل بولىنەدى. بيىل مەملەكەت باسشىسى العاش رەت مەتاللۋرگتەرگە ارنالعان ەكى جاڭا مەملەكەتتىك ناگرادا تاعايىنداعانى بەلگىلى. مۇنىڭ ءبارى مەتاللۋرگيا سالاسىنا دەگەن زور قۇرمەت ەكەنى ءسوزسىز.
سونداي ادال ەڭبەگىمەن, العا باسىپ كەلە جاتقان جۇمىسشى مامانداردىڭ ءبىرى – اياگوز اۋدانىنىڭ تۇرعىنى, مەتاللۋرگ التىنبەك ىسقاقوۆ. ول بۇگىندە ەلىمىزگە بەلگىلى اقتوعاي كەن بايىتۋ فابريكاسىندا جۇمىس ىستەيدى.
«مەن KAZ Minerals كومپانياسىنا قاراستى اقتوعاي كەن بايىتۋ فابريكاسىندا 2016 جىلدىڭ قازان ايىنان بەرى ەڭبەك ەتىپ كەلەمىن. 10 جىلداي بولدى. كومپانيا جۇمىسشى كادرلارعا ەرەكشە ءمان بەرەدى. بىرىنشىدەن, بوس جۇمىس بولسا, اباي وبلىسىنىڭ حالقىن جۇمىسپەن قامتۋعا تىرىسادى. ەكىنشىدەن, «تالىمگەر» دەگەن باعدارلامامەن جوعارى وقۋ ورنىن تامامداعان جاس ماماندار كومپانياعا كەلىپ, ەكى جىل تاعىلىمدامادان ءوتىپ, جۇمىسقا ورنالاسۋ مۇمكىندىگى بار. ال كەيبىر ماماندار ءبىر جىل, جارتى جىل ىشىندە شەبەرلىگىن كورسەتىپ, شتاتقا ورنالاسادى», دەيدى التىنبەك ىسقاقوۆ.
تاۋ-كەن مەتاللۋرگيا كەشەنى – ونەركاسىپتى دامىتۋدىڭ نەگىزى. تاۋەلسىزدىك جىلدارىندا بۇل سالا تۇراقتى ەكونوميكالىق وسىمگە جانە الەۋمەتتىك ءال-اۋقاتتىڭ نىعايۋىنا ىقپال ەتتى. 2024 جىلدىڭ قورىتىندىسىنا ساي ەل ەكونوميكاسىنا قوسقان ۇلەسى 6,9% بولدى. بۇگىندە سالادا 110 مىڭنان استام ادام جۇمىس ىستەيدى. ولاردىڭ كۇندەلىكتى جۇمىسى ماشينا جاساۋ, قۇرىلىس, مۇناي-گاز جانە ەنەرگەتيكا سالاسىنىڭ دامۋىنا سەرپىن بەرەدى.
«مەتاللۋرگتەر مەرەكەسىندە جۇمىس ىستەيمىز. ءوز ىشىمىزدە شاعىن مەرەكەلىك كونتسەرت وتەدى. بۇرىن كاسىبي مەرەكەمىزگە وراي سىياقى تاعايىندايتىن, قازىر شىندىعىن ايتۋ كەرەك, سىياقى جوق. بىراق كاسىپورىن ءبىرىنشى ورىندا ەڭبەك قاۋىپسىزدىگىنە كوڭىل بولەدى. «Vision Zero» نەمەسە «نۋلەۆوي تراۆماتيزم» دەگەن ارنايى باعدارلاما بار. قاۋىپسىزدىك جۇمىسشىلاردىڭ كيىمىنەن باستالادى. ءبىر كيىمدى العان سوڭ ەكى-ءۇش جىل كيمەيسىڭ, توزىعى جەتكەن سوڭ اۋىستىرۋىڭا بولادى. جارتى جىلدان كەيىن دە, نە بولماسا جىرتىلىپ قالسا, قايتا الاسىڭ. «نە ىستەسەڭ دە, مىنانى ىستە» دەگەن كوزقاراس جوق, الدىمەن جۇمىس قاۋىپسىز بولۋعا ءتيىس. كومپانيامىز مەتتاللۋرگيا سالاسىندا الدىڭعى قاتارداعى كاسىپورىن. وسىندا جۇمىس ىستەپ جاتقانىما قۋانىشتىمىن. قاتارداعى قاراپايىم جۇمىسشىدان باستاپ, باسشىلىق قىزمەتكە دەيىن كوتەرىلدىم. ەشقانداي تانىس-تامىرسىز, اعا-كوكەسىز ادال ەڭبەكپەن وسى جەتىستىككە جەتتىك», دەيدى ول.
اباي وبلىسى