«الاتاۋ اماناتى» جوباسى اياسىنداعى ۇلتتىق تاۋلى تۋريستىك سوقپاقتار جەلىسىندە ادامدار قوزعالىسى كوبەيە باستادى. وتكەن اپتادا ۇلكەن ىلە سوقپاعىنىڭ نەگىزگى بولىكتەرىمەن العاشقى قاتىسۋشىلار – قوعام قايراتكەرلەرى, جۋرناليستەر, بلوگەرلەر مەن بىلىكتى جول نۇسقاۋشىلار ءجۇرىپ ءوتتى. ولار ينفراقۇرىلىمدى تەكسەرىپ, ۇسىنىستارىن ءبىلدىرىپ, بۇل باعىتتىڭ الداعى ۋاقىتتا قازاقستاندىق ءتۋريزمنىڭ ەڭ اتاقتى جەرىنە اينالۋى مۇمكىن ەكەنىنە كوز جەتكىزدى, دەپ جازادى Egemen.kz.
«AMANAT» پارتياسى, تۋريزم جانە سپورت مينيسترلىگى, الماتى قالاسى مەن الماتى وبلىسى اكىمدىكتەرى جانە «KazAlpineClub» قاۋىمداستىعى بىرلەسە جۇزەگە اسىرعان «الاتاۋ اماناتى» جوباسىنىڭ ناقتى كەسكىنى پايدا بولا باستادى. جوبانىڭ نەگىزگى جەلىسى – ۇزىندىعى 1200 شاقىرىمنان اساتىن ۇلتتىق تۋريستىك سوقپاق. ول شارىن شاتقالىنان تاڭبالى پەتروگليفتەرىنە دەيىن سوزىلىپ, الماتى وڭىرىندەگى ەڭ ماڭىزدى تابيعي, تاريحي جانە مادەني ورىنداردى بىرىكتىرەدى. پيلوتتىق كەزەڭ اياسىندا ەكى توپ بىرنەشە نەگىزگى باعىتتى سىناقتان وتكىزدى. قاتىسۋشىلار اباتتاندىرىلعان ەكوسوقپاقتارمەن قاتار, كۇردەلى تاۋلى ترەككينگپەن دە ءجۇرىپ ءوتتى.
جۋرناليستەر, بلوگەرلەر جانە قوعام بەلسەندىلەرى كىرگەن العاشقى توپ اباتتاندىرىلعان تۋريستىك سوقپاقتارمەن جەڭىلدەتىلگەن باعىتتى ءجۇرىپ ءوتتى. ولار ساپارىن الماتى ماڭىنداعى ەڭ قولجەتىمدى تابيعي ورىنداردىڭ ءبىرى – كوپشىلىككە سارقىراماسىمەن تانىمال ايۋساي شاتقالىنان باستادى. كەيىن باعىت حەيكينگ اۋەسقويلارى اراسىندا تانىمال ۇلكەن جانە كىشى الماتى وزەندەرىنىڭ ارالىعىنداعى كوكجايلاۋ ءۇستىرتى ارقىلى جالعاستى.
قاتىسۋشىلار العاشقى كۇنى 2200 مەتر بيىكتىكتە ورنالاسقان شىمبۇلاق تاۋ كۋرورتىنداعى Shymbulak Resort Hotel قوناقۇيىندە تۇنەدى. ەكىنشى كۇنى قاتىسۋشىلار بۋتاكوۆ شاتقالىنا باعىت الدى. بۇل – ورماندى, بۇلاقتى جانە اسەم كورىنىستەرى بار تىنىش مەكەن. توپ ورمان اسۋىن كەسىپ ءوتىپ, بەسقاينار اۋىلى ماڭىنداعى گلەمپينگ ايماعىنا جەتتى, ال ءۇشىنشى كۇنى وڭىردەگى ەڭ تانىمال تاۋ تۋريستىك كەشەندەرىنىڭ ءبىرى – Oi-Qaragai كۋرورتىندا مارەگە جەتتى.
«بۇل باعىت – تاۋ اراسىمەن ءجۇرىپ وتەتىن جاي عانا كورىكتى جەر ەمەس. ول 1980-جىلدارى جىل سايىن 200 مىڭعا جۋىق ادام ءجۇرىپ وتەتىن كەڭەستىك تۋريستىك سوقپاقتارمەن ءىشىنارا سايكەس كەلەدى. بۇگىندە ءبىز بۇل جولدى جاڭا دەڭگەيدە – ساپالى ينفراقۇرىلىممەن جانە ەكولوگيالىق جاۋاپكەرشىلىكپەن قايتا جاڭعىرتا الامىز», – دەدى جۋرناليست ولەگ بەلوۆ.
Kursiv باسىلىمىنىڭ باس رەداكتورى تاتيانا نيكولاەۆا قازاقستاندىق سوقپاقتار شىتىرمان ءتۋريزمدى جاقسى كورەتىن كەز كەلگەن دەڭگەيدەگى ءتۋريستى قابىلداۋعا دايىن ەكەنىن اتاپ ءوتتى. ونىڭ ايتۋىنشا, بۇل باعىت ەلدىڭ مىقتى برەندىنە اينالۋى مۇمكىن.
وسى ۋاقىتتا ەكىنشى كۇردەلى باعىتپەن «KazAlpineClub» قاۋىمداستىعىنىڭ تاجىريبەلى نۇسقاۋشىلارى, بىلىكتى گيدتەرى مەن ەرىكتىلەرى ءجۇرىپ ءوتتى. ولار دا ايۋساي شاتقالىنان باستاپ, 2511 مەتر بيىكتىكتە ورنالاسقان ۇلكەن الماتى مۇزدى كولىنە جەتتى. كەيىن كارنيزنىي شىڭىنا (شامامەن 3300 مەتر) كوتەرىلىپ, الماتى-الاگير اسۋىن كەسىپ ءوتتى. توپ سونىمەن قاتار تاجىريبەلى ترەككەرلەر اراسىندا تانىمال, الايدا جەتۋى قيىن تەررا تاۋلى جايلاۋىنا جەتتى. جورىقتىڭ سوڭعى نۇكتەسى – الماتىنىڭ وڭتۇستىگىندە ورنالاسقان, ىستىق بۇلاقتارى مەن دەمالىس ايماقتارىمەن تانىمال الما-اراسان شاتقالى بولدى. جاڭبىر مەن بۇرشاق جاۋىپ, جەل تۇرعان قولايسىز اۋا رايىنا قاراماستان, توپ باعىتىن ءساتتى اياقتاپ, جول بويىندا تاستىڭ كومەگىمەن نۇسقاعىشتاردى ورناتىپ, تسيفرلىق كارتالاردى ناقتىلاۋ جانە ناۆيگاتسيانى جاقسارتۋ بويىنشا ۇسىنىستار بەردى.
«كارنيزنىي شىڭىنا كوتەرىلۋ – ناعىز سىناق بولدى. كارتالارداعى باعىت پەن ناقتى جولدىڭ اراسىندا ايىرماشىلىق بار. سوندىقتان تۋريستەر اداسپاۋى ءۇشىن باعىتتاعىش تاس نۇسقاعىشتاردى جول بويىندا ءوزىمىز قويدىق. بۇل جوبانىڭ شىنايى تاجىريبە ارقىلى جاسالىپ جاتقانىن كورسەتەدى», – دەدى توپ جەتەكشىسى, ينسترۋكتور كونستانتين ساپرونوۆ.
بۇگىندە جوبا اياسىندا ارنايى جابدىقتالعان كەمپينگ ايماقتارى, گلەمپينگتەر جانە تۋريستەرگە قاجەت ينفراقۇرىلىم جاساقتالعان. جاياۋ جۇرگىنشىلەرگە تاۋدا قاۋىپسىز ءارى جايلى تۇنەيتىن ورىندار ۇسىنىلىپ وتىر. قاتىسۋشىلار ايۋساي ۆيزيت-ورتالىعى مەن الماتى قالاسىنىڭ تۋريزم باسقارماسىنىڭ كورسەتكەن قولداۋىن ەرەكشە اتاپ ءوتتى.
مودەل جانە بلوگەر ولگا تيتوۆا جوبانىڭ اۋقىمى كەڭەيىپ, ەكوتۋريزم سالاسىنداعى ۇزدىك حالىقارالىق تاجىريبەمەن تولىقتىرىلعان جاعدايدا, بۇل باستاما تاۋلى مارشرۋتتار بويىنشا حالىقارالىق ستاندارتقا اينالۋى مۇمكىن ەكەنىن جەتكىزدى.
«الاتاۋ اماناتى» – بۇل تەك تۋريستىك سوقپاقتار جەلىسى عانا ەمەس. بۇل – ەكولوگيالىق سانانى قالىپتاستىرۋ, جاستاردى بەلسەندى تارتۋ, جەرگىلىكتى قاۋىمداستىقتاردىڭ دامۋىنا جول اشۋ جانە قازاقستاندا شىتىرمان تاۋلى ءتۋريزمنىڭ جاڭا ەكوجۇيەسىن قۇرۋعا نەگىزدەلگەن جوبا.
الماتى وبلىسى.