بۇگىن ۇكىمەت وتىرىسىندا ۇلتتىق بانك توراعاسى تيمۋر سۇلەيمەنوۆ تەڭگەنىڭ ايىرباستاۋ باعامىنا قاتىستى احۋالدى باياندادى. جىل باسىنان بەرى ۇلتتىق ۆاليۋتا 1 پايىزعا نىعايىپ, ءبىر اقش دوللارى ءۇشىن 519,73 تەڭگە دەڭگەيىندە قالىپتاستى, دەپ حابارلايدى Egemen.kz.
ۇلتتىق بانك توراعاسىنىڭ ايتۋىنشا, تەڭگە باعامىنا اسەر ەتۋشى فاكتورلار ىشكى جانە سىرتقى جاعدايلارعا بايلانىستى. سىرتقى جاعىنان العاندا, الەمدىك نارىقتا گەوساياسي تاۋەكەلدەرگە بايلانىستى قۇبىلمالىلىق ساقتالىپ وتىر. ساۋدا سوعىستارى مەن رەسەي ءرۋبلىنىڭ نىعايۋى دا وسى ۇدەرىستەردىڭ قاتارىندا. سونىمەن قاتار مۇناي باعاسى شامامەن ءبىر باررەل ءۇشىن $70 دەڭگەيىندە تۇراقتادى.
ىشكى فاكتورلارعا كەلسەك, جىلدىڭ العاشقى ايلارىندا يمپورت كولەمىنىڭ ازايۋى جانە ەكسپورتتاۋشىلاردىڭ سالىق تولەمدەرىنە بايلانىستى ۆاليۋتا ۇسىنىسىنىڭ ارتۋى تەڭگەگە قولداۋ كورسەتتى.
الايدا سوڭعى ۋاقىتتا, ناقتى ايتقاندا وتكەن ايدىڭ ەكىنشى جارتىسىنان باستاپ ۆاليۋتا نارىعىندا سۇرانىس ارتىپ كەلەدى. بۇعان, بىرىنشىدەن, جازعى دەمالىس ماۋسىمىنىڭ باستالۋى اسەر ەتسە, ەكىنشىدەن, بيۋدجەتتىك باعدارلامالار اياسىنداعى مەملەكەتتىك ساتىپ الۋلاردىڭ بەلسەندى ءجۇرۋى زاڭدى تۇلعالار تاراپىنان شەتەل ۆاليۋتاسىنا دەگەن سۇرانىستى ۇلعايتقان.
«جالپى العاندا, سىرتقى ورتا – تۇراقتى, ال ىشكى فاكتورلار ماۋسىمدىق سيپاتقا يە. بۇل جاعدايدا تەڭگە باعامىنىڭ ايتارلىقتاي وزگەرۋىنە نەگىز جوق. ۇلتتىق بانك تەڭگەرىمسىزدىكتىڭ جينالۋىنا جول بەرمەيتىن يكەمدى باعام ساياساتىن جالعاستىرا بەرەدى», دەدى تيمۋر سۇلەيمەنوۆ.
وتىرىس بارىسىندا تەڭگەنىڭ قازىرگى دەڭگەيى مەن نارىقتاعى جاعداي تۇراقتى دەپ باعالانىپ, ماكروەكونوميكالىق تەپە-تەڭدىكتى ساقتاۋ باعىتىنداعى ساياسات ءوز جالعاسىن تاباتىنى ايتىلدى.