جامبىل اتىنداعى قازاق مەملەكەتتىك اكادەميالىق فيلارمونياسىنىڭ ۇلكەن زالىندا 20 اقپان كۇنى كورەرمەندى ەرەكشە مۋزىكالىق ءھام پسيحولوگيالىق ساياحاتقا جەتەلەيتىن تاريحي وقيعا – فرانتسۋز كومپوزيتورى فرانسيس پۋلەنكتىڭ ايگىلى «ادام داۋىسى» مونووپەراسىنىڭ قازاق تىلىندەگى تۇساۋكەسەرى وتەدى, دەپ جازادى Egemen.kz.
فرحات مولداعاليەۆ رەجيسسەرلىك ەتكەن قويىلىمنىڭ باستى ەرەكشەلىگى – حح عاسىرداعى وپەرا ونەرىنىڭ جاۋھارى ءبىر عانا كەيىپكەردىڭ تاعدىرى مەن ىشكى ارپالىسى ارقىلى ساراپتالۋىندا. ايتۋلى مونووپەرا جان كوكتونىڭ پەساسى نەگىزىندە جازىلعان. ءبىر كەيىپكەردىڭ سەزىم الەمىن اشا وتىرىپ, تۋىندى كورەرمەنگە جالعىزدىق, ماحاببات, ءۇمىت پەن قوشتاسۋ سياقتى تەرەڭ ەموتسيونالدى كۇيدەردى سەزىندىرەدى. پۋلەنكتىڭ مۋزىكاسى ءمىنسىز پسيحولوگيالىق ۇيلەسىم مەن نازىك درامالىق شيەلەنىستى ۇيلەستىرە وتىرىپ, تىڭداۋشىنى كەيىپكەردىڭ ىشكى ويلارىنا جەتەلەيدى. ءار نوتاسى مەن ءار دەمى ادامنىڭ رۋحاني كۇرەسىن, ءومىر مەن ءولىم اراسىنداعى نازىك شەكارانى كورسەتەدى.
«تولىق ادام. وي تولعاۋ. حاكىم اباي» مونووپەراسى
ساحناداعى درامالىق وبرازدى قازاقستاننىڭ ەڭبەك سىڭىرگەن قايراتكەرى ءداريا ءجۇسىپ سومدايدى. ول تەك اكتەرلىك شەبەرلىگىن عانا ەمەس, ۆوكالدىق مۇمكىندىگىن دە ءدال وسى قويىلىم ارقىلى كورەرمەنىنە تارتۋ ەتەدى. ونىڭ ورىنداۋىنداعى درامالىق باي داۋىس بوياۋى مەن ەموتسيالىق دەم كورەرمەندى كەيىپكەردىڭ ىشكى دۇنيەسىنە تەرەڭ بويلاتارى ءسوزسىز. وپەراعا قانات وماروۆ ديريجەرلىك ەتسە, ت.ابدىراشەۆ اتىنداعى قازاق مەملەكەتتىك اكادەميالىق سيمفونيالىق وركەسترى مۋزىكامەن سۇيەمەلدەپ, تۋىندىنىڭ كوركەمدىك دەڭگەيىن ارتتىرادى.
جۇزجىلدىق داۋىس جاڭعىرىعى
قويىلىمنىڭ قازاق تىلىندە ساحنالانۋى – وتاندىق ونەر ءۇشىن ۇلكەن جاڭالىق. كورەرمەن كلاسسيكالىق تۋىندىنى انا تىلىندە تىڭداپ, كەيىپكەردىڭ ىشكى دۇنيەسىن ءتۇسىنىپ, ەموتسيالىق بايلانىس ورناتا الادى. بۇل قازاق وپەرا ونەرىن جاڭا دەڭگەيگە كوتەرىپ قانا قويماي, تىڭدارمانىنا شىنايى سەزىم مەن ەستەتيكالىق ءلاززات سىيلارى ءسوزسىز.