UAE SWAT Challenge حالىقارالىق ءتۋرنيرىنىڭ ءۇشىنشى كۇنى قازاقستان كوماندالارى ەلگە ەرەكشە قۋانىش سىيلادى. «وفيتسەردى قۇتقارۋ» تاپسىرماسى بويىنشا بارلىق ءۇش جۇلدەلى ورىن قازاقستان وكىلدەرىنە بۇيىردى, دەپ حابارلايدى Egemen.kz.
«Kazakhstan A» كومانداسى بۇل كەزەڭدى رەكوردتىق ۋاقىت – 2 مينۋتتا ورىنداپ, تۋرنيرلىك كەستەدە كوش باستادى. ەكىنشى ورىندى «Kazakhstan B» يەلەنسە, قولا جۇلدە «Kazakhstan C» كومانداسىنا بۇيىردى.
سونىمەن قاتار تاعى ەكى قازاقستاندىق كوماندا ۇزدىك 20-لىقتىڭ قاتارىنا كىردى. «Kazakhstan D» 19-ورىندا تۇر, ال ودان كەيىن «Tomiris» قىزدار كومانداسى ورنالاسقان. ايەلدەر كومانداسى وزدەرىنىڭ ەڭ ۇزدىك ناتيجەسىن قايتالاپ قانا قويماي, بىرقاتار ەر قۇراماسىنان دا جوعارى ناتيجە كورسەتتى.
ءۇش كەزەڭنىڭ قورىتىندىسى بويىنشا «Kazakhstan C» كومانداسى جالپى ەسەپتە ءبىرىنشى ورىندى بەرىك ۇستاپ تۇر. ەكىنشى ورىندا – «Kazakhstan A» كومانداسى.
وسىلايشا, قازاقستاندىق ارنايى جاساق 48 ەلدەن كەلگەن 109 كوماندا باق سىناپ جاتقان ەليتالىق حالىقارالىق تۋرنيردە كوش باستاپ كەلەدى.
ايتا كەتەيىك, الدا UAE SWAT Challenge سايىسىنىڭ تاعى ەكى كەزەڭى بار.
ايتا كەتەيىك, قازاقستان ارنايى ماقساتتاعى بولىمشە كوماندالارى UAE SWAT Challenge (دۋباي, ءباا) حالىقارالىق ءتۋرنيرىن جەڭىسپەن باستاعانىن حابارلاعان ەدىك.