الەۋمەتتىك تۇيتكىل تالقىلاندى

«Amanat» پارتياسىنىڭ سايلاۋالدى باعدارلاماسى نەگىزىندە قۇرىلعان ورتالىق العاشىندا 70 ورىنعا عانا ەسەپتەلگەن. ال قازىر ءبىر مەزەتتە 120 زەينەتكەردى قابىلداۋعا قاۋقارلى. عيماراتتىڭ جالپى اۋماعى – 3 699,9 شارشى مەتر. مۇندا تازا اۋادا سەرۋەندەۋگە ارنالعان اۋلا, كوگالداندىرىلعان الاڭدار, ورىندىقتار, سۋبۇرقاق جانە شاعىن ساياباق قاراستىرىلعان.

سونداي-اق مەكەمەدە دەمالۋشىلار مەديتسينالىق جانە الەۋمەتتىك قىزمەتپەن تولىق قامتىلادى. ءار زەينەتكەر دارىگەر قابىلداۋىنان ءوتىپ, دەنساۋلىعىنا قاراي ارنايى ەمدىك شارالار قابىلدايدى. ماسەلەن, فيزيوتەراپيا, سۋمەن ەمدەۋ, ەلەكترماگنيتتى تەراپيا, دارىلىك ءشوپ تۇنبالارىمەن ەمدەۋ, سالاماتتى ءومىر سالتىن ۇستانۋعا ارنالعان تاڭعى ەمدىك جاتتىعۋلار, ارنايى ترەناجەر زالدارى مەن تۇزدى شاحتا.

دەپۋتات دانابەك يسابەك مەكە­مەنىڭ جۇمىسىمەن جان-جاقتى تا­نىسقان سوڭ, قىزمەت ساپاسىنا وڭ باعاسىن بەردى. قاريالارمەن جۇزدەسىپ, حال-جاعدايىن دا سۇرادى.

«بۇل – حالقىمىزدىڭ, اسىرەسە قارتتارىمىزدىڭ سالاماتتى عۇمىر كەشۋىنە ىقپال ەتەتىن ماڭىزدى باستاما. قاريالارعا جان-جاق­تى جاعداي جاسالعان مۇنداي ورتا­لىقتار ەلىمىزدىڭ باسقا وڭىرلەرىندە دە ۇلگى بولارلىق», دەدى د.يسابەك.

ءوز كەزەگىندە دەمالۋشىلار ورتالىقتىڭ قىزمەتىنە ريزاشى­لىقتارىن ءبىلدىرىپ, العىستارىن جەتكىزدى.

«مۇندا بارلىق جاعداي جا­سالعان. دەنساۋلىعىنا شيپا ىزدەگەن ءبىز سياقتى قاريالار ءۇشىن تاپتىرماس ورىن. وسىنداي قامقورلىق ءۇشىن ازاماتتارعا العىسىمدى بىلدىرەمىن», دەدى ورتالىقتا دەمالىپ جاتقان رايسا قالماعامبەتوۆا.

«ىزەتتى زەينەتكەر» ورتا­لىعىنا جولداما الۋ ۇدەرىسى تولىق تسيفرلاندىرىلعان. زەي­نەت­كەرلەر geo-shym.kz پورتالى ارقىلى ەلەكتروندىق تسيفرلىق قولتاڭ­بامەن تىركەلىپ, ونلاين ءوتىنىم بەرە الادى. ءوتىنىش بەرگەننەن كەيىن كەزەكتى ەلەكتروندىق جۇيە ارقىلى باقى­لاۋعا مۇم­كىندىك بار.

ال پاۆلودار وبلىسىنا جۇمىس ساپارى اياسىندا «Amanat» پارتياسىنان سايلانعان ءماجىلىس دەپۋتاتتارى نۇرجان اشىمبەتوۆ, ۆەرا كيم جانە جارقىنبەك امانتاي قانىش ساتباەۆ اتىنداعى كانالدىڭ №2 سورعى ستانساسىنداعى ەلەكترمەحانيكالىق جابدىقتى جاڭعىرتۋ بارىسىن باقىلادى. 50 جىلدان اسا پايدالانىلىپ كەلگەن كانال جابدىقتارى ەسكىرگەن. بۇ­گىندە ەنەرگەتيكالىق جانە گيدرومەحانيكالىق جابدىقتاردى جاڭعىرتۋ اياسىندا №1 سورعى ستانساسىنىڭ رەكونسترۋكتسياسى باستالدى. سونداي-اق بيىل بەس جاڭا سورعى اگرەگاتىن جەتكىزۋ ماق­ساتىمەن «ۋرالگيدروماش» اكتسيو­نەرلىك قوعامىمەن كەلىسىم­شارت جاسالعان. 2028 جىلعا دەيىن 19 گيدروجابدىقتى اۋىستىرۋ جوس­پارلانىپ وتىر.

«ۇزاق جىلدار بويى شەشىمىن تاپپاي كەلە جاتقان ماڭىزدى ماسەلە بار. كانال جابدىقتارىنىڭ 90 پايىزدان استامى توزعان, كەيبىر سورعى اگرەگاتتارىن شۇعىل اۋىس­تىرۋ قاجەت. مىسالى, بيىل جانە كەلەسى جىلى قۇنى شامامەن

11 ملرد تەڭگە بولاتىن بەس سورعى اگرەگاتىن اۋىستىرۋ جوسپارلانعان. قاراجاتتىڭ ءبىر بولىگى ءبولىندى, الايدا بۇل جەتكىلىكسىز. تاعى 14 سورعى ءۇشىن قوسىمشا قارجى قا­جەت», دەدى ۆ.كيم.

ن.اشىمبەتوۆ وسىعان دەيىن نىساندا جۇرگىزىلگەن جۇمىس ساپاسىز بولعانىن اتاپ ءوتتى. 2023 جىلى №2 سورعى ستانساسىندا ورىن العان ءىرى اپات جابدىقتاردىڭ قاتتى توزعانىن, شۇعىل جاڭعىرتۋدى قاجەت ەتەتىنىن كورسەتتى. دەپۋتات­تاردىڭ باستاماسىمەن بۇل ما­سەلە رەسپۋبليكالىق دەڭگەيدە كوتەرىلدى. بۇگىندە كانالدىڭ رەكونسترۋكتسياسىنا بيۋدجەتتەن 12 ملرد تەڭگەدەن اسا قاراجات بو­لىنگەن.

دەپۋتات ج.امانتايدىڭ ايتۋىنشا, كانالدىڭ سۋى تەك ونەركاسىپ پەن اۋىل شارۋاشى­لىعىن عانا ەمەس, سونداي-اق ەل­ورداداعى سۋ تاپشىلىعى ماسەلەسىن شەشۋگە دە ىقپال ەتە الادى. ءماجىلىس دەپۋتاتتارى جوبانىڭ ورىندالۋىن جانە ونىڭ تۇراقتى قارجى­لاندىرىلۋىن باقىلاۋدا ۇستاي­تىنىن جەتكىزدى.