اباي وبلىسى گەولوگيالىق بارلاۋ كوللەدجىندە مەكتەپ وقۋشىلارىنا ارنالعان جاس گەولوگتەردىڭ ەكىنشى رەسپۋبليكالىق وليمپياداسىنىڭ اشىلۋ سالتاناتى بولدى. جارىس 8-15 شىلدە ارالىعىندا كوللەدج بازاسىندا جانە قاراۋىل شوقى وقۋ پوليگونىندا وتەدى.
جاس گەولوگتەر وليمپياداسى گەولوگيا كوميتەتىنىڭ قولداۋىمەن «جاس گەولوگ» كورپوراتيۆتىك قورى مەن گەولوگيالىق بارلاۋ كوللەدجىنىڭ ۇيىمداستىرۋىمەن وتكىزىلىپ جاتىر. جارىستىڭ دەمەۋشىلەرى – Kazakhmys, ERG, Kazzinc, Yer-Tai, گەوكەن, «الەل» قارجى-ينۆەستيتسيالىق كورپوراتسياسى, «ەمبىمۇنايگاز», «ProLabSupport» جانە «Solidcore Resources» كومپانيالارى.
وليمپيادانىڭ اشىلۋ سالتاناتىندا دەمەۋشىلەردىڭ ءبىرى «Kazakhmys Barlau» كومپانياسى اتقارۋشى ديرەكتورى قادىرجان قاۋلداشەۆ جارىستىڭ باستى ماقساتى جاس گەولوگتەردى قولداۋ ەكەنىن جەتكىزدى.
ء«بىز وسى سايىستى وتكىزە باستاعان كەزدە ەلىمىزدە نەبارى جەتى-سەگىز كوماندا عانا بولاتىن. قازىر ولاردىڭ سانى جيىرمادان استى. بۇگىندە ولار ءتىپتى حالىقارالىق وليمپيادالاردا جۇلدە الىپ ءجۇر. وليمپيادانىڭ ماقساتى – جاستاردى ەرتە كاسىپتىك باعدارلاۋ, وقۋشىلاردىڭ گەولوگيا عىلىمدارىن وقۋعا دەگەن قىزىعۋشىلىعىن, گەولوگيانى عىلىم رەتىندە جانە ونىڭ قولدانبالى ماڭىزدىلىعىن ارتتىرۋ, دارىندى بالالاردى انىقتاپ, ولاردى قولداۋ, وقۋشىلاردىڭ نازارىن گەوەكولوگيا جانە جەر قويناۋىن قورعاۋ ماسەلەلەرىنە اۋدارۋ. سوندىقتان بارشا قاتىسۋشىلارعا ساتتىلىك تىلەيمىز», دەدى كومپانيا وكىلى.
جارىس قورىتىندىسىندا جەكەلەگەن پاندەردە جەڭىسكە جەتكەن وقۋشىلار Satbayev University, قازاقستان-بريتان تەحنيكالىق ۋنيۆەرسيتەتى, س. وتەباەۆ اتىنداعى اتىراۋ مۇناي جانە گاز ۋنيۆەرسيتەتى, ءا.ساعىنوۆ اتىنداعى قاراعاندى تەحنيكالىق ۋنيۆەرسيتەتى سىندى جەتەكشى جوعارى وقۋ ورىندارىنىڭ ءبىلىم گرانتتارىنا يە بولاتىنى دا ايتىلدى.
«جاس گەولوگتەر وليمپياداسى – بولاشاق مامانداردى دايارلاۋعا جول اشاتىن كاسىبي الاڭ عانا ەمەس, سونىمەن بىرگە وسكەلەڭ ۇرپاققا تۋعان جەرگە دەگەن سۇيىسپەنشىلىك پەن پاتريوتتىق سەزىم قالىپتاستىراتىن تاعىلىمدى باستاما. وعان ەلىمىزدىڭ 15 وڭىرىنەن 180 تالاپكەر قاتىسىپ جاتىر. قاتىسۋشىلار پالەونتولوگيا, مينەرالوگيا جانە پەتروگرافيا, ماگنيتومەتريا, گيدروگەولوگيا, گەولوگيالىق قيما جاساۋ, مۇناي مەن گازدى ىزدەۋ, دالا جاعدايىندا تۇراق ۇيىمداستىرۋ جانە ءشليحتى سىناۋ سەكىلدى باعىتتار بويىنشا باق سىنايدى», دەيدى ۇيىمداستىرۋشىلار.
جارىستىڭ ادىلقازىلار القاسىنىڭ قۇرامىنا گرانتتىق باعدارلاماعا قاتىسۋشى جوعارى وقۋ ورىندارىنىڭ بەدەلدى پروفەسسورلارى مەن بىلىكتى وقىتۋشىلارى, سونداي-اق «Kazakhmys Barlau», «Qazaq Geophysics» جانە «ERG» كومپانيالارىنىڭ جەتەكشى ماماندارى بار.
«قازىلار القاسى Satbayev University, قازاقستان-بريتان تەحنيكالىق ۋنيۆەرسيتەتى, سەمەي قالاسىنىڭ گەولوگيالىق بارلاۋ كوللەدجىنىڭ وقىتۋشىلار قۇرامىنان جاساقتالدى. سايىس قورىتىندىسى بويىنشا ەڭ ۇزدىك جاس گەولوگتەر كومانداسى انىقتالادى. سونداي-اق وسى وليمپيادا اياسىندا ۇزدىك جاس گەولوگتەردىڭ دە ەسىمدەرىمەن تانىساتىن بولامىز. وليمپيادا 15 شىلدەگە دەيىن جالعاسادى. جەڭىمپازدار ەلىمىزدىڭ ەڭ ۇزدىك جوو-لارى مەن كوللەدجدەرىندە وقۋ گرانتتارىن يەلەنەدى. وليمپيادانىڭ جابىلۋ ءراسىمى 14 شىلدەگە جوسپارلانعان», دەيدى باس تورەشى نۇرعانىم ەسىمحانوۆا.
ۇيىمداستىرۋشىلاردىڭ ايتۋىنشا, بۇل – ءبىلىم بايگەسى عىلىم سالاسىندا جاستاردىڭ تانىلۋىنا تاپتىرماس مۇمكىندىك. بايقاۋىمىزشا, جارىسقا قاتىسقان جاستاردىڭ كوبى اتالعان وليمپياداعا ەكىنشى رەت قاتىسىپ وتىر ەكەن. سولاردىڭ ءبىرى – جەتىسۋلىق اقجول بولات.
«وسى ەكىنشى رەسپۋبليكالىق جاس گەولوگتەر وليمپيادادا سەگىز ءتۇرلى جارىس بولادى, سول سەگىز جارىستىڭ مەن مۇناي مەن گاز ىزدەۋ جانە مينەرالوگيا جارىستارىنا قاتىسامىن. بۇل وليمپيادا – ءبىلىم دەڭگەيىمىزدى شىڭداي تۇسەتىن ەڭ ماڭىزدى سايىس. سوندىقتان بارشا قاتىسۋشىلارعا ساتتىلىك تىلەيمىن», دەيدى ول.
اباي وبلىسى