قر پارلامەنتى ءماجىلىسى دەپۋتاتى, “اق جول” پارتياسى توراعاسىنىڭ ورىنباسارى قازىبەك يسا قوستاناي وبلىسىنا جۇمىس ساپارىمەن بارىپ, بىرقاتار اۋدانداردا تۇرعىندارمەن كەزدەستى. ساپار بارىسىندا ول جەرگىلىكتى حالىقتىڭ الەۋمەتتىك-تۇرمىستىق جاعدايىمەن تانىسىپ, وزەكتى ماسەلەلەرىن تىڭدادى, دەپ جازادى Egemen.kz.
تورعاي وڭىرىنە ساپارىندا قازىبەك يسا ءبىرتۋار تۇلعا, الاش قوزعالىسى جەتەكشىلەرىنىڭ ءبىرى, اقىن-اعارتۋشى مىرجاقىپ دۋلات ۇلىنىڭ 140 جىلدىعىنا بايلانىستى الدىمەن جانگەلدى اۋدانى بيدايىق اۋىلىنا بارىپ, ۇلت كوسەمى كەسەنەسىنە تاعزىم ەتىپ, قۇران باعىشتادى. بۇدان سوڭ قازىرگى ۋاقىتتا بوي كوتەرىپ جاتقان مۇراجاي قۇرىلىسىمەن تانىستى. بۇل نىسان ۇلت كوسەمىنىڭ ءومىرى مەن ەڭبەگىنە ارنالعان تاريحي-مادەني ورتالىققا اينالماق.
سونىمەن قاتار, ءماجىلىس دەپۋتاتى بيدايىق اۋىلىنىڭ تۇرعىندارىمەن كەزدەستى.
اۋىل تۇرعىندارى كوتەرمە جولداردىڭ ساپاسى, ىشكى كوشەلەرگە اسفالت توسەۋ, ينتەرنەت پەن ۇيالى بايلانىستىڭ السىزدىگى سەكىلدى ماسەلەلەردى كوتەردى.
- كوتەرىلگەن بارلىق ماسەلە ءبىزدىڭ ءجىتى نازارىمىزدا. بۇل تۇرعىنداردىڭ تۇرمىس ساپاسىنا تىكەلەي اسەر ەتەتىن ماڭىزدى تۇيتكىلدەر بولعاندىقتان, ءتيىستى مەملەكەتتىك ورگاندارعا جولدانىپ, ءوز دەڭگەيىندە شەشىمىن تابۋى ءۇشىن باقىلاۋعا الىنادى, – دەدى قازىبەك يسا.
ساپار اياسىندا دەپۋتات اقكول اۋىلىنا ارنايى بارىپ, ۇلت ۇستازى احمەت بايتۇرسىن ۇلىنىڭ كەسەنەسىنە تاعزىم ەتتى. سونىمەن قاتار اۋىلدىق مۇراجاي جۇمىسىمەن تانىسىپ, جەرگىلىكتى تۇرعىندارمەن كەزدەستى. جيىندا اۋىلىشىلىك جولداردىڭ جاي-كۇيى, بايلانىس جەلىسىنىڭ السىزدىگى, الەۋمەتتىك نىسانداردىڭ جاعدايى ءسوز بولدى.
اۋىل ارداگەرى ابسالىق اقساقال ارقالىقتا سالىنار اۋەجايعا الاش كوسەمى مىرجاقىپ دۋلات ۇلىنىڭ ەسىمىن بەرۋ جونىندە ءسوز قوزعادى. قازىبەك يسا بۇل باستامانى ءوزىنىڭ ۇكىمەتكە جاساعان دەپۋتاتتىق ساۋالىندا كوتەرگەنىن, سوندىقتان, ارداگەرلەر ۇسىنىسىن قۋانا قولدايتىنىن ءبىلدىردى.
قازىبەك يسا سونىمەن قاتار امانگەلدى اۋدانىنا بارىپ, بەلگىلى قايراتكەر, جيھانكەز مەتسەنات ساپار ىسقاق ءوز قارجىسىنا تۇرعىزىپ جاتقان “ ۇلى دالا تۇلعالارى” كەشەنىن ارالاپ كوردى. وسىندا اۋداننىڭ ارداگەرلەرىمەن كەزدەستى. ولاردىڭ ەل جايى, جەر جايۆنا بايلانىستى ماڭىزدى ۇسىنىس-تىلەكتەرىنىڭ پارلامەنتتە قوزعالاتىنىن جەتكىزدى. اۋدان ورتالىعىنداعى ۇلت-ازاتتىق كوتەرىلىس كوسەمى امانگەلدى يمانوۆتىڭ سۇيەگى جەرلەنگەن الاڭدا باتىردىڭ ەسكەرتكىشىگە قۇران وقىدى. مادەنيەت سالاسى قىزمەتكەرلەرىنىڭ ۇسىنىستارىن تىڭداپ, نازارعا الاتىنىن ايتتى.ارقالىققا بارا جاتقان جولدا حالىق باتىرى كەيكىنىڭ كەسەنەسىنە ارنايى ات باسىن بۇرىپ, دۇعا باعىشتادى.
ارقالىققا ات ارىتىپ جەتكەن قازىبەك يسا ەندى باستالىپ جاتقان قر پرەزيدەنتى ق.توقاەۆتىڭ ۇلتتىق قۇرىلتايدا جاريالاعان استانا-ارقالىق-تورعاي-ىرعىز جولدارىن قوساتىن “ورتالىق-باتىس” كۇرە جولىنىڭ جاعدايىمەن تانىستى.
ارقالىق قالاسىندا سالىنىپ جاتقان جاڭا اۋەجايدىڭ ورنىن بارىپ, جوبا مالىمەتتەرىمەن تانىستى. 1992 جىلى توقتاپ قالعان اۋەجاي قايتا جانداناتىن بولادى.
بۇدان سوڭ قازىبەك يسا ارقالىقتاعى “جايلى مەكتەپ” جوباسىمەن سالىنعان #7 جالپى مەكتەپكە بارىپ, ارالاپ كوردى.
سونىمەن قاتار ى.التىنسارين اتىنداعى ۋنيۆەرسيتەتكە بەرىلەتىن, ستۋدەنتتەر سانىن ەكى ەسە كوبەيتۋگە جاعداي جاسايتىن بۇرىنعى اۋىل شارۋاشىلىق باسقارماسىنىڭ كوپ قاباتتى ۇلكەن عيماراتىنىڭ كۇردەلى جوندەۋ جۇمىستارى جوسپارىمەن تانىستى. قالاداعى بۇرىنعى “گورنياك” مادەنيەت ءۇيىنىڭ جاڭادان اشىلاتىن زاماناۋي مادەنيەت سارايىنا اينالدىرۋ جوباسىنىڭ قۇرىلىسىن كوردى.
ءۇش كۇندىك جۇمىس ساپارىنىڭ سوڭىندا قازىبەك يسا قوستاناي قالاسىنداعى وبلىستىق «قوستاناي تاڭى» گازەتىنىڭ رەداكتسياسىنا بارىپ, شىعارماشىلىق ۇجىممەن جانە وڭىرگە بەلگىلى قالامگەر-جۋرناليستەرمەن جۇزدەستى.
دەپۋتات باق-تىڭ قوعامداعى ورنى مەن ەلدىك مۇددەنى قورعاۋداعى رولىنە توقتالىپ, اقپارات سالاسىندا ەڭبەك ەتىپ جۇرگەن ماماندارعا تابىس تىلەدى.قازىبەك يسا ساپار قورىتىندىسى بويىنشا كوتەرىلگەن ماسەلەلەردى ءماجىلىس قابىرعاسىندا كوتەرىپ, قۇزىرلى ورگانداردىڭ قاراۋىنا ۇسىناتىنىن جەتكىزدى.
قازىبەك يسامەن بىرگە قوستاناي وبلىسى اكىمىنىڭ ورىنباسارى باقىتجان نارىمبەتوۆ, «اق جول» پارتياسىنىڭ قوستاناي وبلىستىق فيليالى باسشىلارى ەرىپ ءجۇردى.