اسىرەسە بانك سەكتورى مەن قارجىلىق تەحنولوگيا سالاسىندا ءونىم ديزاينەرىنىڭ ءرولى بارعان سايىن كۇشەيىپ جاتىر. سەبەبى قارجى – سەنىمگە قۇرىلعان سالا, ال سەنىم ينتەرفەيستەن باستالادى. ديزاينەر دەسە, كوپشىلىك ونىڭ تەك سۋرەت سالىپ, تۇستەر مەن شريفتەردى تاڭداۋمەن اينالىساتىنىن ەلەستەتەدى. الايدا ءونىم ديزاينەرىنىڭ جۇمىسى الدەقايدا اۋقىمدى ءارى ستراتەگيالىق مانگە يە. ول پايدالانۋشى تاجىريبەسىن (UX) زەرتتەپ, سول نەگىزدە ينتەرفەيستى (UI) ازىرلەيدى. سونىمەن قاتار تۇتىنۋشى مىنەز-قۇلقى, نارىقتاعى ترەندتەر, باسەكەلەستەر, بيزنەس ماقساتتار بارلىعى وسى ماماننىڭ شەشىمدەرىنە اسەر ەتەدى.
فينتەح – ەڭ جاۋاپتى باعىت
«Wildberries» ءونىم ديزاينەرى جانە «Tinkoff» بانكىنىڭ جوبالارىندا جۇمىس ىستەگەن ادەلينا ۋرجانوۆامەن اڭگىمەلەستىك. ايتۋىنشا, قولدانۋشى ءموبيلدى بانكينگتە ءبىر عانا باتىرمانى باسىپ شوت اشادى نەمەسە اقشا اۋدارادى. بىراق سول باتىرمانىڭ ءتۇسى, فورماسى, ءماتىنى, ورنالاسۋى – ءونىم ديزاينەرىنىڭ زەرتتەۋى مەن شەشىمىنە تىكەلەي بايلانىستى. ول شەشىمدەر ادەمىلىك ءۇشىن ەمەس, ناقتى ناتيجە ءۇشىن قابىلدانادى.
– فينتەحتە ديزاين تارتىمدىلىعىمەن عانا شەكتەلمەيدى. ول ناقتى ەرەجەلەرگە باعىنادى: قاۋىپسىزدىك, تۇسىنىكتىلىك, زاڭدىلىق. ءار باتىرما مەن ينتەرفەيس ەلەمەنتى كليەنتتىڭ قارجىلىق ارەكەتىنە اسەر ەتەدى. سول سەبەپتى, ءونىم ديزاينەرى مۇندا تەك UX/UI مامانى ەمەس, سونىمەن قاتار قارجىلىق مادەنيەتتى دە بىلەتىن, زاڭمەن جۇمىس ىستەي الاتىن, كۇردەلى مالىمەتتەردى قاراپايىم تىلمەن جەتكىزە بىلەتىن ساراپشى بولۋى كەرەك. قارجى سالاسىندا ءاربىر قاتە – ناقتى قارجىلىق شىعىن. سوندىقتان كۇردەلى تەرميندەردى دە تۇسىنىكتى تىلمەن ۇسىنۋعا تىرىسامىز. بۇل ۇدەرىستە UX رەداكتورلارمەن, زاڭگەرلەرمەن تىعىز جۇمىس ىستەيمىز. سونداي-اق جاقسى UX ءونىمنىڭ مونەتيزاتسياسىنا دا وڭ اسەر ەتەدى. قولدانۋشى ينتەرفەيستى وڭاي ءتۇسىنىپ, ءوز ارەكەتىن باقىلاۋدا ۇستاي السا, اقىلى قىزمەتتەردى پايدالانۋعا دا سەنىممەن بارادى, – دەيدى ول.
ورتاشا جالاقى – 1 220 000 تەڭگە
«Ronin Studio» نەگىزىن قالاعان جاس ءونىم ديزاينەرى قۋانىش امانعاليدىڭ سوزىنشە, ءونىم ديزاينەرى – كومانداداعى ەڭ كەشەندى ويلايتىن مامان.
– ءونىم ديزاينەرى جاي سۋرەتشى ەمەس, ول – جارتىلاي ماركەتولوگ, جارتىلاي كاسىپكەر, كەيدە كوپيرايتەر. ياعني ول ادەمى ەتۋ ءۇشىن عانا ەمەس, پايدا اكەلۋ ءۇشىن جۇمىس ىستەيدى. ءبىز باتىرمانىڭ ءتۇسىن نەمەسە ءماتىنىن كەزدەيسوق تاڭدامايمىز – ول شەشىمدەردىڭ ارتىندا زەرتتەۋ, لوگيكا جانە بيزنەس-ماقسات تۇرادى. مىسالى, كەيدە تەك ءتۇستى وزگەرتۋ ارقىلى-اق قولدانۋشىلاردىڭ ارەكەت ەتۋ دەڭگەيىن 20–30%-عا دەيىن كوتەرۋگە بولادى, – دەيدى قۋانىش.
ونىڭ ايتۋىنشا, ءونىم ديزاينىندا ۆيزۋال ماڭىزدى بولعانىمەن, پايدالانۋشى تاجىريبەسى دە ءرول وينايدى. قولدانۋشىعا ءونىم تۇسىنىكتى ءارى ىڭعايلى بولماسا, ول ادەمى بولعانىمەن دە پايدالانىلمايدى. «Kolesa Group» زەرتتەۋىنە سۇيەنسەك, وتاندىق ديزاينەرلەردىڭ 39%-ى IT-كومپانيالاردا, 18%-ى قارجى جانە بانك سەكتورىندا جۇمىس ىستەيدى. بۇل ءونىم ديزاينەرىنىڭ قازىرگى نارىقتا اسا قاجەت ەكەنىن كورسەتەدى. ەڭ بەلسەندى وڭىرلەر – الماتى (66%) جانە استانا (20%). ديزاينەرلەردىڭ جارتىسىنا جۋىعى – 25 جاسقا دەيىنگى جاستار. جالاقى دەڭگەيى دە ءونىم ديزاينەرىنىڭ مارتەبەسىن ايقىندايدى. ورتاشا جالاقى – 1 220 000 تەڭگە. گرافيكالىق ديزاينەرلەرمەن سالىستىرعاندا ەكى ەسە جوعارى.
– قارجى سەكتورىندا UX/UI ديزاينەرلەرگە دەگەن سۇرانىستىڭ ارتۋى تسيفرلىق بانكينگتىڭ دامۋىنا, ونلاين تولەم جۇيەلەرىنىڭ كوبەيۋىنە جانە ءموبيلدى قوسىمشالار ارقىلى كورسەتىلەتىن قىزمەت تۇرلەرىنىڭ كۇردەلەنە تۇسۋىنە تىكەلەي بايلانىستى. ءار ءونىم – كۇردەلى جۇيە, ال سول جۇيەنى پايدالانۋشىعا تۇسىنىكتى ەتۋ – ءونىم ديزاينەرىنىڭ مىندەتى. جاھاندىق ەكونوميكادا تسيفرلى ءونىمنىڭ تيىمدىلىگى كومپانيا تابىسىنىڭ شەشۋشى فاكتورى بولىپ وتىر. ال ءونىم ءتيىمدى بولۋى ءۇشىن ول قولدانۋشىعا قىزمەت ەتۋى كەرەك. سول قىزمەتتى ءتيىمدى قىلۋ ءونىم ديزاينەرىنىڭ باستى مىندەتى. سوندىقتان بۇل ماماندىق كەلەشەكتە ماركەتينگ پەن باعدارلامالاۋدان دا جوعارى سۇرانىسقا يە بولۋى مۇمكىن, – دەيدى ق.امانعالي.
بولجامپاز زەرتتەۋشى ءھام ستراتەگ
شىنىندا, بانك قوسىمشاسىن اشقاندا, اۋدارىم جاساپ نەمەسە شوت اشقاندا ءبارى ء«وزى باياعىدان سولاي بولعانداي» كورىنەدى. الايدا سول ء«وزى بولعان» ۇدەرىستىڭ ارتىندا جۇزدەگەن زەرتتەۋ, سىناق, UX تەست جانە ديزاينەرلىك شەشىم تۇر.
– قازىرگى زامانعى ءونىم ديزاينەرى بىرنەشە باعىتتى قاتار مەڭگەرۋى كەرەك. ول – ءبىر جاعىنان پايدالانۋشى نە ويلاپ تۇرعانىن الدىن الا بولجاي الاتىن زەرتتەۋشى بولسا, ەكىنشى جاعىنان بيزنەسكە نە پايدالى ەكەنىن تۇسىنەتىن ستراتەگ. ادامنىڭ ونىممەن قالاي ارەكەتتەسەتىنىن, قانداي باتىرمانى قاشان باساتىنىن, نەلىكتەن كەيدە قولدانۋدان باس تارتاتىنىن ءبىلۋى كەرەك. سوسىن ماركەتينگتى دە ءتۇسىنۋى كەرەك – ول قولدانۋشىنى قالاي تارتۋعا بولاتىنىن, قاي جەردە جارناما ءتيىمدى, ءماتىندى قالاي جازۋ قاجەت ەكەنىن بىلۋگە ءتيىس. سونىمەن بىرگە اناليتيكامەن دە جۇمىس ىستەيدى: «Google Analytics» نەمەسە «Hotjar» سەكىلدى قۇرالدار ارقىلى قاي بەتتەر ءجيى قارالاتىنىن, قاي جەردە قولدانۋشى توقتاپ قالاتىنىن سارالايدى. بۇل دەرەكتەر بولاشاق شەشىمدى قابىلداۋعا كومەكتەسەدى, – دەيدى ادەلينا ۋرجانوۆا.
پايىمداۋىمىزشا, تەحنيكالىق قۇرالدار دا ماڭىزدى. «Figma», «FigJam», «Miro» سەكىلدى پلاتفورمالاردا ەركىن جۇمىس ىستەي الۋى قاجەت. سەبەبى قازىرگى كوماندالار – كروسس-فۋنكتسيونالدى, ياعني ءبىر ونىمدە ديزاينەر, باعدارلاماشى, ماركەتولوگ, اناليتيك بىرگە جۇمىس ىستەيدى. سول كەزدە ءبارىنىڭ ءتىلىن تۇسىنەتىن ديزاينەر كوماندا ءۇشىن تاپتىرماس مامانعا اينالادى.