«بۋراباي» ۇلتتىق پاركىندە جۇمباقتاس تابيعي ەسكەرتكىشكە كىرۋ جابىلدى. بۇل تۋرالى پاركتىڭ Instagram پاراقشاسىندا حابارلاندى, دەپ جازادى Egemen.kz.
«جۇمباقتاس جارتاستى شىڭى – ەستەتيكالىق قانا ەمەس, مادەني قۇندىلىعى دا زور بىرەگەي تابيعي ەسكەرتكىش. جارتاسقا شىعۋعا قاتاڭ تىيىم سالىنادى! بۇل تەك تابيعاتتى قورعاۋ ەرەجەلەرىن بۇزۋ عانا ەمەس, سونىمەن قاتار ءومىر مەن دەنساۋلىققا قاۋىپ توندىرەدى. بەلگىلەنگەن شەكتەۋلەردى ساقتاپ, قازاقستاننىڭ تابيعي مۇراسىنا ۇقىپتى قاراۋدى سۇرايمىز», دەلىنگەن حابارلامادا.
سونداي-اق, ەرەجەنى بۇزعاندار اكىمشىلىك جاۋاپكەرشىلىككە تارتىلادى دەپ اتاپ وتىلگەن.