بيىل اباي وبلىسىندا ءداستۇر مەن ونەر ساباقتاستىعى عانا ەمەس, مادەنيەت پەن بيزنەس جەتىستىكتەرى كورىنىس تاپقان ءىس-شارالار ءجيى ءوتىپ جاتىر. سونداي جيىننىڭ ءبىرى – تاسكەسكەن اۋىلىندا وتكەن «اۋىل – ەل بەسىگى» فەستيۆالى, دەپ حابارلايدى Egemen.kz.
تاسكەسكەن اۋىلىندا ءداستۇرلى «اۋىل – ەل بەسىگى» مادەني-سپورتتىق فەستيۆالى اياسىندا اۋىلدا قوعامدىق ساۋىقتىرۋ كەشەنى اشىلدى. فەستيۆال مەتسەنات تالعات ساقاننىڭ ۇيىمداستىرۋىمەن, وبلىس اكىمدىگىنىڭ قولداۋىمەن ءوتتى.
فەستيۆالدىڭ سالتاناتتى اشىلۋىنا اۋدانعا جۇمىس ساپارىمەن بارعان وبلىسى اكىمى بەرىك ءۋالي قاتىسىپ, بۇل تويدىڭ اۋىل تۇرمىسىنىڭ جاقسارۋىنا سەپتىگى تيۋ كەرەكتىگىن ايتتى.
– اباي وڭىرىندە اتىمتاي جومارتتىق پەن تۋعان جەرگە قىزمەت ەتۋ قاشاندا اسىل مۇرات بولىپ كەلگەن. وسى ءداستۇردىڭ جارقىن ۇلگىسىن كورسەتىپ جۇرگەن ازاماتتار وڭىرىمىزدە از ەمەس. سولاردىڭ ءبىرى – وسى جەردىڭ تۋماسى, بەلگىلى كاسىپكەر, تۋعان اۋىلدىڭ جاناشىرى تالعات ساقان ەكەنىن ەرەكشە اتاپ وتكىم كەلەدى. تاسكەسكەن اۋىلىنىڭ كىرەبەرىس قاقپاسى (اركا) ورناتىلدى. 2024 جىلى 2 كوشەگە اسفالت توسەلدى. قوعامدىق ساۋىقتىرۋ ورتالىعىن حالىق يگىلىگىنە بەرىلدى. 100 ورىنعا ارنالعان بالاباقشا قۇرىلىسى ءجۇرىپ جاتىر, – دەدى ايماق باسشىسى.
بۇگىندە ءۇرجار اۋدانىندا جەكە ينۆەستورلاردىڭ قارجىسىمەن كوپتەگەن جوبا ىسكە اسىپ جاتىر. ماسەلەن, قىتايلىق تاراپپەن بىرلەسكەن «شىڭ جان جۋو انگ-سۇنكار» جشس كۇنباعىس مايى مەن ۇن وندىرەتىن جانە مال ازىعىن دايىندايتىن قۇنى 5,5 ميلليارد تەڭگە بولاتىن كەشەن سالۋدى باستادى. بۇعان قوسا «Urdjar Agro Trade» جشس قۋاتتىلىعى تاۋلىگىنە 100 توننا بولاتىن مايلى داقىلداردى وڭدەيتىن زاۋىتتىڭ قۇرىلىسىن جۇرگىزىپ جاتىر. ينۆەستيتسيا كولەمى – 800 ملن تەڭگە.
مەرەكەلىك باعدارلامادا رەسپۋبليكالىق ايتىس, 70 شاقىرىمدىق الامان بايگە, 15 شاقىرىمدىق «تاسكەسكەن جۇيرىگى» ات جارىسى, قىز قۋ, تەڭگە ءىلۋ, قوي كوتەرۋ, ساداق اتۋ, كيىز ءۇي تىگۋ سايىستارى دا بار. ال «توپجارعان» ەتنو-مادەني ورتالىعى اكروباتيكالىق ونەردەن شەبەرلىگىن كورسەتىپ, ۇلت ءداستۇرىن دارىپتەدى.
اباي وبلىسى