2025 جىلعى 16-18 ماۋسىم كۇندەرى وزبەكستان استاناسى تاشكەنت قالاسىندا تۇركى مەملەكەتتەرى ۇيىمىنىڭ III دياسپورا جاستارى فورۋمى ۇيىمداستىرىلدى. «شەكاراسىز مۇرا: بولاشاقتى قالىپتاستىراتىن دياسپورانىڭ جاس كوشباسشىلارى» اتتى فورۋمعا قازاقستاننان «وتانداستار قورى» كوممەرتسيالىق ەمەس اكتسيونەرلىك قوعامىنىڭ وكىلدەرى دە قاتىستى, دەپ حابارلايدى Egemen.kz.
فورۋمنىڭ باستى ۇيىمداستىرۋشىلارى – وزبەكستان رەسپۋبليكاسىنىڭ جاستار ءىسى اگەنتتىگى جانە مادەنيەت مينيسترلىگى جانىنداعى ۇلتارالىق قاتىناستار جانە شەتەلدىك ەلدەرمەن دوستىق بايلانىستار كوميتەتى. جيىن اياسىندا تۇركيا, ازەربايجان, قازاقستان, قىرعىزستان, تۇرىكمەنستان, ۆەنگريا, فرانتسيا جانە گەرمانيادا تۇراتىن تۇركى دياسپوراسىنىڭ جاس كوشباسشىلارى باس قوسىپ, ءوزارا تاجىريبە الماستى.
فورۋمنىڭ 17 ماۋسىم كۇنى وتكەن باستى ءىس-شارالارىنىڭ ءبىرى – «شەكاراسىز مۇرا: بولاشاقتى قالىپتاستىراتىن دياسپورانىڭ جاس كوشباسشىلارى» اتتى پانەلدىك پىكىرتالاس سەسسياسى بولدى. سەسسيا Hilton Tashkent City قوناقۇيىندە ءوتتى.
مودەراتورلىق ەتكەن وزبەكستان رەسپۋبليكاسىنىڭ ۇلتارالىق قاتىناستار جانە شەتەلدەگى وتانداستارمەن بايلانىس جونىندەگى كوميتەتى دەپارتامەنتىنىڭ باسشىسى اليماردونوۆ وتابەك فورۋمدى اشىپ بەردى.
سەسسيادا قازاقستان اتىنان «وتانداستار قورى» كەاق وكىلى الجان شاريپوۆ ءسوز سويلەدى. ول ءوز بايانداماسىندا: «وزبەكستاندا 1 ميلليوننان اسا قازاق تۇرادى, ال قازاقستاندا 600 مىڭنان استام وزبەك ۇلتى تۇرادى. ولار ەكى ەلدى بايلانىستىرۋشى التىن كوپىر. ەلدەرىمىزدىڭ تۇركى مەملەكەتتەرى ۇيىمى مەن ورتا ازيا شەڭبەرىندە بىرلەسىپ جۇمىس ىستەۋى ماڭىزدى. دەلەگات رەتىندە مەن تمۇ جاس ساراپشىلار مەكتەبىن قۇرۋدى ۇسىنامىن. ءتۇرلى سالاداعى جاس ەكسپەرتتەر جاڭا يدەيالار مەن ۇتىمدى شەشىمدەر ۇسىنۋ ارقىلى مەملەكەتارالىق بايلانىستىڭ ودان ءارى دامۋىنا سەبەپكەر بولاتىنىنا سەنىمدىمىن», دەدى.
سونىمەن قاتار سەسسيا بارىسىندا تۇركى الەمىنىڭ ءتۇرلى ەلدەرىنەن كەلگەن جاس كوشباسشىلار ءوز ەلدەرىنىڭ تاجىريبەسىمەن ءبولىسىپ, دياسپورا جۇمىسىنىڭ وزەكتى ماسەلەلەرىن كوتەردى. اتاپ ايتقاندا, ازەربايجان, تۇركيا, قىرعىزستان, تۇرىكمەنستان جانە ۆەنگريادان كەلگەن قاتىسۋشىلار ءوز ەلدەرىندەگى جاستار ۇيىمدارىنىڭ جوبالارى جايلى اقپارات بەرىپ, جاڭا سەرىكتەستىك باعىتتارىن ۇسىندى.
بۇل فورۋم – تۇركىتىلدەس ەلدەردىڭ جاس كوشباسشىلارى اراسىندا ىنتىماقتاستىقتى نىعايتۋعا, ورتاق مادەني مۇرانى ساقتاۋ مەن دامىتۋ جولدارىن بىرلەسە قاراستىرۋعا باعىتتالعان ماڭىزدى پلاتفورما بولدى. فورۋم سوڭىندا قاتىسۋشىلاردىڭ باستامالارى مەن ۇسىنىستارى نەگىزىندە بىرقاتار پراكتيكالىق شەشىمدەر قابىلدانۋى جوسپارلانۋدا.