پرەمەر-مينيستر ولجاس بەكتەنوۆ ۆەگەتاتسيالىق كەزەڭدى وتكىزۋ ماسەلەسى بويىنشا كەڭەس وتكىزدى.
وندا ەلىمىز بويىنشا, سونداي-اق سۋ تۇتىنۋدىڭ 97%-ىن قۇرايتىن وڭتۇستىك وڭىرلەردىڭ احۋالى, سونىمەن قاتار اۋىل شارۋاشىلىعىندا ەگىس قۇرىلىمىن قازىرگى جاعدايعا بەيىمدەۋ جانە ىلعالدى از قاجەت ەتەتىن داقىلدارعا كوشۋ, سۋ ۇنەمدەۋ تەحنولوگيالارىن ەنگىزۋ بويىنشا اۋىل شارۋاشىلىعىندا قابىلدانىپ جاتقان شارالار قارالدى.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ, تۇركىستان, جامبىل, قىزىلوردا, الماتى جانە جەتىسۋ وبلىستارى اكىمدەرىنىڭ بايانداماسى تىڭدالدى.
سۋ رەسۋرستارى جانە يرريگاتسيا مينيسترلىگىنىڭ مالىمەتى بويىنشا, «قازسۋشار» رمك فيليالدارى اۋىل شارۋاشىلىعى وندىرۋشىلەرىنە سۋ بەرۋدى ۇيىمداستىردى. بۇگىندە 22,5 مىڭ كەلىسىمشارت جاسالدى, بۇل وتكەن جىلدىڭ سايكەس كورسەتكىشىنەن 3 مىڭعا ارتىق.
تالقىلاۋ بارىسىندا شۋ, تالاس جانە سىرداريا وزەندەرىندەگى جاعداي, سۋدى بولۋدەگى اشىقتىقتى قامتاماسىز ەتۋ ماسەلەلەرىنە نازار اۋدارىلدى. سۋ ۇنەمدەۋدى ىنتالاندىرۋ ماقساتىندا ەلىمىزدە ەگىندىك سۋعا ارنالعان سۋبسيديالاردىڭ سارالانعان مولشەرى ەنگىزىلدى: سۋ ۇنەمدەۋ تەحنولوگيالارىن پايدالاناتىن شارۋالار ءۇشىن مۇنداي تەحنولوگيالاردى قولدانبايتىندارعا قاراعاندا – سۋبسيديالار مولشەرى جوعارى. سونىمەن قاتار سۋدى زاڭسىز پايدالانۋمەن كۇرەسۋ جانە سۋ ۇرلاۋ فاكتىلەرىنىڭ الدىن الۋ شارالارى قابىلدانىپ جاتىر.
پرەمەر-مينيستر شارۋالاردىڭ قاجەتتىلىكتەرىن سۋ رەسۋرستارىمەن قامتاماسىز ەتۋ جانە اۋىل شارۋاشىلىعىنىڭ سۇرانىستارىن قاناعاتتاندىرۋ كوبىرەك نازار اۋدارۋدى تالاپ ەتەتىنىن اتاپ ءوتتى.
«تيىمدىلىككە, ۇنەمدىلىككە جانە ۆەدومستۆوارالىق كەلىسىمدىلىككە باسا نازار اۋدارا وتىرىپ, سۋ تاۋەكەلدەرىن الدىن الا باسقارۋعا كوشۋ قاجەت. وبلىس اكىمدەرى سۋمەن جابدىقتاۋ ۇيىمدارىنىڭ ەگىندىك سۋمەن شارۋالاردى قامتاماسىز ەتۋ, سۋارۋ تەحنولوگيالارىن ساقتاۋ, سۋارۋ رەتتىلىگى جانە كوللەكتورلىق-درەناجدىق سۋدى قايتا پايدالانۋ جونىندەگى ءىس-قيمىلدارىن ۇيلەستىرۋدى قامتاماسىز ەتۋگە ءتيىس. سۋ ۇنەمدەۋ تەحنولوگيالارىن ەنگىزۋ جۇمىستارىن كۇشەيتۋ قاجەت. مۇددەلى مەملەكەتتىك ورگاندار مەن فەرمەرلەر بىرلەستىكتەرى وكىلدەرىنىڭ قاتىسۋىمەن ۆەگەتاتسيالىق كەزەڭدە سۋ تاۋەكەلدەرىن باسقارۋ جونىندەگى وڭىرلىك شتابتار قۇرۋدى تاپسىرامىن. سۋدى زاڭسىز پايدالانۋدى باقىلاۋدى كۇشەيتۋ جانە بۇزۋشىلىقتاردى انىقتاۋ جۇمىستارىن جانداندىرۋ ماڭىزدى», دەپ اتاپ ءوتتى و.بەكتەنوۆ.
سۋ رەسۋرستارى جانە يرريگاتسيا مينيسترلىگىنە كورشىلەس ەلدەرمەن ترانسشەكارالىق وزەندەر بويىنشا ىنتىماقتاستىقتى نىعايتۋ, سۋ بەرۋ ليميتتەرىن باقىلاۋدى كۇشەيتۋ جانە جەدەل ارەكەت ەتۋ, قۇرىلىستارعا جوندەۋ جۇرگىزۋ تاپسىرىلدى.
سونداي-اق سپۋتنيك دەرەكتەرىن پايدالانا وتىرىپ جانە ينتەراكتيۆتى كارتالاردا سۋ تاپشى ايماقتاردى كورسەتۋ ارقىلى سۋدى پايدالانۋدىڭ تسيفرلىق مونيتورينگىن ەنگىزۋدى قامتاماسىز ەتۋ قاجەت.
ۇكىمەت شارۋالاردى سۋمەن قامتاماسىز ەتۋ ءۇشىن قاجەتتى شارالار قابىلداۋدا, ۆەگەتاتسيالىق كەزەڭنىڭ ءوتۋ بارىسى تۇراقتى باقىلاۋدا. اتالعان جۇمىستى ۇيلەستىرۋ پرەمەر-ءمينيستردىڭ ورىنباسارى قانات بوزىمباەۆقا جۇكتەلدى.