ادام ۇيىنەن تىسقارى جەردە ءوزىن قاۋىپسىز سەزىنە السا, ول ەلدە قۇقىقتىق ءتارتىپ ورنىققان دەگەندى بىلدىرسە كەرەك. وتاندىق پوليتسيا شەبىندە ون جىلدان اسا قىزمەت اتقارىپ كەلە جاتقان ازامات كۇركەباەۆ – ءوزىنىڭ ميسسياسىنا ادال قارايتىن ازاماتتىڭ ءبىرى.
بىلاي قاراساق, پوليتسيانىڭ مىندەتى كوپ, شارۋاسى شاشەتەكتەن. ۋچاسكەلىك پوليتسيادان باستاپ, كەڭسەدە وتىراتىن باستىقتارىنىڭ ءوزى ۇنەمى شاپقىلاپ جۇرەدى. اسىرەسە جەرگىلىكتى پوليتسيا قىزمەتىنىڭ جۇمىسى كۇردەلى. قوعام مەن جول قاۋىپسىزدىگىنە قاتىستى بارلىق پروفيلاكتيكالىق ءىس-شارا, وقيعا مەن قىلمىستىق ىسكە جاۋاپتى. ەرتىس-بايان وڭىرىندەگى وسى ءبىر تولاسسىز تىرلىكتى ۇيىمداستىرىپ, ۇيلەستىرۋ وبلىستىق جەرگىلىكتى پوليتسيا قىزمەتى باستىعىنىڭ مىندەتىن اتقارۋشى, پوليتسيا مايورى ازامات كۇركەباەۆتىڭ ەنشىسىندە. ەڭبەك جولى قاتارداعى ۋچاسكەلىك پوليتسەيدەن باستالعان ءتارتىپ ساقشىسى العىرلىعى, قىزمەتىنە دەگەن ادالدىعىنىڭ ناتيجەسىندە بۇگىندە ءبۇتىن ءبىر وبلىستىڭ قوعامدىق ءتارتىبىن قاداعالاپ وتىر.
ء«ار پوليتسەيدىڭ مىندەتى – انتىنا ادال بولۋ, وتانىنا قىزمەت ەتۋ. ادەتتە قاتارداعى پوليتسەيلەردىڭ قىزمەتى شىم-شىتىرىققا تولى. سەبەبى بۇل جەردە جۇرتپەن ەتەنە جۇمىس ىستەيسىڭ. سونىسىمەن دە قىزىق. قاۋىپتى قۇبىلىستىڭ, ىقتيمال قىلمىستاردىڭ الدىن الۋعا ۇمتىلاسىڭ. بىلايعى كوپشىلىك بىلە بەرمەس, قوعامدا ءتارتىپ ساقشىلارىنىڭ قاتىسۋىمەن كۇنىنە جۇزدەگەن قىلمىستىڭ الدى الىنادى. قوعام ءتارتىبىن قاداعالاۋ, قىلمىستىڭ الدىن الۋ, جۇرتتى زاڭعا باعىنۋعا ۇيرەتۋ كۇن تارتىبىنەن تۇسپەيدى», دەيدى ول.
«اكەگە قاراپ ۇل وسەر» دەگەندەي, ازامات ماراتجان ۇلى – جاقسى اكەنىڭ ءتالىمىن العان جان. اتا-اناسى بالالارىنىڭ بارلىعىن وقىتىپ, ادال ەڭبەككە ۇيرەتكەنىن, ال پوليتسەي ماماندىعىن تاڭداۋىنا ناعاشى جۇرتىندا بۇرىن ىشكى ىستەر سالاسىنىڭ قىزمەتكەرلەرى بولعانى سەبەپكەر ەكەنىن جەتكىزدى. اكەسى ۇيدە ءتارتىپتى ۇنەمى العا قويعاننان با, ۇلى كىشكەنتايىنان تارتىپسۇيگىش بولىپ جەتىلگەن. وسە كەلە ماماندىققا ادال بولۋدىڭ نەگىزگى فاكتورى دا تارتىپكە باعىنۋ ەكەنىن ۇققانداي.
«پوليتسەيلەر ءتارتىپتىڭ ەتالونى بولۋى كەرەك. بۇل – قاعيدا عانا ەمەس, ادامنىڭ ىشكى جان دۇنيەسىمەن بايلانىسىپ جاتاتىن وي-ءورىس. ىشكى ىستەر سالاسىندا ەڭبەك ەتىپ جۇرگەن ازاماتتار پسيحولوگيالىق تۇرعىدان مىعىم بولماسا, ۇزاققا شىدامايدى, تولاسسىز تىرلىكتەن كۇيىپ كەتەدى. وعان تالاي مارتە كۋا بولدىق. ال جىلدار بويى جيناعان تاجىريبە ءبىزدى دامىتىپ قانا قويمايدى, جۇرتپەن جۇمىس ىستەۋدە جاڭاشىلدىق ەنگىزۋگە تۇرتكى بولادى. پاۆلودار وبلىسى ەلىمىزدەگى ەڭ قاۋىپسىز ءوڭىردىڭ ءبىرى دەپ ماقتانىشپەن ايتۋعا لايىقتى. كوپشىلىك تاۋلىكتىڭ كەز كەلگەن ۋاقىتىندا ەرتىس وزەنى جاعاسىندا, كوشەلەر مەن ساياباقتاردا ەمىن-ەركىن سەرۋەندەپ, ءوزىن قاۋىپسىز سەزىنە الادى. مۇنداي قاۋىپسىز اتموسفەرانى ۇستاپ تۇرۋ ءۇشىن پوليتسەيلەر كۇن سايىن تىنىمسىز ەڭبەك ەتىپ ءجۇر», دەپ كەيىپكەرىمىز اڭگىمەسىن جالعاي ءتۇستى.
ازامات كۇركەباەۆ ەكىباستۇزدا ۋچاسكەلىك پوليتسەي, ۆزۆود, روتا كومانديرى بولىپ ەڭبەك ەتىپ جۇرگەن شاعىندا الدىڭعى قاتارداعى قىزمەتكەرلەردىڭ ءبىرى بولعانىن دا اتاپ وتپەسكە بولماس. اسىرەسە كوشەدە مەيىربيكە ايەلدىڭ قولسومكەسىن ۇرلاپ قاشقان توناۋشىنى 10 مينۋت ىشىندە ۇستاپ, قىلمىستى ءىزىن سۋىتپاي اشقانى تۋرالى اقپارات ءبىر جىلدارى الەۋمەتتىك جەلىدە تانىمال بولعان. جول قاۋىپسىزدىگىنە قاۋىپ توندىرگەن ماس جۇرگىزۋشىلەردىڭ تالايىن قۇرىقتاپ, بالكوننان سەكىرگەلى تۇرعان ازاماتتاردى قۇتقارىپ قالدى.
ءسوز سوڭىندا ىشكى ىستەر مينيسترلىگى جەرگىلىكتى پوليتسيا قىزمەتى مەن اكىمشىلىك پوليتسيا باسقارماسىن قايتا ۇيىمداستىرىپ, ولاردىڭ بازاسىندا ەكى جاڭا باسقارما – قۇقىق بۇزۋشىلىقتاردىڭ الدىن الۋ جانە قوعامدىق قاۋىپسىزدىكتى قامتاماسىز ەتۋ باسقارمالارىن قۇرعالى وتىرعانىن وڭ باستاما رەتىندە قولدايتىنىن جەتكىزدى.
«ادامدار ەرەجەلەردى ساقتاپ, تارتىپكە باعىنسا, كولىك جۇرگىزۋشىلەرى قاۋىپسىزدىك بەلبەۋىن تاعىپ, جىلدامدىقتى اسىرماسا, ءتارتىپتىڭ ساقتالۋى دەگەن سول. ياعني كەز كەلگەن قۇقىقبۇزۋشىلىقتىڭ الدىن الۋ ءۇشىن قوعامداعى تارتىپتىك سانانى كۇشەيتۋگە ءمان بەرۋىمىز كەرەك. الدىن الۋ ءىس-شارالارىنىڭ ماڭىزى دا سوعان سايادى. ادام كەز كەلگەن ورتادا ءوزىن قاۋىپسىز سەزىنە السا, ول – قۇقىقتىق مەملەكەتتىڭ يگىلىگى», دەپ ءتامامدادى ءسوزىن.
ازامات ماراتجان ۇلى بۇگىندە زايىبى ەكەۋى وتباسىندا ءبىر ۇل, ءبىر قىز تاربيەلەپ وتىر.
پاۆلودار وبلىسى