«اتىراۋ ۆاگون قۇراستىرۋ زاۋىتى» جاقىندا كونۆەيەردەن 100-ءىنشى جۇك ۆاگونىن شىعاردى. 2027 جىلى تولىق قۋاتقا جەتكەن كەزدە وندىرىستىك اۋماق 62 مىڭ شارشى مەترگە ۇلعايىپ, جىلىنا 7–8 مىڭ جۇك ۆاگونىن دايىندايدى.
باستاپقى ينۆەستيتسيا – 170 ملن دوللار
«زاۋىت ىسكە قوسىلعالى بەرى وبلىستىڭ ەكونوميكالىق الەۋەتىن ارتتىرىپ, جاڭا جۇمىس ورىندارىنىڭ اشىلۋىنا مۇمكىندىك بەردى. مۇنايلى وڭىردە شەتەلدىكتەرمەن بىرلەسكەن مىڭنان استام كاسىپورىن جۇمىس ىستەيدى. ماشينا جاساۋ سالاسىندا 150 ءىرى, ورتا جانە شاعىن بيزنەس نىسانى بار. جاڭا جوبالار بىرىنشىدەن, «تەڭىز» كەن ورنىنداعى كەلەشەك كەڭەيۋ جوباسىنىڭ اياقتالۋىنا بايلانىستى بوساعان جۇمىسشىلاردى جۇمىسپەن قامتۋعا ىقپال ەتەدى. ەكىنشىدەن, ەكسپورتقا باعىتتالعان ونىمدەر وسىمىنە سەپتىگىن تيگىزەدى. ۇشىنشىدەن, ءوڭىردىڭ الەۋمەتتىك-ەكونوميكالىق دامۋىنا سەرپىن بەرەدى», دەيدى وبلىس اكىمىنىڭ ورىنباسارى مارات مۋرزيەۆ.
جۇك ۆاگوندارىن قۇراستىرۋ زاۋىتىن ىسكە قوسقان «Texol» كومپانيالار توبىنىڭ باسشىسى شوتا اۆحازاۆانىڭ ايتۋىنشا, جوباعا باستاپقىدا 170 ملن دوللار كولەمىندە قارجى سالىنعان. يگى باستاما تولىق جۇزەگە اسىرىلعان كەزدە ينۆەستيتسيا كولەمى 160 ملرد تەڭگەگە جەتۋى مۇمكىن.
300 ادام جۇمىسپەن قامتىلعان
«زاۋىت باستاپقىدا جىلىنا 6 مىڭ ۆاگون قۇراستىرادى. جۇكتەمە كوبەيگەن سايىن ۇستا, دانەكەرلەۋشى, بۇرعىلاۋشى, تويتارۋشى سەكىلدى سان ءتۇرلى بەيىندەگى ماماندارعا سۇرانىس كوبەيەدى. مۇندا ۆاگون مەن تسيستەرنا شىعارۋ, جوندەۋ, تەحنيكالىق قىزمەت كورسەتۋگە ارنالعان بارلىق ينفراقۇرىلىمدى قامتيتىن كلاستەر قۇرۋ كوزدەلىپ وتىر. ۆاگون قۇراستىرۋعا نەمىس ستانوكتارى مەن ەلىمىزدە وندىرىلگەن ماتەريالدار قولدانىلادى. ۆاگونداردى ەۋروپا جانە بالتىق تەڭىزى جاعالاۋىنداعى ەلدەرگە ەكسپورتتاۋ مۇمكىندىگى بار», دەيدى ش.اۆحازاۆا.
قازىر جاڭا ۇلگىلەر وندىرىسكە ەنگىزىلىپ جاتىر. سونىڭ قاتارىندا 25 مىڭ اربا مەن 136741 ۇلگىسىندەگى ارتيكۋلياتسيالانعان فيتينگ پلاتفورماسىنىڭ مودەلى دە بار. سونداي-اق مۇندا سۇيىتىلعان كومىرسۋتەكتى گازدى تاسىمالدايتىن تسيستەرنالار شىعارىلادى. زاۋىتقا ۆاگون قۇراستىرۋ ءۇشىن مەتالل كونسترۋكتسيالارى قاراعاندى وبلىسىنان, مويىنتىرەكتەر ستەپنوگوردان, دوڭعالاقتى جۇپتارعا ارنالعان ديسكىلەر مەن وستەر ەكىباستۇزدان الىنادى. قازىر زاۋىتتا 300 ادام تۇراقتى جۇمىسپەن قامتىلعان. جىل سوڭىنا دەيىن ولاردىڭ قاتارى 600 مامانمەن تولىعادى.
بولاتتان قۇيىلاتىن بولشەكتەر
جاقىندا قىتايلىق «Hubei Provincial Mechanical and Electrical Institute GROUP Co., LTD.» ينجيرينگىلىك حولدينگىمەن كەلىسىم جاساعان. تاراپتار تەمىرجول ۆاگونىنا ارنالعان ۇساق جانە ورتاشا قۇيما بولات بولشەكتەرىن شىعاراتىن زاۋىت قۇرىلىسىن جوبالاۋدى باستاعالى وتىر. قىتايلىق كومپانيا جىل سوڭىنا دەيىن جاڭا زاۋىتتىڭ جوباسىن ۇسىنادى. قازىر ءوندىرىس ورنى ءۇشىن بولىنگەن جەر تەلىمىندە قوسالقى جانە كەڭسە عيماراتتارىنىڭ قۇرىلىسى باستالدى. كىرمە جول سالىنىپ جاتىر. بىرنەشە وندىرىستىك تسەحتان قۇرالاتىن زاۋىت قۇرىلىسى جىل سوڭىندا قولعا الىنباق.
«جاڭا ءوندىرىس ورنى 2027 جىلدىڭ I توقسانىندا ىسكە قوسىلادى. زاۋىت جىلىنا 30 مىڭ تونناعا دەيىن قۇيما بولشەك, ۆاگون قۇراستىرۋعا قاجەتتى تىرەك, وكشەلىك, تارتقىش, بۋكسا كورپۋسى سىندى نەگىزگى بولشەكتەر شىعارادى. وندىرىسكە نەگىزگى شيكىزات رەتىندە جەرگىلىكتى ماتەريالدار قولدانىلادى. بۇل – مەتالل سىنىقتارى مەن فەرروقوسىمشالار», دەدى ش.اۆحازاۆا.
اتىراۋ وبلىسىنىڭ اكىمى سەرىك شاپكەنوۆتىڭ پىكىرىنشە, قۇيما بولشەكتەر شىعاراتىن زاۋىت – مۇنايلى ءوڭىر ەكونوميكاسىن ارتاراپتاندىرۋعا جول اشاتىن ماڭىزدى جوبانىڭ ءبىرى. ويتكەنى اتىراۋ تەك مۇناي-گاز ونەركاسىبى ەمەس, لوگيستيكا ورتالىعىنا دا اينالا باستادى.
اتىراۋ وبلىسى