پاۆلوداردا «تۋرا جول» جوباسى مەن ناشاقورلىققا قارسى ايلىق اياسىندا ناشاقورلىقتىڭ الدىن الۋ جانە تاۋەلدىلىكتى ەمدەۋ سالاسىنداعى ماماندارعا ارنالعان سەمينار-ترەنينگ ءوتتى, دەپ جازادى Egemen.kz.
ءىس-شارانى جاستار باستامالارىن دامىتۋ ورتالىعى مەن پسيحيكالىق دەنساۋلىق ورتالىعى بىرلەسىپ ۇيىمداستىردى.
سەمينار 2025 جىلعى 19 ماۋسىم كۇنى التى ساعات بويى ءوتتى. وقۋ باعدارلاماسى كولومبو جوسپارى اياسىنداعى ەسىرتكى ماسەلەلەرى جونىندەگى كونسۋلتاتسيالىق باعدارلامانىڭ (DAP) نەگىزىندە ازىرلەنگەن. تاقىرىبى – «ساۋىقتىرۋ ۇدەرىسىن باسقارۋ جانە رەتسيديۆتىڭ الدىن الۋ».
وقىتۋ ينتەراكتيۆ فورماتتا ۇيىمداستىرىلىپ, ناقتى كاسىبي جاعدايلار نەگىزىندە تاجىريبەلىك داعدىلاردى مەڭگەرۋگە مۇمكىندىك بەردى. سەمينار پسيحواكتيۆتى زاتتاردى تۇتىنۋعا بايلانىستى بۇزىلۋلاردى ەمدەۋدە حالىقارالىق تاسىلدەردى قولدانۋعا جانە پسيحيكالىق دەنساۋلىق قىزمەتتەرىنىڭ ساپاسىن ارتتىرۋعا باعىتتالدى.
ءىس-شاراعا پاۆلودار وبلىسىنىڭ تۇكپىر-تۇكپىرىنەن كەلگەن باستاپقى مەديتسينالىق-سانيتارلىق كومەك (بمسك) پسيحولوگتارى, جاستار دەنساۋلىق ورتالىقتارىنىڭ وكىلدەرى, ناركولوگ-دارىگەرلەر, الەۋمەتتىك قىزمەتكەرلەر مەن كەڭەسشىلەر قاتىستى. جالپى سانى 30-دان استام مامان قامتىلدى.
سەميناردىڭ باستى ماقساتى – تاۋەلدىلىكپەن جۇمىس ىستەۋدىڭ زاماناۋي ادىستەرىن ۇيرەتۋ, مامانداردىڭ كاسىبي قۇزىرەتىن ارتتىرۋ, سالا ماماندارى اراسىندا ارىپتەستىك بايلانىستى نىعايتۋ جانە تاۋەلدىلىككە ۇشىراعان ادامدار مەن ولاردىڭ وتباسىلارىنا كورسەتىلەتىن مەديتسينالىق ءارى پسيحولوگيالىق كومەكتىڭ ساپاسىن جاقسارتۋعا ىقپال ەتۋ.
باعدارلاما اياسىندا تاۋەلدىلىكتى ەمدەۋدىڭ عىلىمي نەگىزدەلگەن تاسىلدەرى, ساۋىقتىرۋ ۇدەرىسىن باسقارۋدىڭ پسيحولوگيالىق اسپەكتىلەرى, رەتسيديۆتىڭ الدىن الۋ ستراتەگيالارى مەن ادىستەرى, كەڭەس بەرۋدەگى ەتيكا ماسەلەلەرى قارالىپ, پراكتيكالىق جاتتىعۋلار مەن جاعداياتتاردى مودەلدەۋ جۇرگىزىلدى.
سەمينار وڭىردەگى ناشاقورلىقتىڭ الدىن الۋ جانە ەمدەۋ جۇيەسىن جەتىلدىرۋ باعىتىندا ماڭىزدى قادام بولدى. قاتىسۋشىلار ءىس-شارانىڭ مازمۇنى مەن پراكتيكالىق باعىتىنىڭ كاسىبي قىزمەتىندە اسا وزەكتى ەكەنىن اتاپ ءوتتى.