جۇمىسشى ماماندىقتار جىلى اياسىندا سەمەي قالاسىندا «ەڭبەكشى جاستار – 2025» فەستيۆالى ءوتتى. فەستيۆال ماقساتى – ستۋدەنتتەرگە ەڭبەك نارىعىنداعى سۇرانىسقا يە ماماندىقتاردى ناسيحاتتاۋ, جاستاردى تەحنيكالىق ماماندىقتارعا باۋلۋ.
قالالىق «شىعىس جاستارى» قوعامدىق قورى ۇيىمداستىرعان فەستيۆالگە شاھاردىڭ ءىرى ونەركاسىپ ورىندارىنىڭ ماماندارى قاتىسىپ, جاستارعا بوس جۇمىس ورىندارىن ۇسىندى. سونىمەن بىرگە ولارعا وندىرىستىك تاجىريبە مەن جۇمىسقا ورنالاسۋ جايىندا اقپارات بەرىلدى.
– فەستيۆالگە 16 ءىرى زاۋىت قاتىستى. نەگىزى, 20 دەپ جوسپارلاعانبىز. «كازپولگيراف», «Qazaq-Astyq Group» سىندى سەمەيدەگى اۋقىمدى زاۋىتتاردىڭ ءبارى تارتىلعان, – دەيدى «شىعىس جاستارى» قوعامدىق قورىنىڭ اتقارۋشى ديرەكتورى ءالىبي ءابدۋرايموۆ.
اباي وبلىسىنىڭ ەڭبەك موبيلدىلىگى ورتالىعى دا فەستيۆالگە بەلسەنە قاتىسىپ, وڭىردەگى ەڭبەك نارىعىنىڭ احۋالى, سۇرانىسقا يە ماماندىقتار تۋرالى تالداۋ جۇرگىزىپ, 300-گە جۋىق بوس جۇمىس ورنىن ۇسىندى. سونىمەن قاتار قالا اكىمىنىڭ ورىنباسارى قۋانىش ابىلداەۆ شاھاردىڭ الەۋمەتتىك-ەكونوميكالىق دامۋىنا ۇلەس قوسىپ جۇرگەن ەڭبەكشى جاستارعا العىسحاتتار تابىستاپ, ولاردىڭ ەڭبەگىنە لايىقتى باعا بەردى. بىلىكتى قىزمەتكەرلەر اراسىندا قۇرىلىسشىلار, كوممۋنالدىق كاسىپورىن ماماندارى, تەمىرجولشىلار, ەلەكتر شەبەرلەرى, تسەح جۇمىسشىلارى دا بار.
– جاستاردىڭ ەڭبەككە دەگەن ىقىلاسى, كاسىبي شىڭدالۋعا ۇمتىلىسى – قالا دامۋىنىڭ كەپىلى. بۇگىنگى فەستيۆال – جۇمىسشى ماماندىقتاردىڭ قوعامداعى بەدەلىن ارتتىرۋعا باعىتتالعان ماڭىزدى قادام, – دەپ سانايدى ق.ابىلداەۆ.
ەڭبەك فەستيۆالىنە قاتىسقان تەحنيكالىق كوللەدجدىڭ تۇلەگى ابايبەك يمانوۆ جارمەڭكە بارىسىندا وندىرىستىك كاسىپورىنمەن الدىن الا كەلىسىم جاساپ, تاجىريبەدەن وتۋگە مۇمكىندىك الدى.
– مەن ەلەكترمەحانيك ماماندىعى بويىنشا وقىدىم. قازىر اۆتوماتتاندىرىلعان ستانوكتار مەن قۇرىلعىلار كوپ, سولارمەن جۇمىس ىستەي الامىن. بۇگىنگى جارمەڭكەدە ءبىر كاسىپورىن وكىلدەرىمەن سويلەسىپ, الداعى ايدا تاجىريبەدەن وتۋگە كەلىسىم جاساستىم. قابىلەت-قارىمىمدى كورسەتە السام, جۇمىسقا قابىلداۋعا دايىن ەكەنىن ايتتى, – دەيدى ول.
ماماندىقتار جارمەڭكەسى كونتسەرتتىك باعدارلاماعا ۇلاستى. وسىلايشا, جۇمىس ىزدەۋشى جاستار مەن ءبىلىم الۋشىلار جارمەڭكەدە ءتۇرلى جۇمىس ورنىمەن تانىسىپ, جۇمىس بەرۋشىلەرمەن تىكەلەي اڭگىمەلەستى. قىسقاسى,ەڭبەك فەستيۆالى تالاي جاستىڭ قانات جايۋىنا سەپ بولادى دەگەن سەنىمدەمىز.
اباي وبلىسى