قۇربان ايت كەزىندە ەلىمىزدە قايىرىمدىلىق جاساۋ, مۇقتاجدارعا قولۇشىن بەرۋ ءىسى جىل سايىن ورىستەپ كەلەدى. مۇسىلمان مەرەكەسى ۇلتتىق جادىمىزدا جاڭعىرىپ, كەشىرىم مەن قايىرىمدىلىق مەرەكەسىنە اينالىپ وتىر.
ادەتتە, قۇربان ايتتا جاعدايى جەتەتىن مۇسىلماندار قۇرباندىق شالادى. كوبىنەسە قوي, كەيدە سيىر نەمەسە تۇيە شالىنادى. قۇربان مالدىڭ ەتى ۇشكە ءبولىنىپ, قۇربان شالۋشى ەتتىڭ ءبىر بولىگىن مۇقتاج جاندارعا, تاعى ءبىر بولىگىن تۋعان-تۋىسى مەن كورشىلەرگە بەرەدى. قالعان بولىگىن ءوز وتباسىنا قالدىرادى.
ءداستۇرلى مۇسىلمان مەرەكەسىندە ەلىمىز قۇربان شالۋدان بولەك قايىرىمدىلىق اكتسيالارىن ۇيىمداستىرىپ, مۇقتاج وتباسىلارعا, جالعىزباستى قارتتارعا, كوپبالالى انالارعا ازىق-ت ۇلىك تاراتىپ ءجۇر. سوندىقتان دا بۇل كۇندى تەك ءدىني مەرەكە دەپ قانا ەمەس, بىرلىك پەن مەيىرىم مەرەكەسى دەپ تە اتايدى. ماسەلەن, بيىل مەرەكە قارساڭىندا اۆتوبۋس اپاتىنان قوس اياعىنان ايىرىلعان الۋا ەسىمدى قىزدىڭ وتباسىنا استانا قالاسىنىڭ اكىمدىگى جەكە دەمەۋشىمەن بىرلەسىپ ەلورداداعى جاڭا تۇرعىن ءۇي كەشەنىنەن 4 بولمەلى پاتەردىڭ سەرتيفيكاتىن تابىستادى. سونىمەن قاتار قۇربان مالدىڭ اقشاسىن زارداپ شەككەن قىزدىڭ اناسىنا جونەلتىپ وتىرعان جاناشىر جاندار دا بار. سونىڭ ءبىرى بەلگىلى پۋبليتسيست قاينار ولجاي اعامىز.
– بۇعان دەيىن ءدىني ءراسىم بويىنشا قۇرباندىق شالىپ, ۇشكە ءبولىپ, مۇقتاج جاندارعا تاراتاتىنمىن. ال بيىل قوعامداعى احۋالعا بايلانىستى قۇربان شالاتىن قارجىمدى زارداپ شەككەن قىزدىڭ اناسىنا اۋداردىم, – دەدى ول.
مەيىرىم مەرەكەسى قارساڭىندا وتكەن جىلدارى «مىڭ العىس» رەسپۋبليكالىق اكتسياسى اياسىندا ەل ازاماتتارى بىرلەسىپ, مۇقتاج 50 وتباسىنا كومەك قولىن سوزعان بولاتىن. ال باسپاناعا ءزارۋ كوپبالالالى وتباسىنا بەرىلىپ وتىرعان پاتەرلەر سانى دا جىل سايىن ارتىپ كەلەدى. وسىلايشا, ءاۋ باستان ار-يمانىن, وبال-ساۋابىن تۇگەندەگەن قازاق قوعامى ەلدىك, ۇلتتىق باعدارىن جاڭعىرتىپ وتىر.