قازاقستانداعى جەتەكشى ونەركاسىپتىك كومپانيالار – «Qarmet» اق مەن «قازمىرىش» اق وندىرىستىك قاۋىپسىزدىكتى ارتتىرۋ ماقساتىندا زاماناۋي تسيفرلىق تەحنولوگيالاردى ەنگىزۋدى جوسپارلار وتىر, دەپ حابارلايدى Egemen.kz.
ۇكىمەت وتىرىسىندا «Qarmet» اق باسقارما توراعاسى ۆاديم ءباسيننىڭ مالىمدەۋىنشە, كومپانيا جەراستى كومىر شاحتالارىندا بايلانىس جانە تۇرعىلاندىرۋ جۇيەسىن كەزەڭ-كەزەڭىمەن ەنگىزىپ جاتىر. قازىرگى تاڭدا «ساران» جانە «لەنين اتىنداعى» شاحتالاردا بۇل جۇيە تولىق ورناتىلعان. جالپى العاندا, ءتورت شاحتا زاماناۋي جۇيەمەن جابدىقتالعان. 2025 جىلدىڭ سوڭىنا دەيىن كومىر دەپارتامەنتىنىڭ بارلىق سەگىز شاحتاسى جەراستى بايلانىس جانە تۇرعىلاندىرۋ جۇيەسىمەن قامتاماسىز ەتىلەدى.
«قازمىرىش» اق دا ەڭبەك قاۋىپسىزدىگىن ارتتىرۋ باعىتىندا تسيفرلىق قۇرالداردى بەلسەندى تۇردە ەنگىزىپ جاتىر. كومپانيا باس ديرەكتورى جانات ءجانبوتيننىڭ ايتۋىنشا, سوڭعى ۋاقىتتا وندىرىستەگى جاراقاتتانۋ جاعدايلارى 20%-عا ازايعان. بۇل جەتىستىككە OneApp اتتى ينتەگراتسيالانعان تسيفرلىق پلاتفورما كومەكتەسكەن.
ايتا كەتەيىك, OneApp – ءوزارا بايلانىسقان 13 مودۋلدەن تۇراتىن بىرىڭعاي جۇيە. ول وندىرىستەگى اۋىتقۋلاردى, تاۋەكەلدەردى, اۋديتتەر مەن رۇقساتتاردى باسقارۋ سەكىلدى ماڭىزدى ۇدەرىستەردى قامتيدى. قازىرگى تاڭدا پلاتفورمانىڭ 4000-نان استام بەلسەندى قولدانۋشىسى بار, جۇيەگە web-ينتەرفەيس ارقىلى دا, ءموبيلدى قوسىمشا ارقىلى دا قول جەتكىزۋگە بولادى.