«ءبىز – جەڭىس ۇرپاقتارىمىز» اكتسياسى «دوستار» مادەنيەت سارايىندا ءوتىپ, جۇرتشىلىق نازارىنداعى مەرەكەلىك شاراعا ۇلاستى. كوكشەتاۋداعى №5510 اسكەري ءبولىمى 72-ءشى گۆارديالىق اتقىشتار ديۆيزياسىنىڭ جاۋىنگەرلىك تۋىن سالتاناتتى جاعدايدا قابىلداپ الدى. ونى ستەپنوگور قالاسىنداعى №3517 اسكەري ءبولىمىنىڭ كومانديرى جارقىن ساپاريانوۆ تاپسىردى.
بۇل تۋ رەسەي قارۋلى كۇشتەرىنىڭ ورتالىق مۋزەيىندە ساقتاۋلى. ال ونىڭ كوشىرمەسى 2015 جىلدىڭ 10 قاڭتارىندا استاناداعى ۇلتتىق ۇلانعا قاراستى جەدەل بريگادانىڭ مۇراجايىنا ماڭگىلىك ساقتاۋعا بەرىلگەن ەدى. بۇل تۋ ۇلتتىق ۇلاننىڭ وڭىرلىك بولىمدەرى ورنالاسقان بارلىق 25 ەلدى مەكەندەگى مەرەكەلىك سالتاناتتاردىڭ بيىك تۇعىرىندا جەلبىرەيتىن بولادى. سونىمەن قاتار, وسىناۋ قىمبات جادىگەر وتانىمىزدىڭ استاناسىنداعى, 7 مامىر كۇنگى اسكەري شەرۋگە شىعارىلماق.
بۇل تۋ ءوزىنىڭ جاۋىنگەرلىك جولىن 29-شى ديۆيزيا جاۋىنگەرلەرىنىڭ قورشاۋدان شىعۋ وپەراتسياسىنداعى رۋحىن كوتەرگەن بولاتىن, – دەدى كوكشەتاۋداعى №5510 اسكەري ءبولىمنىڭ كومانديرى, پودپولكوۆنيك جانبولات تولەگەنوۆ. – ودان ءارى تۋ اقمولادا جاساقتالعان 72-ءشى گۆارديالىق اتقىشتار ديۆيزياسىنىڭ جەڭىستى جولدارىنا ەكپىن بەردى. اتالعان ديۆيزيا ستالينگراد شايقاسىندا ەرلىك ونەگەسىن تانىتقانى تاريحتان ءمالىم. سونداي-اق, كۋرسك دوعاسىنداعى, حاركوۆ, مەرەفۋ, كراسنوگراد, كيروۆوگراد, دنەپر, رۋمىنيا, ترانسيلۆانيا, ۆەنگريا, اۆستريا, چەحوسلوۆاكيا, تاعى باسقا قالالار مەن ەلدەردى ازات ەتۋ ۇرىستارىندا جاۋىنگەرلىك تۋ العى شەپتە بولدى. سوعىس جىلدارىندا گۆارديالىق ديۆيزيانىڭ 18 مىڭ جاۋىنگەرى مەن وفيتسەرى وردەن, مەدالدارمەن ماراپاتتالسا, 31 كىسى كەڭەس وداعىنىڭ باتىرى اتاعىنا يە بولدى.
سالتاناتتى جيىنعا قاتىسۋشىلاردى اقمولا وبلىسى اكىمىنىڭ ورىنباسارى نۇرلان نۇركەنوۆ, اۋعان سوعىسى ارداگەرلەرى كەڭەسىنىڭ توراعاسى, زاپاستاعى پولكوۆنيك دۋانباي ىبىراەۆ, №5510 اسكەري ءبولىمدە قىزمەت اتقارىپ جاتقان جاۋىنگەرلەردىڭ اتا-انالارى قۇتتىقتادى.
باقبەرگەن امالبەك,
«ەگەمەن قازاقستان».
كوكشەتاۋ.