قازىرگى ۋاقىتتا استانانىڭ الدىڭعى قاتارلى مەديتسينالىق مەكەمەلەرى سوڭعى تەحنولوگيالار بويىنشا ازىرلەنگەن جاڭا قۇرال-جابدىقتارمەن جابدىقتالىپ جاتقاندىعى بەلگىلى. سونىڭ ءبىرى – «تراۆموتولوگيا جانە ورتوپەديا عىلىمي-زەرتتەۋ ينستيتۋتى» رمك.
جۋىقتا بۇل ينستيتۋتتا دەنە جاراقاتتارىن العان نەمەسە تۋا بىتكەن كەمتار ناۋقاستاردى ەمدەپ جازۋعا ارنالعان جاڭا مەديتسينالىق قۇرال-جابدىقتاردىڭ تانىستىرىلىمى جانە وسى وقيعاعا ارنالعان جۋرناليستەرمەن ءباسپاسوز ءماسليحاتى بولىپ ءوتتى. بۇل قۇرال-جابدىقتار «سامۇرىق-قازىنا» قورىنىڭ قارجىلاي قولداۋىمەن ساتىپ الىنعان ەكەن.
– قازىر وسىنداي جاڭا تەحنولوگياعا يە بولۋىمىزدىڭ ءناتيجەسىندە جۇمىسىمىز ءبىرشاما العا باستى. ومىرتقالارى زاقىمدانعان ناۋقاستاردى دا ەمدەۋ مۇمكىندىگىنە يە بولدىق. وسىعان بايلانىستى سوڭعى كەزدەرى بىزگە كەلىپ ومىرتقا كىناراتتارىنان ايىققان ادامدار سانى ارتۋدا, – دەدى وسى ءماسەلە جونىندە اڭگىمە قوزعاعان ينستيتۋت ديرەكتورى, «تراۆموتولوگتار مەن ورتوپەدتەردىڭ قازاقستاندىق اسسوتسياتسياسىنىڭ» توراعاسى نۇرلان باتپەنوۆ.
ءباسپاسوز ءماسليحاتىندا ەلىمىزدە جىل سايىن 250-گە تارتا ادامنىڭ ءوز دەنە قۇرىلىستارىن تۇزەتۋ ءۇشىن جوعارى ساپالى مەديتسينالىق كومەك پەن وتا جاساۋدى قاجەت ەتەتىندىگىن, ولاردىڭ 210-ى بالالار مەن جاسوسپىرىمدەر ەكەنىن بىلدىك. ەندى, مىنە, ChM, Medtronic, Expedium سەكىلدى كومپانيالاردىڭ جاساپ شىعارعان دەنە تۇزەتۋ قۇرال-جابدىقتارىنىڭ ناتيجەسىندە وسى پروبلەما شەشىمىن تاپپاق.
نۇرلان باتپەنوۆ وسى جاعدايلاردى ايتا كەلە وسىنداي باعالى قۇرالدارعا قول جەتكىزۋگە كومەك جاساعان «سامۇرىق-قازىنا» قورىنا ۇلكەن العىسىن ءبىلدىردى.
سۇڭعات ءالىپباي,
«ەگەمەن قازاقستان».