كورنەكتى جازۋشى, تاريحشى, ەتنوگراف, فولكلورشى زەينوللا سانىكتىڭ 90 جىلدىق مەرەيتويىنا وراي ۇيىمداستىرىلعان ء«سوز عۇمىر» اتتى رەسپۋبليكالىق جاستار سايىسى ءوتتى.
ز.سانىك اتىنداعى مادەنيەت قورى جانە Shakarim University بىرلەسە وتكىزگەن ءداستۇرلى سايىسقا ەلىمىزدىڭ جوعارى وقۋ ورىندارىنان 20 ءبىلىم الۋشى قاتىستى.
«زەينوللا سانىك تاعىلىمى» اتتى جىر ءمۇشايراسى, زەينوللا سانىكتىڭ تاريحي شىعارمالارىنان كوركەمسوز وقۋ سايىسى جانە ء«سوز زەرگەرى – زەينوللا سانىك» تاقىرىبىندا ەسسە جازۋدان سىنعا تۇسكەن جاستاردىڭ بىلىمدەرى مەن شىعارماشىلىقتارىنا قوردىڭ اتقارۋشى ديرەكتورى سەرىك قاليەۆ, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى انارباي بۇلدىباي باستاعان عالىم, وقىتۋشىلار قازىلىق ەتتى.
«سايىسقا ەلىمىزدىڭ تۇكپىر-تۇكپىرىنەن تالاپتى, تالانتتى ستۋدەنتتەر قاتىسىپ وتىر. زەينوللا سانىك بۇكىل سانالى عۇمىرىن باسپا سالاسىنا, ەل مۇراسىن جيناۋعا ارنادى. سوڭعى دەمى ۇزىلگەنشە قولىنان قالامى تۇسپەگەن قارىمدى قالامگەر. جىل سايىن ءداستۇرلى تۇردە وتكىزىلىپ كەلە جاتقان سايىس بيىل جازۋشىنىڭ 90 جىلدىق مەرەيتويىنا ارنالدى. سوندىقتان بۇل بايقاۋدىڭ ءباسى بيىك. ويتكەنى ءار وقۋ ورنىنان تەك ءبىر عانا ۇمىتكەر قاتىسىپ, ءمۇشايرا, كوركەمسوز وقۋ جانە ەسسە جازۋ سىندى ءۇش اتالىم بويىنشا باق سىناپ وتىر», دەدى اقىن سەرىك قاليەۆ.
سايىس بارىسىندا ستۋدەنتتەر بىلىمدەرى مەن دايىندىقتارىن جوعارى دەڭگەيدە كورسەتە ءبىلدى. سونىمەن, تارتىستى بايگەنىڭ باس جۇلدەسىن م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ ستۋدەنتى نۇراي قاليحانوۆا جەڭىپ الدى. ءى ورىنعا س.امانجولوۆ اتىنداعى شىعىس قازاقستان ۋنيۆەرسيتەتىنىڭ ستۋدەنتى بەكارىس سەكەنوۆ لايىق دەپ تانىلدى. مادەني ءىس-شارا اياسىندا اباي كىتاپحاناسىندا «ۇلتتىق قۇندىلىق. قازاق ەتنوگرافياسى جانە جازۋشى, ەتنوگراف زەينوللا سانىك – 90 جىل» اتتى رەسپۋبليكالىق ەكسپەديتسيا مۇشەلەرىمەن كەزدەسۋ ۇيىمداستىرىلىپ, عالىمدار Shakarim University-ءنىڭ ستۋدەنتتەرىنە «تابىستى تۇلعانىڭ ءدارىسى» اتتى لەكتسيا وقىدى.
اباي وبلىسى