ونەردىڭ شەكاراسى – ولشەۋسىز. وسى ءبىر ونەگەلى ءسوزدىڭ جارقىن ايعاعى - قازاقستاننىڭ ساڭىراۋلار قوعامىنىڭ جانىنان قۇرىلعان «SILENSE» بي تەاترى. قۇلاعى ەستىمەي, ىممەن عانا سويلەسەتىن جانداردان قۇرالعان شىعارماشىلىق ۇجىم ءۇشىن بۇل «ەرەكشەلىك» بيمەن كاسىبي تۇرعىدا اينالىسۋعا كەدەرگى ەمەس, دەپ جازادى Egemen.kz.
«SILENSE» بي تەاترىنىڭ نەگىزى 2004 جىلى قالانعان. شيرەك عاسىرعا جۋىق ۋاقىتتا قۇرام جاڭارىپ, تۇرلەنىپ وتىرعانمەن شىعارماشىلىق جول توقىراعان جوق. بۇگىندە بۇل ۇجىمدا 6 «ەرەكشە قىز» تەر توگەدى. ولاردىڭ تالانتىن تانىپ, جىگەرىن جاني ءتۇسۋ ءۇشىن بي-تەاترى 2023 جىلى جاڭا فورماتتا جانداندى. سول تۇستان تالاپتى قىزداردى «مادەنيەت سالاسىنىڭ ۇزدىگى», حورەوگراف تۇرلىبەكوۆا بوتاگوز باپتاۋدا. تۇرلىبەكوۆا بوتاگوز - ءومىرىن بيگە بايلاپ, شىمكەنتتەگى م.اۋەزوۆ ۋنيۆەرسيتەتىنىڭ «حورەوگرافيا» ماماندىعىن تامامداعان. 20 جىلدان بەرى جاس بۋىننىڭ ونەرىن ورلەتۋگە دەن قويعان. بۇگىندە ارنايى بي ستۋدياسىن اشىپ, «ەرەكشە» قىزداردى دا بيگە باۋلىپ ءجۇر.
«بۇل بي تەاترىندا تەك قۇلاعى ناشار ەستيتىن جاندار بيلەيدى. العاشىندا, بۇل توپقا كونكۋرستار ءۇشىن عانا بي قويىپ ءجۇردىم. سول بايقاۋلاردان ىلعي دا جۇلدەلى ورىندارمەن ورالدى. قىزدارمەن جاقىن تانىسا كەلە ىشكى جان-دۇنيەسىن ءتۇسىنىپ, بيگە دەگەن قۇشتارلىقتارىنىڭ بيىك ەكەنىن بايقادىم. جەتەكشىلىك ەتۋ مىندەتىن موينىما الىپ, توپ الدىنا ماڭىزدى مەجەلەردى بەكىتىپ, ەتەنە ىسكە كىرىسىپ كەتتىك», دەگەن بوتاگوز سەرىكقىزىنىڭ ءار ىسىنەن ماماندىعىنا دەگەن ماحاببات سەزىلەدى. ول ەرەكشە قىزدارمەن ءتۇسىنىسۋ ءۇشىن ماقساتتى تۇردە ىم-يشارا ءتىلىن دە مەڭگەرگەن.
«بۇل بالالارعا ويىڭدى جەتكىزۋ قيىنداۋ ەكەنى ءمالىم. ادەتتە بي ۇيرەتكەندە وبراز ارقىلى, تىلمەن سۋرەتتەپ جەتكىزەمىز. ولارعا ونى ايتا المايتىن بولعاندىقتان ىم-يشارا ءتىلىن قولدانۋ كەرەك. بالالاردىڭ جانىن تەرەڭ ءتۇسىنۋ ءۇشىن وسى ءتىلدى ارنايى كۋرسقا بارىپ ۇيرەنىپ, مەڭگەرىپ شىقتىم. اسىلىندا, ءبيدى قيمىل مەن يشارا قۇرايدى. سوندىقتان اسا كەدەرگى جوق. كەيدە مەنىڭ قاتەلەسكەن تۇسىمدى قىزدار تولىقتىرىپ, ءتىلسىز-اق ءتۇسىنىسىپ كەلەمىز», دەيدى حورەوگراف مامان.
قىزدار بوتاگوز سەرىكقىزىنىڭ كومەگىمەن اپتاسىنا ءۇش رەت شەبەرلىگىن شىڭدايدى. تالماي ەڭبەك ەتە ءجۇرىپ قورجىندارىن 9 بي قويىلىممەن تولىقتىرعان. ونىڭ تورتەۋى ىم-يشاراعا نەگىزدەلگەن.
قىزداردىڭ ءوزارا ۇيىمشىلدىعى مەن ءبىر-ءبىرىن قولداۋى دا ءاردايىم جەڭىس تۇعىرىنان تابىلۋعا سەپتەسىپ ءجۇر. بەكەم بىرلىگىنىڭ ارقاسىندا بي ۇجىمى ورال قالاسىندا وتكەن ء«سىزدى بيگە شاقىرامىز» اتتى رەسپۋبليكالىق بي بايقاۋ-فەستيۆالىندە ۇلتتىق بي اتالىمى بويىنشا گران پري, زاماناۋي بي اتالىمى بويىنشا 3-ورىندى باعىندىرعان. سونداي-اق, استانادا ۇيىمداستىرىلعان «MEGA-STAR» شىعارماشىلىق بايقاۋىندا «باس جۇلدەنى» جەڭىپ الىپ, گەرمانيا, ەگيپەت ساحنالارىندا ونەر كورسەتۋگە جولداما العان. شەكتەۋلى مۇمكىندىك شەكاراسىن كەسىپ وتكەن «SILENSE» بي تەاترى ساۋ بالالار اراسىندا دا توپ جارىپ ءجۇر.
بوتاگوز سەرىكقىزىنىڭ ايتۋىنشا, ەرەكشە جانداردى بيگە باۋلۋ حالىقارالىق دەڭگەيدە «بي-قيمىل تەراپياسى» دەپ اتالادى. اتاۋى استارلاپ تۇرعانداي مۇندا بي ارقىلى جاندى ەمدەۋ - نەگىزگى نىسانا. «SILENSE» بي تەاترىنىڭ مۇشەسى ارۋجان اسقاروۆا ۇستازدارى بۇل مىندەتتى ءۇنسىز ۇعىنىپ جۇرگەنىن جەتكىزدى.
«ۇستازىمىز وتە مەيىرىمدى ادام. ءبىزدى قيىندىقتا قالدىرعان ەمەس. ءاردايىم شابىتتاندىرىپ, العا ۇمتىلدىرادى. وسىنداي قارىم-قاتىناسىنا قارىمتا رەتىندە قىزدار دا قاراپ قالماي بارىن سالادى», دەدى ول.
بي تەاترىنىڭ ۇجىمى 2024 جىلى العاشقى ەسەپ بەرۋ كەشىندە كوپشىلىك تاراپىنان جوعارى قولداۋ-قوشەمەتكە يە بولعان. ەندى شىعارماشىلىق توپ شىڭدالا ءتۇسىپ, كورەرمەن سەنىمىنە سەلكەۋ تۇسىرمەۋدى ماقسات ەتىپ وتىر.