سىرت كوز سىنشى. العاش الاش شاھارىنا كەلگەندە كوشەنىڭ شاڭىنان كوز اشا المايتىن ەدىك. وبلىس ورتالىعىنىڭ تازالىعىنا جاۋاپتىلاردى ايماق باسشىسى دا اياماي سىنعا الدى. ناتيجەسىندە قازىر تەك سەمەي قالاسى عانا ەمەس, ءوڭىردىڭ ءوڭى كىرە باستاعانى سەزىلەدى.
مەملەكەت باسشىسى: «قالالار مەن اۋىلداردىڭ ساۋلەتتى, ساياباقتار مەن اۋلانىڭ تازا بولۋى, ەڭ الدىمەن, باسقاعا ەمەس, وزىمىزگە كەرەك», دەگەن ەدى. وسىعان وراي, بيىل 4 ءساۋىر كۇنى اباي وبلىسىنىڭ اكىمى بەرىك ءۋالي ءوڭىر تۇرعىندارىنا بەينە ۇندەۋ جاساپ, اباي وبلىسىنىڭ ءاربىر تۇرعىنىن تۋعان جەردىڭ تازالىعىنا, كوركەيۋىنە بىرگە ۇلەس قوسۋعا شاقىردى.
«اباي وبلىسى ۇلى تۇلعانىڭ اتىمەن اتالعان, الاش ارىستارىنىڭ ءىزى قالعان تاريحى تەرەڭ, تابيعاتى كوركەم ءوڭىر. بۇل – ءبىزدىڭ ورتاق ءۇيىمىز. ونى تازا, جايلى, كورىكتى ەتىپ ۇستاۋ – ارقايسىمىزدىڭ ازاماتتىق بورىشىمىز. شىن مانىندە, ءبىزدىڭ ايماق توعىز جولدىڭ تورابىندا تۇر. ەرتىستىڭ ەكى جاعاسىن جالعاعان جالعىز كوپىردەن ەكى الىپ كورشىمىزگە قاراي كولىك اعىنى وتەدى. بۇل تۇرعىدان العاندا سەمەيىمىز ايماقتىق كولىك-لوگيستيكالىق حابقا اينالىپ كەلەدى. بۇل بىزگە ۇلكەن مۇمكىندىك بەرگەنىمەن, زور جاۋاپكەرشىلىك تە جۇكتەيدى. شاھارىمىزدىڭ تازالىعى مەن ايماعىمىزدىڭ ابىرويى سىنالاتىن دا وسى تۇس. ايماق ەكونوميكاسى, ونەرى مەن مادەنيەتى, ەكولوگياسى مەن تازالىعى – بارشامىزعا ورتاق. ال تازالىق دەگەنىمىز – جىلىنا ءبىر رەت سەنبىلىككە قاتىسۋ ەمەس, بۇل – ءبىزدىڭ وڭىردە قالىپتاسۋى ءتيىس ۇلكەن مادەنيەت», دەگەن ەدى وبلىس اكىمى.
ۇندەۋگە ءۇن قوسقان اباي جۇرتشىلىعى تازالىققا راسىندا مىقتاپ كىرىستى دەسە دە بولادى. ماسەلەن, تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ وكىلى بەكبولات مۇراتوۆتىڭ ايتۋىنشا, اباي وبلىسىندا «تازا قازاقستان» باعدارلاماسى قارقىندى ءجۇرىپ جاتىر.
«كوكتەمگى ەكى ايلىق تازالىق مارافونى بارىسىندا ءوڭىر تۇرعىندارى بەلسەندى قاتىسىپ, اباتتاندىرۋ جۇمىستارى جۇرگىزىلدى. ءساۋىر ايىنىڭ وزىندە اكتسياعا 100 مىڭنان استام تۇرعىن قاتىسىپ, قالالار مەن اۋىل كوشەلەرى تازارتىلىپ, اباتتاندىرىلىپ جاتىر. سونىمەن قاتار, پوليگوندارعا 20 مىڭ توننادان استام قالدىق شىعارىلىپ, 500-دەن استام سۋ ايدىنى تازارتىلدى, ولاردىڭ جاعالاۋىنا ونداعان مىڭ جاڭا كوشەت وتىرعىزىلدى. تەك «سەمەي ورمانى» رەزەرۆاتىنىڭ وزىندە عانا 1,5 گەكتار اۋماقتا جاستار مەن كورپوراتيۆتىك ەرىكتىلەردىڭ قاتىسۋىمەن كوشەت وتىرعىزۋ اكتسيا ءوتتى», دەدى ول.
ال 26 ساۋىردەگى تال ەگۋ كۇنىنە وراي, وبلىس اۋماعىندا 23 مىڭنان استام كوشەت ەگىلگەن.
بەكبولات مۇراتوۆتىڭ ايتۋىنشا, ەڭ وزەكتى ماسەلەلەردىڭ ءبىرى بولىپ كەلگەن – قوقىس ۇيىندىلەرى. عارىشتىق مونيتورينگ جۇمىستارىنىڭ ناتيجەسىندە 266 قوقىس ورنى انىقتالىپ, وبلىس كولەمىندە ونداي ۇيىندىلەر تولىعىمەن جويىلعان.
كەشە وبلىس اكىمى سەمەي قالاسىنداعى كوممۋنالدىق تەحنيكالاردىڭ جۇمىسىن تەكسەردى. شاھارداعى تازالىق جۇمىستارىن كۇشەيتۋ ءۇشىن مەردىگەر كومپانيالارمەن بىرلەسىپ 60-قا جۋىق جاڭا ارنايى تەحنيكا ساتىپ الۋ جوسپارلاندى. بۇگىندە 10 جاڭا تەحنيكا ىسكە قوسىلدى. بۇل ءوز كەزەگىندە 100-گە جۋىق جاڭا جۇمىس ورنىن قۇرۋعا مۇمكىندىك بەرەدى.
«قالا تازالىعىنا بايلانىستى تۇرعىندار تاراپىنان از شاعىم ايتىلمايدى. سوندىقتان بۇل باعىتتاعى جۇمىستى جانداندىردىق. الداعى ۋاقىتتا وبلىس ورتالىعىندا ارنايى تەحنيكالاردىڭ سانىن كوبەيتەمىز. قالا كەلبەتىن جاقسارتۋ, تازالىقتى ساقتاۋ كۇندەلىكتى جانە جۇيەلى جۇمىستى قاجەت ەتەدى», – دەدى ايماق باسشىسى.
ارنايى تەحنيكالار قىستا قار كۇرەپ, كوكتەم, كۇز ايلارىندا جولداردى جۋىپ-تازالاۋعا, كوشەلەردى سىپىرۋعا, قۇم سەبۋگە ارنالعان. ال جاڭا تەحنيكالار قالانىڭ ورتالىق كوشەلەرىنەن باستاپ, بارلىق شاعىن اۋداندار مەن تۇرعىن ءۇي كەشەندەرىن تازالاۋعا جۇمىلدىرىلاتىن بولادى.
اباي وبلىسى