ماڭعىستاۋدا 2025 جىلى توعىز «جايلى مەكتەپ» پايدالانۋعا بەرىلەدى, بۇل وقۋشى سانى ارتىپ, مەكتەپكە سىيىمدىلىق ماسەلەسى تۋىنداعان ايماق ءۇشىن ۇلكەن جاڭالىق. وتكەن جىلى, ياعني 2024 جىلدىڭ جەلتوقسان ايىندا 4 500 ورىندىق 4 مەكتەپ پايدالانۋعا بەرىلگەن ەدى. ال جاڭا وقۋ جىلىندا ىسكە قوسىلاتىن «جايلى مەكتەپتەر» 8 100 وقۋشىعا قۇشاعىن ايقارا اشاتىن بولادى.
ناقتىراق ايتساق, اتالعان توعىز «جايلى مەكتەپتىڭ» ۇشەۋى – اقتاۋ قالاسىندا, بىرەۋى – جاڭاوزەن قالاسىندا, ەكەۋى – بەينەۋ اۋدانىندا, ەكەۋى – مۇنايلى اۋدانىندا, بىرەۋى ماڭعىستاۋ اۋدانىندا اشىلادى.
– بۇگىندە وبلىستا «جايلى مەكتەپ» ۇلتتىق جوباسى اياسىندا 8 100 وقۋشى ورنىنا ارنالعان توعىز جاڭا مەكتەپتىڭ قۇرىلىسى ءجۇرىپ جاتىر. بۇل توعىز مەكتەپ جاڭا وقۋ جىلىندا ىسكە قوسىلادى. سونىمەن قاتار مەملەكەت باسشىسىنىڭ 1 300 مەكتەپتى جاڭعىرتۋ جونىندەگى تاپسىرماسىنا سايكەس وبلىس بويىنشا 21 مەكتەپكە كۇردەلى جوندەۋ جۇمىسى جۇرگىزىلەدى. بۇل جۇمىستى 2025–2027 جىلدار ارالىعىندا تولىق اياقتاۋ كوزدەلىپ وتىر, دەيدى ماڭعىستاۋ وبلىستىق ءبىلىم باسقارماسى باسشىسىنىڭ ورىنباسارى گۇلبانۋ قىزىلعۇلوۆا.
سونداي-اق باسقارما باسشىسى ورىنباسارىنىڭ ايتۋىنشا, وڭىردە جىل باسىنان بەرى ءۇش بالاباقشا اشىلعان.
– مەكتەپكە دەيىنگى تاربيە مەن وقىتۋ سالاسىندا 2025 جىلى 17 جاڭادان بالاباقشا اشىلىپ, 4 410 ورىنعا دەيىن قامتۋ مۇمكىندىگى قاراستىرىلعان. سونىمەن قاتار مەملەكەت-جەكەشەلىك ارىپتەستىك ارقىلى اقتاۋ قالاسىنداعى 18 جانە 34-شاعىن اۋداندارى مەن مۇنايلى اۋدانىندا ءۇش مەكتەپكە دەيىنگى ۇيىم قۇرىلىسىن جۇرگىزۋ جونىندە جەكە ينۆەستورلاردان ۇسىنىس ءتۇستى, دەيدى ول.
قۇزىرلى ورىنداردىڭ بەرگەن مالىمەتىنە سەنسەك, جاڭا وقۋ جىلىندا سەگىز مىڭنان استام وقۋشى كەڭ دە تازا, بيىك تە جارىق سۋ جاڭا زاماناۋي مەكتەپتىڭ تابالدىرىعىن اتتايدى.
ماڭعىستاۋ وبلىسى