گەنەرال-مايور بەكايدار قازكەەۆ ساربازداردى جەڭىستىڭ 80 جىلدىق مەرەكەسىمەن قۇتتىقتاپ, ىزگى تىلەگىن ارنادى, دەپ حابارلايدى Egemen.kz.
بۇل مەيرام – حالقىمىزدىڭ رۋحىن جاڭعىرتىپ, ەلدىك تاريحىمىزدىڭ ماڭگىلىك پاراعىنا التىن ارىپپەن جازىلعان كۇن. قازاق حالقى بۇل جەڭىسكە ەرەكشە ەرلىگىمەن, ماڭداي تەرىمەن, جانقيار ەڭبەگىمەن ءوز ۇلەسىن قوستى. بۇل سوعىس ۇلتتىڭ جىگەرى مەن رۋحىن سىنعا سالعان كۇردەلى كەزەڭ بولدى. سول جىلدارى ءار قازاقتىڭ شاڭىراعىنا سوعىس سىزاتى ءتۇستى. ءبىرى مايدان دالاسىندا وققا كەۋدەسىن توسسا, ەكىنشىسى تىلدا تىنىمسىز ەڭبەك ەتىپ جەڭىس كۇنىن جاقىنداتۋعا ءوز ۇلەسىن قوستى. ەڭكەيگەن قاريادان ەڭبەكتەگەن بالاعا دەيىن ەل بولاشاعى ءۇشىن ايانباي تەر توگىپ, ناتيجەسىندە جەڭىس تۋى جەلبىرەپ, بەيبىت ءومىردىڭ تاڭى اتتى. وتان كۇزەتىندە تۇرعان, تىنىشتىق پەن ءتارتىپ ساقشىسى بولىپ جۇرگەن «ۇلتتىق ۇلان» ساربازدارى – سول مايدانگەر اتا-اجەلەردىڭ ءىسىن جالعاستىرىپ جۇرگەن بۇگىنگى باتىرلار.
«بۇگىندە بەيبىت كۇننىڭ ءار تاڭى – سول بوزداقتاردىڭ جانقيارلىعى مەن جانپيدا ەرلىگىنىڭ جەمىسى. جەڭىس جولىندا قان كەشكەن اتا-بابامىزدىڭ ەرلىگى – بۇگىنگى ۇرپاقتىڭ رۋحاني تەمىرقازىعىنا اينالىپ وتىر. ارينە, جىلدار وتكەن سايىن مايدانگەرلەر قاتارى ازايىپ كەلەدى. الايدا ولاردىڭ ەرلىگى مەن ەڭبەگى – ەل جادىندا, ونەگەسى – ۇرپاق ساناسىندا ماڭگى ساقتالاتىنىنا سەنەمىن» دەدى گەنەرال-مايور بەكايدار قازكەەۆ.