بۇگىن جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە ايىپتاۋ جونىندەگى ءىس بويىنشا كەزەكتى اشىق سوت وتىرىسى ءوتىپ جاتىر. سوت وتىرىسى جوعارعى سوتتىڭ Youtube ارناسىنان تىكەلەي ەفيردە ونلاين كورسەتىلۋدە, دەپ جازادى Egemen.kz.
كەزەكتى سوت وتىرىسى كۋاگەر ەلميرا نۇربەكوۆادان جاۋاپ الۋدان باستالدى. كۋاگەر سوت وتىرىسىندا اۋدارماشىنىڭ كومەگىنە جۇگىنىپ, ورىس تىلىندە جاۋاپ بەردى.
سوت بارىسىندا ەلميرا نۇربەكوۆانىڭ تەرگەۋ كەزىندەگى جاۋابى مەن جابىرلەنۋشى نۇرىموۆپەن بەتتەسۋى كورسەتىلدى.
كۋاگەر نۇربەكوۆانىڭ تەرگەۋ جانە سوت وتىرىسىنداعى جاۋاپتارىندا قاراما-قايشىلىق بولعانىنا بايلانىستى قويىلعان ساۋالدارعا كۋا «سول ساتتە شوك جاعدايىندا بولدىم» دەپ جاۋاپ بەردى.
«ەكى كۇن قاتارىنان ۇستادى. سۋ, تاماق ىشپەدىك. بىزدەن ەكى كۇن بويى 100-گە جۋىق ادام جاۋاپ الدى. مەن جاۋاپتى ورىسشا بەردىم. ولار قازاق تىلىنە اۋداردى. مەن ول كەزدە قول قويىپ, ۇيگە قايتۋدى عانا ويلادىم», دەدى كۋاگەر ەلميرا نۇربەكوۆا.
قازىر سوتتا كۋاگەردىڭ وقيعا ورنىندا بەرگەن جاۋابى كورسەتىلىپ جاتىر.
ايتا كەتەيىك, شەرزات پولاتتىڭ ولىمىنە بايلانىستى ىستە 9 ايىپتالۋشى بار. سوت وتىرىسى 29 ءساۋىر كۇنى دە ونلاين كورسەتىلەدى.