اقمولا وبلىسىندا سۋمەن جابدىقتاۋ جۇيەسى سالىنادى

ۇكىمەتتىڭ ءباسپاسوز قىزمەتىنىڭ مالىمەتىنشە, قوسشى قالاسىنداعى سۋ قۇبىرى جۇيەسىنىڭ قۇرىلىسىن اياقتاۋعا 476,7 ملن تەڭگە بولىنگەن. جوبانى ىسكە اسىرۋ ناتيجەسىندە حالىق 100% ورتالىقتاندىرىلعان سۋمەن قامتىلادى. قازىرگى تاڭدا شامامەن 50 شاقىرىم قۇبىر تارتىلعان. جالپى, جەلىلەردىڭ ۇزىندىعى 64,1 شاقىرىم بولادى دەپ جوسپارلانىپ وتىر. نىساندى جىل سوڭىنا دەيىن تاپسىرۋ كوزدەلگەن.

قولدانىستاعى ينجەنەرلىك جەلى 30 مىڭ تۇرعىنعا ەسەپتەلگەن. ال رەسمي دەرەككە سەنسەك, بۇگىندە قوسشىدا 50 مىڭنان استام ادام تىركەلگەن. قالانىڭ باس جوسپارى بويىنشا 2038 جىلعا قاراي تۇرعىندار سانى 150 مىڭنان اسادى دەپ بولجانىپ وتىر.

ال ماكينسك قالاسىندا سۋ قۇبىرى جەلىلەرىن قايتا جاڭارتۋ جۇمىستارى جۇرگىزىلۋدە. جوبا بويىنشا 72,7 شاقىرىم جەلى تارتۋ قاراستىرىلعان. بۇعان دەيىن بولىنگەن قاراجات ەسەبىنەن بۇگىندە 45 شاقىرىمدا جۇمىس اياقتالعان. ارناۋلى مەملەكەتتىك قوردان بولىنگەن 606,4 ملن تەڭگە جوبانى تولىق اياقتاپ, حالقى 18 مىڭنان اساتىن قالانى ورتالىقتاندىرىلعان سۋمەن قامتاماسىز ەتۋگە مۇمكىندىك بەرەدى.

ايتا كەتەيىك, بۇگىنگى تاڭدا ارناۋلى مەملەكەتتىك قوردان ءبىلىم بەرۋ, دەنساۋلىق ساقتاۋ, سپورت, الەۋمەتتىك قامسىزداندىرۋ, ينجەنەرلىك جەلىلەر مەن سۋ قۇرىلىستارىن جاڭارتۋ سياقتى سالالارداعى 280-گە جۋىق جوبانى ىسكە اسىرۋعا قاراجات ءبولىندى.