بۇگىندە ەلىمىز حالىق سانى ەڭ كوپ ەل سانالاتىن ءۇندىستاننىڭ تۋريزم نارىعىنداعى نەگىزگى كومپانيالارمەن بەرىك بايلانىس ورناتقان. وسىعان قوسا, ەكى ەل اراسىندا تىكەلەي اۋە قاتىناسى كوبەيگەن, دەپ جازادى Egemen.kz.
قازاقستان ەۋرازيانىڭ تۋريستىك كارتاسىندا ءوز مارتەبەسىن نىعايتىپ كەلەدى. بىلتىردىڭ وزىندە ءۇندىستاننان كەلۋشىلەر سانى ەكى ەسەگە جۋىق ارتىپ, 78 مىڭنان 146 مىڭعا جەتكەن. مۇنى ەلىمىزدىڭ تۋريستىك الەۋەتىن شەتەلدە ىلگەرىلەتۋ جۇمىستارىنىڭ ناتيجەسى دەپ باعالاساق بولادى. مىسالى جۋىردا Kazakh Tourism جانە Air Astana كومپانيالارى ءۇندىستاننىڭ جەتەكشى تۋروپەراتورلارىنا ارنايى تانىستىرۋ تۋرىن ۇيىمداستىرىپ, تاعى ءبىر باستاماعا ۇيىتقى بولدى.
ءۇندىستان تۋروپەراتورلارىنىڭ ەلگە ساپارى «مۋمباي – الماتى» جاڭا تىكەلەي اۋە باعدارىنىڭ ىسكە قوسىلۋىنا وراي ۇيىمداستىرىلعان. العاشقى رەيس وڭتۇستىك استاناعا ءساتتى قونىپ, قوناقتار الماتى قالاسى مەن الماتى وبلىسىنىڭ كورىكتى جەرلەرىن ارالاۋعا اتتانىپتى. باعدارلامادا «كوكتوبە», «شىمبۇلاق» تاۋ-شاڭعى كۋرورتى, «شارىن» شاتقالى, كولساي مەن قايىڭدى كولدەرى جانە وزگە دە تۋريستىك نىساندار قامتىلعان. تانىستىرۋ ساپارى ءۇندىستان تۋروپەراتورلارىنا ءوڭىردىڭ تۋريستىك الەۋەتىن باعالاۋعا جانە ساياحاتشىلارعا ۇسىناتىن باعىتتاردى كەڭەيتۋگە جول اشادى دەپ ۇمىتتەنەمىز.
ايتا كەتەيىك, ءۇندىستاننىڭ ەڭ ءىرى مەگاپوليسىمەن تىكەلەي اۋە رەيس اپتاسىنا ءۇش مارتە قاتىنايدى. مۋمبايدان ۇشاق سارسەنبى, جۇما جانە جەكسەنبى كۇندەرى ۇشسا, الماتىدان كەرى رەيستەر سارسەنبى, بەيسەنبى جانە جەكسەنبى كۇندەرى كوككە كوتەرىلەدى.