استانا قالاسىندا 18 جاستاعى ستۋدەنت ءادي چۇكەەۆتىڭ ولىمىنە قاتىستى سوت پروتسەسى باستالدى. قايعىلى وقيعا وتكەن جىلدىڭ جەلتوقسان ايىندا ەلورداداعى تۇنگى كلۋبتاردىڭ ءبىرىنىڭ ماڭىندا بولعان. ايىپتالۋشىلار ورنىندا ەكى ادام وتىر, ولاردىڭ ءبىرى قىلمىس كەزىندە قۇقىق قورعاۋ ورگانىنىڭ قىزمەتكەرى بولعان, دەپ حابارلايدى Egemen.kz.
مارقۇمنىڭ اناسى ۇلىنىڭ ولىمىنەن ءالى دە ەس جيا الماي جۇرگەنىن ايتىپ, ايىپتالۋشىلارعا ەڭ قاتاڭ جازا بەرۋدى تالاپ ەتتى. ونىڭ سوزىنشە, ءادي اۋىر سوققى الىپ, كەيىن كوز جۇمعان.
وقيعانىڭ باستالعان ءساتى كۋاگەرلەر تۇسىرگەن بەينەجازباعا ءتۇسىپ قالعان. الايدا تۋىستارى ءىس ماتەريالدارىندا باسقا ۆيدەو جوق ەكەنىن ايتادى.
ءال-فارابي داڭعىلىنداعى جول اپاتى: رەزونانس تۋدىرعان ءىس تاياۋدا سوتقا جولدانادى
ءادي چۇكەەۆ 24 جەلتوقساندا 18 جاسقا تولعان, ال ءۇش كۇننەن كەيىن قازا تاپقان. ونىڭ دەنەسى ءمايىتحانادان تابىلعانىن اتا-اناسىنا ۇلكەن ۇلى حابارلاعان.
سوت وتىرىسى بۇعان دەيىن ايىپتالۋشىلاردىڭ جۇزدەرىن جاريالاماۋ تالابىنا بايلانىستى كەيىنگە شەگەرىلگەن بولاتىن. وسىنداي جاعداي جاڭا تىڭداۋدا دا قايتالاندى.
مارقۇمنىڭ وتباسى ءار سوت وتىرىسىنا اياگوز قالاسىنان استاناعا شامامەن 1200 شاقىرىم جول ءجۇرىپ كەلەدى.