ەندىگى جەردە تاڭبالاۋ جۇيەسىنە قاتىساتىن شەتەلدىك فارماتسەۆتيكالىق كومپانيالار قازاقستانعا كەلمەي-اق جسن الاتىن بولدى.
بۇعان 2025 جىلعى 18 ساۋىردە كۇشىنە ەنگەن قازاقستان رەسپۋبليكاسىنىڭ ىشكى ىستەر مينيسترلىگى مەن سىرتقى ىستەر مينيسترلىگىنىڭ بۇيرىعى مۇمكىندىكتى بەرمەك. بۇل قۇجات “قازاقستان رەسپۋبليكاسىندا ۋاقىتشا بولاتىن شەتەلدىكتەرگە جانە ازاماتتىعى جوق ادامدارعا جەكە سايكەستەندىرۋ ءنومىرىن قالىپتاستىرۋ جانە تۇزەتۋ" پيلوتتىق جوبانى ىسكە اسىرادى.
بىرىڭعاي تاڭبالاۋ جانە قاداعالاۋ وپەراتورىنىڭ دارىلىك زاتتاردى تاڭبالاۋ جوباسىنىڭ جەتەكشىسى انار كارىباەۆانىڭ ايتۋىنشا, بۇگىندە قازاقستاندا 28 ەلدەن كەلگەن شامامەن 130 شەتەلدىك ءوندىرۋشى كومپانيانىڭ ءدارى-دارمەكتەرى ساتىلۋدا.
«جوبا اياسىندا شەتەل ازاماتتارى «تاۋارلاردى تاڭبالاۋ جانە قاداعالاۋ» اقپاراتتىق جۇيەسىندە جۇمىس ىستەۋ ءۇشىن قاجەت جسن-دى جىلدام ءارى وڭاي الا الادى. بۇل باستامانىڭ ماڭىزدى بولىگى – جسن-دى قازاقستاننان تىس جەردە الۋ مۇمكىندىگى. بۇل شەتەلدىك كومپانيالار ءۇشىن جاعدايدى جەڭىلدەتىپ, قازاقستان نارىعىنا شىعۋ پروتسەسىن جىلدامداتادى», – دەدى انار كارىباەۆا.
پيلوتتىق جوبا قازاقستاندا ءدارى-دارمەك وندىرۋمەن جانە/نەمەسە يمپورتتاۋمەن اينالىساتىن شەتەلدىك ازاماتتار ءۇشىن اكىمشىلىك پروتسەستەردى جەڭىلدەتۋ مەن جاڭعىرتۋ ماقساتىندا قولعا الىندى. ول مەملەكەتتىك ورگاندارمەن ءوزارا ارەكەتتەسۋ, بيزنەس تىركەۋ جانە باسقا دا اكىمشىلىك راسىمدەر ءۇشىن قاجەت جسن-دى جەدەل الۋعا مۇمكىندىك بەرەدى. اتالعان جوبى وسى جىلدىڭ سوڭىنا دەيىن قولدانىستا بولادى.