ءا.مامبەتوۆ اتىنداعى مەملەكەتتiك دراما جانە كومەديا تەاترىندا قازاقستاننىڭ ەڭبەك سىڭىرگەن قايراتكەرى, 2019–2023 جىلدارى مادەنيەت ۆيتسە-ءمينيسترى قىزمەتىن اتقارعان نۇرعيسا داۋەشوۆتىڭ «تيەك» اتتى شىعارماشىلىق كەشى دۇركىرەپ ءوتتى.
ونەر يەسى اڭگىمەسىنىڭ القيسساسىندا:
– قازاقتا «تىلگە تيەك ەتۋ» دەگەن تىركەس بار. ءار ءىستىڭ تيەگىن اعىتىپ, تەتىگىن تاپسا, ناتيجەلى بولادى. دومبىرانىڭ قوس ىشەگىن تيەك كوتەرىپ تۇرماسا, سول تيەك ءدال ورنىندا تۇرماسا, قوڭىر ءۇننىڭ شىقپاسى دا بەلگىلى. اقىن جۇمەكەن ناجىمەدەنوۆ:
سىرلاسام كوكىرەگىمە سۇيەپ تۇرىپ,
جانىمنىڭ جازىعىنا كۇي ەكتىرىپ,
وي, ارمان – ەكى شەگىڭ بولسا سەنىڭ,
بەرەيىن جۇرەگىمدى تيەك قىلىپ, – دەپ دومبىرانىڭ تيەگىن اسپاپتىڭ جۇرەگى دەپ باعالاعان. ەندەشە, ءبىز اسا ەسكەرە بەرمەيتىن تيەكتىڭ ماعىناسى زور, – دەپ شىعارماشىلىق كەشتىڭ اتاۋى مەن ءمان-ماعىناسىن تارقاتا ايتتى.
كەش بارىسىندا نۇرعيسا داۋەشوۆ ءار كۇيدىڭ شىعۋ تاريحىن سوزگە تيەك ەتىپ, اسەرلى كۇي تارتىستى ونەردەگى ءوزى كۋا بولعان ساتتەرمەن, حيكاياتتارمەن تۇزدىقتاپ وتىردى. اسىرەسە قازاق كۇي ونەرىنىڭ حاس شەبەرلەرى قالي جانتىلەۋوۆ, نۇرعيسا تىلەنديەۆ, قارشىعا احمەدياروۆ, قىرىمگەرەي قاجىموۆ, تۇياقبەردى شامەلوۆتىڭ عيبراتتى ومىرىنەن سىر شەرتىپ, ولاردىڭ شىعارمالارىن ەرەكشە ىقىلاسپەن ورىنداۋىنان نۇرعيسانىڭ ءوزى دە قازاق كۇي ونەرىنىڭ كانىگى ناسيحاتشىسى ەكەنىن اڭعاردىق. قايدا جۇرسە دە, قازاقتىڭ كۇمبىرلى كۇيىن تورگە شىعارۋ ءۇشىن تەر توگىپ جۇرگەن نۇرعيسا تۇلعالار اماناتىنا ادالدىعىن ءبىلدىرىپ: «مىناۋ قولىمداعى قازاقتىڭ داۋلەسكەر كۇيشىسى قالي جانتىلەۋوۆتىڭ دومبىراسى. بۇل دومبىراعا 75 جىل بولعان» دەدى.
شىعارماشىلىق كەشتىڭ تاعى ءبىر ەرەكشەلىگى – سۇگىر مەكتەبىن جالعاعان تولەگەن مومبەكوۆتىڭ سۇبەلى كۇيى «سالتانات» العاش رەت ە.راحماديەۆ اتىنداعى اكادەميالىق فيلارمونيا كامەرالىق حورىنىڭ جانە «قورقىت» ءانسامبلىنىڭ سۇيەمەلدەۋىمەن ورىندالدى. حوردىڭ ازالى داۋىسى مەن كۇي كۇمبىرى قوسىلعاندا, جينالعان قاۋىم ەرەكشە تەبىرەندى.
كونتسەرتتە كۇي تاريحىن اسەرلى جەتكىزۋدىڭ تاعى ءساتتى شەشىمىنە كۋا بولدىق. نۇرعيسا داۋەشوۆ قارشىعا احمەدياروۆ اعامىزدىڭ قىتاي ەلىنە بۇيرەگىن ەمدەتۋگە بارعاندا, اۋرۋحانادا شيپاسىن زارىعا كۇتىپ, جاراتۋشىدان مەدەت تىلەپ جاتقان كورشىلەس قىرعىز باۋىرى رۋسلان ەسىمدى ازاماتقا ارناپ شىعارعان «كۇتكەندە» كۇيىن ورىندادى. سول كەزدە انيماتسيا ونەرىنىڭ شەبەرى ايجان جاركەشوۆا قۇممەن سۋرەت سالىپ, وقيعانى كوز الدىمىزعا كەلتىردى.
ال كەش يەسىنىڭ ونەردەگى ارىپتەسى – قىرعىزستاننان ارنايى كەلگەن قومىزشى قىز گۇلشات تاالايبەكوۆامەن كۇي ايتىسىنا تاڭ-تاماشا بولعان كورەرمەن وسىنداي رۋحاني ءلاززات سىيلاعان كەش ءۇشىن مايتالمان شىعارماشىل تۇلعاعا العىسىن جاۋدىردى.