حالىقارالىق كونكيشىلەر وداعى (ISU) مانەرلەپ سىرعاناۋدان 2027 جىلعى الەم چەمپيوناتى فينليانديانىڭ تامپەرە قالاسىندا وتەتىنىن رەسمي تۇردە راستادى. جارىس جالاۋى 15-21 ناۋرىز ارالىعىندا جەلبىرەيدى. بيىلعى گران-پري دودالارىن مىنا مەملەكەتتەر قابىلدايدى: فرانتسيا (17–19 قازان), قىتاي (24–26 قازان), كانادا (31 قازان – 2 قاراشا), جاپونيا (7–9 قاراشا), اقش (14–16 قاراشا), فينليانديا (21–23 قاراشا). فينالدىق سايىس 4–7 جەلتوقسان ارالىعىندا جاپونيانىڭ ناگويا قالاسىندا ۇيىمداستىرىلادى.
تاەكۆوندودان سەربيانىڭ استاناسى – بەلگرادتا وتكەن Serbia Open G1 حالىقارالىق تۋرنيرىندە ەلىمىزدىڭ قۇراماسى مول ولجاعا كەنەلدى. كادەتتەر ەكى التىن, ءبىر كۇمىس, ءۇش قولا مەدالدى يەلەنسە, جاسوسپىرىمدەر ءتورت التىن, ءبىر قولانى ەنشىلەدى. ناتيجەسىندە, جالپى ەسەپتە جەرلەستەرىمىز ءبىرىنشى ورىنعا يە بولدى. جەكەلەگەن تاەكۆوندوشىلار اراسىنان حامزالپەر روماشكين, دياس بايدوللاەۆ, تەمىرجان تاسقىن, نۇرپەرزەنت سامات ۇلى, قانات راحىمبەردى, ەگور شاپتەفراتس قارسىلاس شاق كەلتىرمەي, باس جۇلدەنى ولجالادى.
11–13 ءساۋىر ارالىعىندا فرانتسيانىڭ مەتس قالاسىندا ۇستەل تەننيسىنەن WTT Youth Star Contender Metz حالىقارالىق ءتۋرنيرى وتەدى. 19 جاسقا دەيىنگى (U19) سپورتشىلار اراسىنداعى جارىستا قاراعاندىلىق الان قۇرمانعاليەۆ تە ونەر كورسەتەدى. قازاق سپورتشىسى جەكەلەگەن سىندا جانە ۇلىبريتانيالىق كوننور گرينمەن بىرگە جۇپتىق باسەكەدە باق سىنايدى.
فۋتبولدان ۋەفا چەمپيوندار ليگاسىنىڭ شيرەك فينالىنىڭ العاشقى كەزدەسۋلەرى ءوتتى. باسەكەلەردىڭ ۇشەۋىندە الاڭ يەلەرى جەڭىس تويىن تويلادى. لوندوننىڭ «ارسەنالى» ءمادريدتىڭ «رەالىنىڭ» قاقپاسىنا جاۋاپسىز ءۇش گول سوقتى – 3:0. «بارسەلونا» دورتمۋندتان كەلگەن «بورۋسسيانىڭ» تاس-تالقانىن شىعاردى – 4:0. ءپاريجدىڭ پسج-سى «استون ۆيللانى» ەش قينالماي ۇتتى – 3:1. ميۋنحەننىڭ «باۆارياسى» ءوز الاڭىندا «ينتەرگە» ەسە جىبەردى. قارىمتا ماتچتار 16–17 ءساۋىر كۇندەرى وتەدى.