پرەمەر-مينيستر ولجاس بەكتەنوۆ Shanghai SUS Environment Co., Ltd. كومپانيالار توبىنىڭ پرەزيدەنتى – باسقارما توراعاسى لۋن تسزيشەنمەن بىلتىر قاراشادا قىتايعا جۇمىس ساپارى بارىسىندا قول جەتكىزىلگەن ۋاعدالاستىقتار شەڭبەرىندەگى ىنتىماقتاستىق ماسەلەلەرىن تالقىلادى.
الماتى قالاسىندا قوقىس وڭدەۋ زاۋىتىن سالۋ جونىندەگى ينۆەستيتسيالىق جوبانى جۇزەگە اسىرۋعا نازار اۋدارىلدى.
كەزدەسۋگە قاتىسۋشىلار ەلىمىزدە قالدىقتاردى ەلەكتر ەنەرگياسىنا اينالدىرۋعا باعىتتالعان Waste-to-Energy تەحنولوگياسىن ەنگىزۋدىڭ كەلەشەگىن تالقىلادى. Shanghai SUS Environment Co., Ltd. باسقارما توراعاسى لۋن تسزيشەن الماتىداعى تاۋلىگىنە 2 مىڭ تونناعا جۋىق قالدىقتى قايتا وڭدەيتىن جانە 60 مۆت-عا دەيىن ەلەكتر ەنەرگياسىن وندىرەتىن قوقىس وڭدەۋ زاۋىتىنىڭ جوباسىن تانىستىردى. تىكەلەي ينۆەستيتسيا كولەمى 270 ملن دوللاردى قۇرايدى.
الماتى قالاسى اكىمدىگىنىڭ مالىمەتىنشە, اتالعان زاۋىتتىڭ ىسكە قوسىلۋى مەگاپوليستىڭ قاتتى تۇرمىستىق قالدىقتاردى كادەگە جاراتۋعا دەگەن قاجەتتىلىگىن وتەپ, 2029 جىلعا قاراي قالدىقتاردى قايتا وڭدەۋ ۇلەسىن 80%-عا دەيىن جەتكىزۋگە مۇمكىندىك بەرەدى.
لۋن تسزيشەن كومپانيانىڭ قالدىقتاردى ەنەرگيا كوزىنە اينالدىرۋ سالاسىندا قحر-دا كوشباسشى ەكەنىن, ونىڭ قىتاي نارىعىنداعى ۇلەسى قازىردىڭ وزىندە 40%-دى قۇراپ وتىرعانىن ايتتى. سونىمەن قاتار كومپانيا بىرقاتار ەلدە قايتا وڭدەۋ جانە ەكولوگيالىق ونەركاسىپتىك پاركتەر باعىتىندا 84 جوبانى جۇزەگە اسىردى. قولدانىلاتىن تەحنولوگيالار ەكولوگيالىق قاۋىپسىزدىكتىڭ الەمدىك ەڭ جوعارى ستاندارتتارىنا سايكەس كەلەدى.
پرەمەر-مينيستر حالىق سانى مەن قاجەتتىلىكتەردىڭ ءوسۋى جاعدايىندا ەكولوگيا ماسەلەلەرىن شەشۋدىڭ ماڭىزدىلىعىن اتاپ ءوتتى.
«پرەزيدەنت قاسىم-جومارت توقاەۆ الدىمىزعا 2029 جىلعا قاراي كوممۋنالدىق قالدىقتاردى قايتا وڭدەۋ كولەمىن 38%-عا جەتكىزۋ مىندەتىن قويدى. جىل سايىن ەلىمىزدە 4,5 ملن توننادان استام كوممۋنالدىق قالدىق تۇزىلەدى. سوندىقتان قوقىس وڭدەۋ زاۋىتىن سالۋ – قاجەتتى جوبا.
ەلەكتر ەنەرگياسىن ءوندىرۋ ارقىلى قالدىقتاردى ەكولوگيالىق كادەگە جاراتۋ قايتا وڭدەۋدى دامىتۋداعى ماڭىزدى قادام بولماق. ۇكىمەت اتالعان جوبانى ماقۇلداپ, قاجەتتى قولداۋ كورسەتۋگە دايىن. ءبىز بايىپتى ينۆەستورلارمەن ۇزاقمەرزىمدى ىنتىماقتاستىققا مۇددەلىمىز», دەپ اتاپ ءوتتى و.بەكتەنوۆ.
سالالىق مينيسترلىكتەر مەن الماتى قالاسىنىڭ اكىمدىگىنە ەكى اپتا مەرزىمىندە زاۋىت قۇرىلىسىن وسى جىلدىڭ ماۋسىم ايىندا باستاۋ ءۇشىن ينۆەستيتسيالار تۋرالى كەلىسىمنىڭ جوباسىن دايىنداۋدى قامتاماسىز ەتۋ تاپسىرىلدى.
سونىمەن قاتار كەزدەسۋ بارىسىندا كادر دايارلاۋ ماسەلەسى دە ءسوز بولدى. جوبا اياسىندا 500 جۇمىس ورنى, ونىڭ ىشىندە 100 تۇراقتى جۇمىس ورنى اشىلادى. لۋن تسزيشەن جەرگىلىكتى ماماندار جۇمىسقا باسىم تارتىپپەن تارتىلاتىنىن اتاپ ءوتتى.