بيىلعى ناۋرىز ايىندا بۋرابايدا وتكەن ۇلتتىق قۇرىلتايدىڭ ءتورتىنشى وتىرىسىندا پرەزيدەنت قاسىم-جومارت توقاەۆ كوتەرگەن ماسەلەلەر مەن جاريالاعان شەشىمدەردى حالقىمىز ەرەكشە ىقىلاسپەن قابىل الدى. سونىڭ ىشىندە مەملەكەت باسشىسى ۇكىمەتكە ورتالىق – باتىس اۆتوموبيل جولىن باستاۋدى تاپسىرعانىنىڭ ساياسي-الەۋمەتتىك جانە ەكونوميكالىق تۇرعىدان ماڭىزى زور.
مۇنداي ماگيسترال قۇرىلىسى وڭىرلەردىڭ قارقىندى دامۋىنا ۇلكەن مۇمكىندىك تۋعىزىپ, تىڭ سەرپىن بەرەتىن كەشەندى جوبا بولعالى تۇر. بۇل جوبا ىسكە اسىرىلسا, اقمولا, اقتوبە, باتىس قازاقستان,قوستاناي وبلىستارىنداعى شالعاي اۋىلداردىڭ ءوسىپ-وركەندەۋىنە جول اشىلادى, جاڭا ءوندىرىس نىساندارى قۇرىلىپ, تۇرعىنداردى جۇمىسپەن قامتۋ جاقسارتىلادى. تۇپتەپ كەلگەندە, بۇل حالىقتىڭ ءال-اۋقاتىن ارتتىرۋعا, تۇرمىس جاعدايىن تۇزەۋگە وڭ ىقپالىن تيگىزەدى. اسىرەسە تۋىپ-وسكەن جەرىمىز تورعاي ءوڭىرىنىڭ ەكىنشى تىنىسى اشىلارى ءسوزسىز.
وسى جاعىمدى جاڭالىقتى تورعايلىقتار كوپتەن كۇتكەن وڭ وزگەرىستەردىڭ جارقىن دا جاسامپاز باستاماسى رەتىندە قابىلداپ, ەڭسەسى كوتەرىلىپ, قۋانىشى قوينىنا سىيماي جاتىر. ەڭ باستىسى, جول بار جەردە دامۋ بار, كەلەشەك بار. مۇنى حالىق جاقسى تۇسىنەدى. ۇكىمەت ورتالىق – باتىس جول قۇرىلىسىن تەزدەتىپ, قاجەتتى ءىس-شارالاردى بيىل باستاۋعا مىندەتتەنىپ وتىر. مىنە, سول كۇندى جەرلەستەرىمىز تاعاتسىزدانا كۇتەدى.
ءبىز ۇلت تاريحىندا ەرەكشە ورنى بار الاش كوسەمدەرىنىڭ وتانى – تورعاي ءوڭىرى تۇرعىندارىنىڭ اتىنان مەملەكەت باسشىسىنا ورتالىق – باتىس جول قۇرىلىسىن باستاۋ تۋرالى تاريحي شەشىم قابىلداعانى ءۇشىن شىنايى العىسىمىزدى بىلدىرەمىز. اتالعان ماگيسترال تاۋەلسىز ەلىمىزدىڭ تاريحىنا التىن ارىپتەرمەن جازىلاتىنىنا, پرەزيدەنتىمىزدىڭ سارابدال ساياساتىنىڭ ساۋلەتتى ەسكەرتكىشى بولاتىنىنا سەنىمدىمىز. قاسىم-جومارت توقاەۆتىڭ ادىلەتتى قازاقستان ورناتۋ جولىندا العا قويىپ وتىرعان ۇلى ماقساتتارىنا جەتۋىنە تىلەكتەسپىز جانە جان-جۇرەگىمىزبەن قولداۋ بىلدىرەمىز.
اباي مۇقانوۆ,
قازاقستان رەسپۋبليكاسىنىڭ قۇرمەتتى قۇرىلىسشىسى,
جانىبەك كەنجەباەۆ,
«ەۋرازيا ينۆەست» جشس باس ديرەكتورى,
مانات كاربوزوۆ,
«سىما-ك» شارۋا قوجالىعىنىڭ باسشىسى,
تاعى 10 ادام قول قويعان