قورعانىس ءمينيسترىنىڭ گارنيزوندار مەن اسكەري بولىمدەرگە اعاش كوشەتتەرىن جاپپاي وتىرعىزۋ جونىندەگى باستاماسىن كەڭەس وداعىنىڭ باتىرى گەنەرال-مايور سابىر راحىموۆ اتىنداعى اسكەري كوللەدجدىڭ (شىمكەنت) جەكە قۇرامى جىگەرلەنە قابىلداعان, دەپ جازادى Egemen.kz.
سايرام-وگەم مەملەكەتتىك ۇلتتىق تابيعي پاركىنىڭ ۇجىمىمەن بىرلەسىپ, 80 كوشەت وتىرعىزعان اتالعان اسكەري كوللەدجدىڭ باستىعى پولكوۆنيك ماقسات اقشالوۆ سالتاناتتى جيىنداعى سويلەگەن سوزىندە: «مۇنداي شارالار ادامداردىڭ ىنتىماعىن ارتتىرادى, ەڭ باستىسى, ەڭبەگىمىزدىڭ جەمىسى كەيىنگى ۇرپاقتى قۋانتادى», دەدى.
كوگالداندىرۋ باستاماسىنىڭ ماڭىزدىلىعىن اتاپ وتكەن اتالعان پارك ديرەكتورى ساعادات نۇرجىگىتوۆ ەكواكتسياعا بەلسەنە قاتىسقان كوللەدجگە ريزاشىلىعىن ءبىلدىرىپ, كوللەدج باسشىلىعىنا العىس حات پەن تاربيەلەنۋشىلەردىڭ ۇلتتىق ساياباقتا دەمالىسىن ۇيىمداستىرۋعا ارنالعان 25 جولداما تابىستادى.
كوللەدج ۇجىمى مەن ۇلتتىق پارك قىزمەتكەرلەرىنىڭ بىرلەسكەن كۇش-جىگەرىمەن ارشا, جەمىس جانە جاپىراقتى اعاش كوشەتتەرى وتىرعىزىلدى.
شارا سوڭىندا ساياباق قىزمەتكەرلەرى وسىمدىكتەرگە كۇتىم جاساۋ جونىندە نۇسقاۋلىق وتكىزدى. كوللەدج تاربيەلەنۋشىلەرى كوشەتتەرگە قامقور بولۋعا, ولاردىڭ ۇسىنىستارىن ورىنداۋعا ۋادە ەتتى.