تاڭسىقباەۆ تۋىندىلارى – الماتى تورىندە

2023 جىلدىڭ سوڭىندا وزبەكستان استاناسىنا بارعان ساپارىمىز ەسكە ءتۇسىپ وتىر. سول جولى تاشكەنتكە تابانى تيگەن قازاقتىڭ ءتاۋ ەتىپ, تاعزىم جاسار قاسيەتتى ورىندارىنىڭ ءبىرى – الەمگە ءماشھۇر قىلقالام شەبەرى ورال تاڭسىقباەۆتىڭ مۋزەي-ۇيىنە ايالداعان ەدىك. ەكىقاباتتى ەسكى عيماراتتى ەكى ساعاتتاي ارالاپ, ساڭلاق سۋرەتشىنىڭ وزىمەن جۇزدەسكەندەي, رۋحىمەن تىلدەسكەندەي ەرەكشە كۇيگە بولەندىك. العان اسەرىمىز, كورگەن دۇنيەمىز تۋرالى كەزىندە «Egemen Qazaqstan»-عا «تەلتۇلعا» دەگەن اتاۋمەن ماقالا دا جازعانبىز. ءارى ەتەنە جاقىن ەكى ەلگە ورتاق تەل­تۇلعانىڭ مۋ­زەي-ۇيىمەن ۇكى­مەتتىك دەڭگەيدە بايلانىس ورنا­تۋدىڭ ماڭىزى زور ەكەنىن دە ماسە­لە ەتىپ كوتەرگەنبىز. ماقا­لا­مىز­دا الگى ۇسى­نىس­تى مۋزەي ديرەكتورى فارحود ءدجا­لي­لوۆ­تىڭ سوزىمەن تۇزدىقتاي تۇسكەنىمىز بار-تىن.

– قازاقستان تاراپىمەن بىر­لەسكەن جوبالاردى جۇزەگە اسىرۋعا دايىنبىز. ول ءۇشىن قازاقستان ۇكىمەتى تاراپىنان قولداۋ كەرەك. ويتكەنى مۇنداعى دۇنيەلەردىڭ ءبارى قۇندى جادىگەرلەر. سوندىقتان كورمە ۇيىمداستىرۋ, كارتينالاردى تاسىمالداۋ, ساقتاندىرۋ, قارجىلاندىرۋ سەكىلدى جاۋاپتى جۇمىستار ۇكىمەتتىك دەڭگەيدە كەلىسىلىپ, شەشىلگەنى ابزال. بىزگە مۋزەيلەر اراسىنداعى بايلانىستىڭ قالىپتاسقانى, تەرەڭدەي تۇسكەنى ماڭىزدى. سەبەبى ورال تاڭسىقباەۆتىڭ شىعار­ماشىلىعىنا قىزى­عاتىن قازاق­ستاندىقتاردىڭ كوپ ەكەنىن بىلەمىز, – دەگەن-ءدى سوندا فارحود دجاليلوۆ.

ءبىز دە ءوز تاراپىمىزدان «راس, ۇكىمەتتىك دەڭگەيدەگى بايلانىستىڭ ماڭىزى زور. ونىڭ ۇستىنە بيىل ورال تاڭسىقباەۆتىڭ تۋعانىنا 120 جىل تولادى. مۇنداي مەرەي­لى داتانى ەلەۋسىز قالدىرۋعا بول­ماي­دى. اۋقىمدى ءىس-شارالار ارقىلى اتاقتى سۋرەتشىنىڭ شىعار­ما­شىلىعىن قايتا جاڭ­عىر­تىپ, جۇرتشىلىقپەن قاۋىشتىرعان ابزال. بۇعان ەلىمىزدىڭ مادەنيەت جانە اقپا­رات مينيسترلىگى دە ماڭىز بەرەدى دەپ سەنە­مىز. قازاقتا ورال تاڭسىقباەۆتاي اتاعى التى قۇرلىققا جايىلعان ساڭلاق سۋرەت­شى ساۋساقپەن سانارلىق. ۇلى ونەر يەسىن ۇلىقتاۋ الدىمەن ۇلتىمىزعا, ۇرپاعى­مىزعا كەرەك», دەگەن ويدى ودان ءارى ورىستەتە تۇسكەن ەدىك.

مىنە, سول ءبىر ۇسىنىس كەش تە بولسا جۇزەگە اسىرىلدى. 19 ناۋرىزدا الماتى قالاسىنداعى ءابىلحان قاستەەۆ اتىنداعى مەملەكەتتىك ونەر مۋزەيىندە كسرو حا­لىق سۋرەتشىسى, كسرو كوركەمسۋرەت اكادە­مياسىنىڭ تولىق مۇشەسى, وزبەكستانداعى كەسكىندەمە ونە­رىنىڭ نەگىزىن قالاۋشى, زامانداستارى «تاۋ مەن دالا جىرشىسى» اتاعان ۇلتىمىزدىڭ دارىندى پەرزەنتى ورال تاڭسىقباەۆتىڭ كورمەسى اشىلدى. ەندى ونەر سۇيەر قاۋىم وسى جىلدىڭ 1 ماۋ­سىمىنا دەيىن ساڭلاق سۋرەتشىنىڭ تاماشا تۋىندىلارىمەن تانىسا الادى. ءىس-شارانىڭ اشىلۋىنا قاتىسقان وزبەكستان پرەزيدەنتىنىڭ كومەك­شىسى سايدا ميرزيوەۆا مۇنى ورال تاڭسىقباەۆتىڭ كەيىنگى 40 جىلداعى ەڭ اۋقىمدى كورمەسى ەكەنىن ەسكە سالدى. شىنىندا دا, بۇل جولى وزبەكستان مەن قازاقستان مۋزەي­لە­رىنەن جي­ناق­تالعان تاڭ­داۋ­لى 78 تۋىندى كوپشىلىك نازارىنا ۇسىنىلدى. سايدا حانىم اتاپ وتكەندەي, «كورمە – ۇلى سۋرەتشىگە جاسالعان زور تاعزىم عانا ەمەس, سونىمەن قاتار باۋىرلاس ەكى ەلدىڭ كوركەم مۇراسىن بىرىكتىرەتىن ماڭىز­دى مادەني وقيعا».

ايتپاقشى, تاشكەنتتەگى ورال تاڭسىق­باەۆتىڭ قاراشاڭىراعىنا جولىمىز تۇسكەن جىلى كامالا بورىباەۆا ەسىمدى مۋزەي قىز­مەت­كە­رىنىڭ «قۇتتى قوناق ەكەنسىزدەر. كەشە مۇندا پرەزي­دەنتتىڭ قىزى كەلگەن ەدى. سىزدەر مارتەبەلى مەيماننان كەيىن تابالدىرىعىمىزدى اتتاپ تۇرسىزدار. بۇل – جاقسى­لىق­تىڭ نىشانى», – دەپ ءىلتيپات بىلدىرە ءسوز باستاعانى بار. ەكسكۋرسوۆودتىڭ «پرەزيدەنتتىڭ قىزى» دەپ مەڭزەگەنى ءدال وسى سايدا ميرزيوەۆا بولاتىن. سول جولى وزبەكستان پرەزيدەنتى كومەكشىسىنىڭ Facebook-تەگى رەسمي پاراقشاسىنان ء«بىزدىڭ ەلدەگى مۋزەي-ۇيلەردىڭ جۇمىسىن قايتا قاراستىراتىن ۋاقىت جەتتى. ولار­دى ساپالىق ءارى مازمۇن تۇر­عىسىنان جاڭا دەڭگەيگە كوتە­رۋ­گە ءتيىسپىز», دەگەن جازبانى دا كوزىمىز شالعان-دى. سونداعى وڭ وزگەرىستەردىڭ ورال تاڭسىقباەۆ مۋزەي-ءۇيىن اينالىپ وتپەگەنىنە بۇگىن ءىشىمىز جىلىپ وتىرعانىن نەسىنە جاسىرايىق. باۋىرلاس ەلدەردىڭ مادەني بايلانىسى بەكەم بولعاي.

اتاجۇرتىنا كەلگەن ورال تاڭسىقباەۆ تۋىندىلارىن تاما­شا­­لايىق, ارداقتى وقىرمان.

فارحات قايرات ۇلى,

جۋرناليست

استانا