بۇگىندە مەديتسينالىق وڭالتۋ – مىندەتتى الەۋمەتتىك مەديتسينالىق ساقتاندىرۋ پاكەتىندەگى باعاسى قىمبات ءارى وتە وزەكتى قىزمەتتىڭ ءبىرى دەسەك تە بولادى. ويتكەنى, وڭالتۋدان ءوتۋ – ينسۋلت نەمەسە جاراقات العان, تىزە, جامباس بۋىندارىن الماستىرعان, ءتۇرلى سوزىلمالى اۋرۋلارعا شالدىققان ناۋقاستار ءۇشىن اۋاداي قاجەت.
ماسەلەن, 2025 جىلى الماتى قالاسىندا ءمامس پاكەتى شەڭبەرىندەگى رەابيليتاتسيالىق قىزمەتتەرگە 8 ملرد تەڭگەگە جۋىق قارجى قاراستىرىلعان. سونىمەن ساقتاندىرۋ ارقىلى مەديتسينالىق وڭالتۋدان كىمدەر وتە الادى؟ رەابيليتاتسيادان ءوتۋ جولدارى قانداي؟ وسى جانە وزگە دە ساۋالدارعا مەديتسينالىق ساقتاندىرۋ قورىنىڭ الماتى فيليالى وكىلدەرى تومەندەگىدەي جاۋاپ بەردى.
مەديتسينالىق وڭالتۋ قىزمەتىن قانداي كلينيكالار كورسەتەدى؟
2025 جىلى الماتىدا 81 ۇيىم مەديتسينالىق وڭالتۋ قىزمەتىن كورسەتۋگە تاپسىرىس الدى. بۇل تىزىمگە ەنگەن ەمحانالار, اۋرۋحانالار, جەكە مەنشىك مەديتسينا ورتالىقتارى, وڭالتۋ جانە سپورتتىق-وڭالتۋ كەشەندەرى, شيپاجاي كەشەندەرى, مەديتسينالىق-الەۋمەتتىك مەكەمەلەر, ەمدەۋ-ساۋىقتىرۋ كەشەندەرى بار. تىزىممەن قوردىڭ msqory.kz رەسمي سايتى ارقىلى تانىسۋعا بولادى.
مەديتسينالىق وڭالتۋ كىمدەرگە كورسەتىلەدى؟
رەابيليتاتسيادان:
- نەگىزگى نەمەسە سوزىلمالى اۋرۋدى ەمدەۋ قاجەت بولعاندا;
- ينسۋلت ت.ب. سىندى اۋىر ناۋقاستاردان كەيىن;
- كەيبىر حيرۋرگيالىق وپەراتسيالاردان كەيىن;
- جاراقات العاننان كەيىن;
- سىرقات سالدارىنان ادامنىڭ قيمىل-قوزعالىسى شەكتەلگەن جاعدايلاردا وتۋگە بولادى.
بۇرىن وڭالتۋدان ءوتىپ كورمەگەن پاتسيەنت نەدەن باستاعانى ءجون؟
كەز كەلگەن پاتسيەنت مەديتسينالىق قىزمەتكە جۇگىنۋ ءۇشىن ەڭ الدىمەن تىركەلگەن ەمحاناسىنا بارادى.
ەمدەۋشى دارىگەر رەابيليتولوگ ماماننان نەمەسە مۋلتيديستسيپلينارلىق توپ ماماندارىنان كونسۋلتاتسيا الۋعا جىبەرەدى.
ماماندار دەرتتىڭ پايدا بولۋى مەن مەڭدەۋىن, سىرقاتتىڭ دەنساۋلىق جاعدايىنا بايلانىستى مالىمەتتەردى ەسكەرە وتىرىپ, وڭالتۋعا دەگەن قاجەتتىلىك بار-جوعىن ايقىندايدى. باستاپقى رەابيليتاتسيالىق دياگنوز قويىپ, پاتسيەنت دەنساۋلىعىن قالپىنا كەلتىرۋ جوسپارىن, كۋرستىڭ مەرزىمىن ت.ب. انىقتايدى.
ەگەر كەشەندى تەكسەرۋ ناتيجەسىندە رەابيليتاتسيا ءتيىمدى دەپ تابىلسا, پاتسيەنت وڭالتۋدان امبۋلاتوريادا, ستاتسيوناردا, ستاتسيوناردى الماستىراتىن ەمدەۋ مەكەمەسىندە, ۇيدە وتە الادى. جوسپارلى تۇردە ەم قابىلدايتىن پاتسيەنت ستاتسيونارعا «اۋرۋحاناعا جاتقىزۋ بيۋروسى» پورتالى ارقىلى جاتقىزىلادى.
مەديتسينالىق وڭالتۋ ءۇش كەزەڭنەن تۇرادى
ءبىرىنشىسى اۋرۋى اسقىنىپ تۇرعان ناۋقاستارعا, حيرۋرگيالىق وپەراتسيا جاساتقان, جاراقات العان ادامدارعا ارنالعان. ول ستاتسيونارلاردىڭ قۇرىلىمدىق بولىمشەلەرىندە جۇرگىزىلەدى.
ەگەر اۋرۋحاناعا جاتقىزۋ قاجەت بولماسا, مەديتسينالىق كومەك كورسەتىلگەننەن كەيىن جانە نەگىزگى اۋرۋ ەمدەلىپ بولعاننان كەيىن پاتسيەنت وڭالتۋدىڭ ەكىنشى نەمەسە ءۇشىنشى كەزەڭىنە جىبەرىلەدى.
وڭالتۋدىڭ ەكىنشى كەزەڭى مامانداندىرىلعان بولىمشەلەردە نەمەسە رەسپۋبليكالىق دەنساۋلىق ساقتاۋ ۇيىمدارى, مامانداندىرىلعان وڭالتۋ ورتالىقتارى مەن كوپبەيىندى ستاتسيونارلار بازاسىندا وتەدى. بۇل كەزەڭ اۋرۋ باستالعان ساتتەن باستاپ التى اي ىشىندە جۇرگىزۋ قاجەت.
ءۇشىنشى كەزەڭدە مەديتسينالىق وڭالتۋ ەمحانا-امبۋلاتوريا دەڭگەيىندە, كۇندىزگى جانە تاۋلىك بويعى ستاتسيونارلاردا, وڭالتۋ ورتالىقتارىندا, ساناتوريلەر مەن كۋرورتتاردا, ۇيدەگى ستاتسيونار جاعدايىندا, سونداي-اق قاشىقتىقتان جۇرگىزىلەدى.
الماتى